ທ່ານນາຍົກຝາກໃຫ້ສື່ມວນຊົນ ຕ້ອງເປັນຜູ້ປາກອອກແສງ ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ

ທ່ານນາຍົກຝາກໃຫ້ສື່ມວນຊົນ ຕ້ອງເປັນຜູ້ປາກອອກແສງ ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ

August 15, 2020 0 By admin

ໃນໂອກາດເຂົ້າຮ່ວມພິທີໂຮມຊຸມນຸມສະເຫຼີມສະຫຼອງ ວັນສື່ມວນຊົນ ແລະ ການພິມຈຳໜ່າຍ ຄົບຮອບ 70(13 ສິງຫາ 1950-13ສິງຫາ2020)  ທີ່ມີຂຶ້ນປີທີ່ຫໍວັດທະນະທຳແຫ່ງຊາດ ໃນວັນທີ 14 ສິງຫາ 2020 ໂດຍການເປັນປະທານຂອງ ທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເຊິ່ງມີຄະນະນຳກະຊວງ ຖວທ,  ສື່ມວນຊົນແລະການພິມຈຳໜ່າຍ ແລະ ແຂກທີ່ຖືກເຊີນເຂົ້າຮ່ວມ.

ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງສປປລາວ  ໄດ້ເນັ້ນບາງຕອນວ່າ: ວັນສື່ມວນຊົນ ຄົບຮອບ 70 ປີ ແມ່ນເປັນ 70 ປີ ທີ່ມີການເຕີບໃຫຍ່ຂະຍຫາຍ ແບບບໍ່ມີວັນຖອຍຫຼັງ, ໄດ້ສ້າງຜົນງານທີ່ມີຄົນຄ່າທາງດ້ານມະນະຈິດໃນການອົດທົນ, ມີນໍ້າໃຈຮັກຊາດ ທີ່ມີຄວາມກ້າຫານ, ເປັນກະແສຟອງອັນມະຫຶມາ ສາມາດທັບມ້າງແນວທາງຂອງສັດຕູໃນສະໄໝນັ້ນ. ໃນສະໄໝນັ້ນຜູ້ທີ່ຈະເປັນນັກຂ່າວຕ້ອງມີ ນໍ້າໃຈເດັດດ່ຽວກ້າຫານ, ຍອມເສຍສະຫຼະ; ຕ້ອງມີປາກກາ, ມີປື້ມບັນທຶກປະຈຳຕົວ ແລະ ມີອາວຸດສົງຄາມຕິດກາຍ ມີກ້ອງຖ່າຍປະຈຳໃຈ.

ທ່ານຍັງສະເໜີຕື່ມວ່າ: ສື່ມວນຊົນເປັນພາຫະນະ ປຽບເໝືອນເປັນຜູ້ໃຫ້ອາຫານດ້ານຂໍ້ມູນຂ່າວສານໃຫ້ແກ່ປະຊາຊົນ, ການຫາຂ່າວມາໃຫ້ຄົນເສບກໍ່ຕ້ອງໃຫ້ທັນການ, ເນື່ອງຈາກປັດຈຸບັນແມ່ນມີສື່ສັງຄົມອອນລາຍທີ່ເຂົ້າມາເປັນສ່ວນໜຶ່ງໃນການບໍລິໂພກຂໍ້ມູນຂ່າວສານ . ສະນັ້ນ ຜູ້ທີ່ເປັນສື່ຫຼັກຕ້ອງໄດ້ບືນຕົວເອງຫຼາຍຂຶ້ນ ເພື່ອນຳສະເໜີຂ່າວໃຫ້ເປັນທີ່ດຶງດູດຂອງສັງຄົມ ສ້າງຄວາມເຊື່ອຖືໃຫ້ແກ່ສັງຄົມ.

ຫຼີກລຽງການນຳສະເໜີຂ່າວແບບຊໍ້າຊາກ ແຕ່ລະສຳນັກຂ່າວຕ້ອງໄດ້ສຳຫຼວດເບິ່ງຕົນເອງວ່າຄວາມນິຍົມຂອງສັງຄົມໃນການບໍລິໂພກຂ່າວ ເພີ່ມຂຶ້ນ ຫຼື ຫຼຸດລົງ ແລະ ສາເຫດຍ້ອນຫຍັງ, ສື່ຕ້ອງມີການປັບຕົວເອງຢູ່ເລື້ອໆ ເພື່ອຕໍ່ສູ້ກັບກະແສຂ່າວທີ່ເກີດຂຶ້ນມາໃໝ່ຕະຫຼອດເວລາ.

ໃນທ່າມກາງການລະບາດຂອງເຊື້ອພະຍາດໂຄວິດ-19 ນີ້ ການໂຄສະນາກ່ຽວກັບການດຳລົງຊິວິດປົກກະຕິແບບໃຫມ່ ຫລື New Normal   ສື່ເຮົາກໍ່ຕ້ອງໄດ້ປັບຕົນເອງຫັນເປັນສື່ທີ່ກຸ້ມຕົນເອງ, ປະຢັດຄົນປະຢັດເວລາ, ເຝິກຝົນຕົນເອງໃຫ້ກາຍເປັນສື່ມວນຊົນ ດັ່ງຄຳວ່າ: “ ສື່ມວນຊົນ ຕ້ອງເປັນຜູ້ປາກອອກແສງ ຜູ້ທີ່ແທງເຖິງໃຈ, ຜູ້ສະດຸ້ງໄວເມື່ອໄດ້ອ່ານ, ຜູ້ທີ່ກ້າຜ່ານອຸປະສັກ, ຜູ້ທີ່ຮັກຄວາມຈິງ, ຜູ້ທີ່ຍິງຖືກເປົ້າ”.

.

ແຫຼ່ງທີ່ມາ: ຂ່າວເສດຖະກິດ ການຄ້າ