ໂຮມຊຸມນຸມ ສະເຫລີມສະຫລອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ

ໂຮມຊຸມນຸມ ສະເຫລີມສະຫລອງວັນສ້າງຕັ້ງແນວລາວສ້າງຊາດ ຄົບຮອບ 70 ປີ

August 13, 2020 0 By admin

Lao National Radio,ພິທີໂຮມຊຸມນຸມສະເຫລີມສະຫລອງວັນສ້າງຕັ້ງແນວລາວສ້າງຊາດ, ວັນທີ 13 ສິງຫາ ຄົບຮອບ 70 ປີ ຈັດຂຶ້ນໃນວັນທີ 13 ສິງຫາ 2020 ທີ່ຫໍປະຊຸມແຫ່ງຊາດ, ນະຄອນ ຫລວງວຽງຈັນ. ໂດຍມີ ທ່ານ ບຸນຍັງ ວໍລະຈິດ, ເລຂາທິ ການໃຫຍ່ຄະນະບໍລິຫານງານສູນກາງພັກ, ປະທານປະ ເທດ, ພ້ອມດ້ວຍການນໍາພັກ-ລັດ, ຜູ້ແທນແນວລາວສ້າງຊາດ, ພະນັກງານປະຕິວັດອາວຸໂສ ແລະ ແຂກຮັບເຊີນເຂົ້າ ຮ່ວມ.

ໃນພິທີ ທ່ານ ໄຊສົມພອນ ພົມວິຫານ, ກໍາມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ໄດ້ຂຶ້ນມີຄໍາເຫັນລາຍງານຫຍໍ້ມູນເຊື້ອ, ການກະກຽມຈັດຕັ້ງສະເຫຼີມສະຫຼອງວັນສ້າງຕັ້ງແນວລາສ້າງຊາດ ຄົບ ຮອບ 70 ປີ ແລະ ຜົນງານພົ້ນເດັ່ນຂອງແນວລາວສ້າງຊາດຕະຫລອດໄລຍະ 70 ປີ ຜ່ານມາ. ໃນນີ້ ສະເພາະຜົນງານພົ້ນເດັ່ນຂອງແນວລາວສ້າງຊາດຕະຫຼອດໄລຍະກວ່າເຄິ່ງສະຕະວັດມານີ້ສາມາດຖອດໄດ້ມູນເຊື້ອອັນໃຫຍ່ຫຼວງຫລາຍດ້ານ ເປັນຕົ້ນ: ແນວລາວສ້າງຊາດມີຄວາມສາມາດເຕົ້າໂຮມຄວາມສາມັກຄີປະຊາຊົນບັນດາເຜົ່າ, ຊັ້ນຄົນ, ທຸກສາຂາອາຊີບ, ຜູ້ຊົງຄຸນວຸດທິ,ນັກບວດແລະເຈົ້າກົກເຈົ້າເຫຼົ່າບົນພື້ນຖານພັນທະພາບກໍາມະກອນ, ກະສິກອນ, ປັນຍາຊົນປະ ຕິວັດ, ຊັ້ນຄົນທີ່ຮັກຊາດຢູ່ພາຍໃຕ້ການນໍາພາຂອງພັກ.

ແນວລາວສ້າງຊາດຍາມໃດຮູ້ຈັກສຶກສາອົບຮົມການເມືອງແນວຄິດປະຊາຊົນ, ປຸກລະດົມນໍ້າໃຈຮັກຊາດ, ຮັກປະຊາຊົນ, ຄຽດແຄ້ນສັດຕູລຸກຂຶ້ນຕໍ່ສູ້, ໃກ້ຊິດຕິດແທດ, ປຶກສາຫາລືກັບປະຊາຊົນໃນການຫັນປ່ຽນໄປສູ່ຈິນຕະນາການໃໝ່, ປະຕິບັດແນວທາງປ່ຽນແປງໃໝ່ທີ່ພັກວາງອອກ,ເປັນຜູ້ໄກ່ເກ່ຍຄວາມຂັດແຍ່ງຂອງປະຊາ ຊົນຢູ່ຮາກຖານ, ເດັດດ່ຽວໜຽວແໜ້ນປະກອບສ່ວນເຂົ້າໃນການຮັກສາສະຖຽນລະພາບແລະຄວາມເປັນລະບຽບຮຽບຮ້ອຍໂດຍພື້ນຖານ.

