ແຂວງສະຫວັນນະເຂດ  ຍົກຍ້າຍ ແລະ ແຕ່ງຕັ້ງພະນັກງານການນຳຂັ້ນພະແນກການ 2 ທ່ານ

ແຂວງສະຫວັນນະເຂດ ຍົກຍ້າຍ ແລະ ແຕ່ງຕັ້ງພະນັກງານການນຳຂັ້ນພະແນກການ 2 ທ່ານ

June 19, 2020 0 By admin

ໃນຕອນເຊົ້າວັນທີ 18 ມິຖຸນາ 2020 ແຂວງສະຫວັຍຍະເຂດ ຈັດພິທີປະກາດການຈັດຕັ້ງພະແນກການ, ກົມກອງອ້ອມຂ້າງແຂວງສະຫວັນນະເຂດ ທີ່ຫ້ອງປະຊຸມພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ໂດຍການເປັນປະທານຂອງ ທ່ານ ນາງ ບຸນເຍື້ອນ ທິບພຸດທະວົງ ກຳມະການປະຈຳພັກແຂວງ ປະທານກວດກາພັກ-ລັດແຂວງສະຫວັນນະເຂດ.


ໃນພິທີ ທ່ານ ສຸດໃຈ ໄຊຍະວົງ ຮອງຫົວໜ້າຄະນະຈັດຕັ້ງແຂວງສະຫວັນນະເຂດ ຜ່ານຂໍ້ຕົກລົງເຈົ້າແຂວງສະຫວັນນະເຂດ ວ່າດ້ວຍການຍົກຍ້າຍ ແລະ ແຕ່ງຕັ້ງພະນັກງານ ໂດຍອີງຕາມກົດໝາຍວ່າດ້ວຍການປົກຄອງທ້ອງຖິ່ນ ແຫ່ງ ສ.ປ.ປ ລາວ ເຊິ່ງເຈົ້າແຂວງສະຫວັນນະເຂດ ຕົກລົງເຫັນດີ ຍົກຍ້າຍ ທ່ານ ປ.ອ ໂພໄຊ ສິດທິຊົນ ຫົວໜ້າເຂດການຄ້າຊາຍແດນ-ແດນສະຫວັນ ໄປປະຈຳການຢູ່ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ພ້ອມທັງອະນຸມັດແຕ່ງຕັ້ງ ເປັນຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ ແລະ ເຫັນດີຍົກຍ້າຍ ທ່ານ ສີສຸກ ເທບທານີ ຮອງເຈົ້າເມືອງອາດສະພອນ ໄປປະຈຳການຢູ່ພະແນກຍຸຕິທຳແຂວງ ພ້ອມທັງອະນຸມັດແຕ່ງຕັ້ງ ເປັນຮອງຫົວໜ້າພະແນກຍຸຕິທຳແຂວງສະຫວັນນະເຂດ.


ໂອກາດນີ້ ນາງ ບຸນເຍື້ອນ ທິບພຸດທະວົງ ປະທານກວດກາພັກ-ລັດແຂວງສະຫວັນນະເຂດ ມີຄຳເຫັນໂອ້ລົມເພື່ອເປັນບ່ອນອີງວ່າ: ການປະກາດການຈັດຕັ້ງ ຂັ້ນພະແນກຂອງ 2 ອົງການ ໃນພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ແລະ ພະແນກຍຸຕິທຳແຂວງ ຄັ້ງນີ້ ເປັນການກະກຽມບຸກຄະລາກອນ ປະກອບໃສ່ກອງປະຊຸມໃຫຍ່ 3 ຂັ້ນຂອງພັກ ເຊິ່ງແມ່ນຄວາມຮຽກຮ້ອງຕ້ອງການ ຂອງໜ້າທີ່ວຽກງານໄລຍະໃໝ່.

ຖ້າອີງໃສ່ກົດໝາຍວ່າດ້ວຍການແຕ່ງຕັ້ງພະນັກງານ-ລັດຖະກອນ ແມ່ນເປັນເລື່ອງທີ່ຈັດຕັ້ງປະຕິບັດເປັນປົກກະຕິ, ພ້ອມນີ້ ຜູ້ໄດ້ຮັບການຍົກຍ້າຍ ແລະແຕ່ງຕັ້ງໃໝ່ ກໍຕ້ອງໄດ້ເອົາໃຈໃສ່ ເຮັດວຽກງານ ຢ່າງຫ້າວຫັນ, ສືບຕໍ່ຍູ້ແຮງຂະບວນການຮັກຊາດ ແລະ ພັດທະນາປັບປຸງລະບົບການເມືອງຢູ່ຮາກຖານ ໃຫ້ໄປຕາມໜ້າວຽກ ແລະ ມີຫຼັກການ ທັງເປັນການປະກອບສ່ວນ ການປະຕິບັດວຽກງານ ຕາມຫຼັກການປ່ຽນແປງໃໝ່ ຂອງພັກ ສືບຕໍ່ນໍາພາວຽກງານ ໃຫ້ມີຜົນສໍາເລັດ ສິ່ງສໍາຄັນ ແມ່ນຮັກສາໄດ້ຄວາມສາມັກຄີ ໂດຍເລີ່ມຈາກການເຮັດວຽກການເມືອງແນວຄິດເປັນຫຼັກ, ຮັກສາໄດ້ເຖິງຈັນຍາບັນຂອງພະນັກງານ ໂດຍສະເພາະການປະພຶດຕົນ ຕ້ອງຢູ່ພາຍໃຕ້ຄວາມສັດຊື່-ຈິງໃຈ ແລະ ໃຫ້ກຽດເຊິ່ງກັນ ແລະ ກັນ.

ແຫຼງທີ່ມາ: ວິທະຍຸກະຈາຍສຽງ ສະຫວັນນະເຂດ