ແນວລາວສ້າງຊາດຍາມໃດກໍຈົງຮັກພັກດີຕໍ່ພັກ, ຕັ້ງໜ້າປະຕິບັດຍຸດທະສາດ, ຍຸດໂທບາຍແລະວິທີປະຕິວັດທີ່ພັກຊີ້ນໍາ, ມີຄວາມອົດທົນເດັດດ່ຽວໜຽວແໜ້ນ, ຜ່ານຜ່າອຸປະສັກນານາປະການ, ຍອມເສຍສະຫຼະເພື່ອໄຊຊະນະຂອງການປະຕິວັດ; ແນວລາວສ້າງຊາດມີມູນເຊື້ອຮ່ວມສໍາພັນທາງດ້ານການເມືອງແລະການທະຫານກັບກໍາລັງທີ່ຮັກຊາດແລະກ້າວໜ້າເປັນຕົ້ນຮ່ວມສໍາພັນກັບກໍາລັງເປັນກາງທີ່ຮັກຊາດໃນສະໄໝສົງ ຄາມ, ຮ່ວມສໍາພັນກັບພັກສັນຕິພາບເປັນກາງ, ຍາດແຍ່ງດຶງດູດຜູ້ຊົງຄຸນວຸດທິ, ຫົວໜ້າເຈົ້າກົກເຈົ້າເຫຼົ່າ, ຊັ້ນຄົນ, ປັນຍາຊົນມາເຂົ້າຮ່ວມດໍາເນີນການປະຕິວັດ; ແນວລາວສ້າງຊາດຍາມໃດກໍຕັ້ງໜ້າເປັນແບບຢ່າງ, ປຸກລະດົມປະຊາ ຊົນລາວບັນດາເຜົ່າອະນຸລັກຮັກສາເອກະລັກວັດທະນະທໍາທີ່ດີງາມຂອງຊາດ-ຂອງເຜົ່າ, ຮັກສາຊີວິດສັງຄົມວັດທະນະທໍາທີ່ສົດໃສ, ປະ ກອບສ່ວນຢ່າງຕັ້ງໜ້າຈໍາກັດສິ່ງຫຍໍ້ທໍ້ໃນສັງຄົມເປັນຕົ້ນຕ້ານອາດຍາສິດ, ຕ້ານການສໍ້ລາດບັງຫຼວງ, ຟຸ່ມເຟືອຍ, ການລ່ວງລະເມີດກົດໝາຍແລະສິດເປັນເຈົ້າອັນຊອບທໍາຂອງປະຊາຊົນ ແລະ ອື່ນຯ.

ພາຍຫລັງປະທານສູນກາງແນວລາວສ້າງຊາດຂຶ້ນມີຄໍາເຫັນລາຍງານສໍາເລັດ, ໃນພິທີໄດ້ຮັບຟັງການປະກອບຄໍາເຫັນຈາກຕາງໜ້າຜູ້ຊົງຄຸນວຸດທິຈໍານວນໜຶ່ງທ່ານ ຈາກນັ້ນໄດ້ມີພິທີປະດັບຫລຽນຄໍາແຫ່ງຊາດໃຫ້ແກ່ອົງການແນວລາວສ້າງຊາດ, ປະດັບຫລຽນໄຊອິດສະຫລະຊັ້ນ I ໃຫ້ ທ່ານ ໄຊສົມພອນ ພົມວິຫານ, ປະທານສູນກາງແນວລາວສ້າງຊາດ ແລະ ປະດັບຫລຽນໄຊພັດທະນາຊັ້ນ I ໃຫ້ ທ່ານ ອ໋ອດ ພົງສະຫວັນ ນັກທຸລະກິດດີເດັ່ນ ໂດຍການໃຫ້ກຽດປະດັບຫລຽນຂອງ ທ່ານ ບຸນຍັງ ວໍລະຈິດ, ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ.

ຫລັງຈາກນັ້ນ ທ່ານ ບຸນຍັງ ວໍລະຈິດ ໄດ້ຂຶ້ນກ່າວສູນ ທອນພົດຕໍ່ງານໂຮມຊຸມນຸມຄັ້ງນີ້ ເຊີ່ງກ່ອນອື່ນທ່ານໄດ້ຫວນຄືນໂດຍຫຍໍ້ກ່ຽວກັບຄວາມເປັນມາຂອງຊາດລາວ ກໍຄື ຄວາມເປັນມາ ແລະ ພາລະກໍາປະຫວັດສາດພົ້ນເດັ່ນຂອງອົງການແນວລາວສ້າງຊາດ ເຊີ່ງສູນກາງພັກ ແລະ ລັດແຫ່ງ ສປປລາວ ມີຄວາມປິຕິຊົມຊື່ນຍິນດີ ແລະ ຕີລາຄາສູງທີ່ເຫັນວ່າໃນຕະຫຼອດໄລຍະ 70 ປີ ທີ່ຜ່ານມາ ອົງການແນວລາວສ້າງຊາດຂັ້ນຕ່າງໆໃນທົ່ວປະເທດໄດ້ຮັບການປັບປຸງບູລະນະ ແລະ ເຕີບໃຫຍ່ເຂັ້ມແຂງ ນັບທັງດ້ານປະ ລິມານ ແລະ ຄຸນນະພາບ; ໄດ້ປະກອບສ່ວນຢ່າງສຳຄັນ, ໃຫຍ່ຫຼວງເຂົ້າໃນພາລະກິດ ແຫ່ງການຕໍ່ສູ້ກູ້ຊາດໃນເມື່ອກ່ອນ ກໍຄືໃນພາລະກິດແຫ່ງການປົກປັກຮັກສາ ແລະ ພັດ ທະນາສ້າງສາປະເທດຊາດໃນໄລຍະໃໝ່.

ໃນໂອກາດນີ້ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຍັງໄດ້ເນັ້ນໜັກໃຫ້ແນວລາວສ້າງຊາດຂັ້ນຕ່າງໆ ໃນທົ່ວປະເທດ ຈົ່ງສືບຕໍ່ເສີມຂະ ຫຍາຍມູນເຊື້ອອັນສະຫງ່າງາມໃນຕະຫຼອດໄລຍະ 70 ປີທີ່ຜ່ານມາ, ອອກແຮງເຄື່ອນໄຫວຢ່າງຫ້າວຫັນຕາມພາລະບົດບາດ ແລະ ໜ້າທີ່ການເມືອງທີ່ພັກມອບໝາຍໃຫ້ ໂດຍສຸມໃສ່ຫລາຍວຽກງານສໍາຄັນໃນຕໍ່ໜ້າ ເປັນຕົ້ນ: ເອົາໃຈໃສ່ຍົກສູງຄັນທຸງເຕົ້າໂຮມຄວາມສາມັກຄີທົ່ວປວງຊົນ ບົນພື້ນຖານພັນຕະພາບ, ກຳມະ ກອນ-ຊາວກະສິກອນ ແລະ ນັກຮຽນຮູ້ປັນຍາຊົນປະຕິວັດທີ່ເປັນຫຼັກແຫຼ່ງພາຍໃຕ້ການນຳພາຂອງພັກ, ພ້ອມທັງສຶກສາອົບຮົມເຂົາເຈົ້າໃຫ້ມີຄວາມຮັບຮູ້ເຂົ້າໃຈ ຢ່າງຖືກຕ້ອງບັນດາແນວທາງນະໂຍບາຍ ແລະ ລະບຽບກົດໝາຍຂອງລັດ.

ສືບຕໍ່ຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢ່າງເຄັ່ງຄັດຕາມມາດຕະການທີ່ລັດຖະບານວາງອອກໃນແຕ່ລະໄລ ຍະ, ຕັ້ງໜ້າປະຕິບັດສິດສະເໝີພາບ ແລະ ສ້າງຄວາມປອງດອງລະຫວ່າງເຜົ່າ ແລະ ຊັ້ນຄົນຕ່າງໆ, ກຳຈັດແກ້ໄຂທຸກປະກົດການ ແລະ ການກະທຳທີ່ຈະກໍ່ໃຫ້ເກີດຄວາມຂັດແຍ່ງ, ຄວາມອາຄາດບາດໝາງກັນລະຫວ່າງເຜົ່າ, ສາສະ ໜາ ຫຼື ລະຫວ່າງຊັ້ນຄົນຕ່າງໆດ້ວຍການເພີ່ມທະວີຫັນລົງສູ່ຮາກຖານ ເພື່ອໂຄສະນາ, ສຶກສາອົບຮົມປວງຊົນໃຫ້ຮັບຮູ້ຢ່າງເລິກເຊິ່ງ ກ່ຽວກັບມູນເຊື້ອຄວາມສາມັກຄີຮັກແພງ, ຊ່ວຍເຫຼືອເພື່ອແຜ່ກັນ, ຢູ່ຮ່ວມກັນດ້ວຍຄວາມປອງ ດອງ ແລະ ພ້ອມພຽງກັນສ້າງສາພັດທະນາບ້ານຊ່ອງ ແລະ ປະເທດຊາດ.

ພ້ອມດຽວກັນນັ້ນ ຕ້ອງມີສະຕິລະວັງຕົວ ແລະ ສະດຸ້ງໄວຕໍ່ການເຄື່ອນໄຫວຂອງອິດທິກຳລັງປໍລະ ປັກທີ່ຫວັງມ້າງເພທຳລາຍຄວາມສາມັກຄີປອງດອງລະ ຫວ່າງເຜົ່າ ແລະ ລະ ຫວ່າງຊັ້ນຄົນຕ່າງໆ, ສະກັດກັ້ນການສວຍໃຊ້ບັນຫາຊົນເຜົ່າ, ສາສະໜາ ເພື່ອແບ່ງແຍກຄວາມສາມັກຄີ, ກໍ່ຄວາມວຸ່ນ ວາຍ ແລະ ຄວາມຫຍຸ້ງຍາກໃນການທຳມາຫາກິນ ຂອງປະຊາຊົນລາວບັນດາເຜົ່າໃນຂອບ ເຂດທົ່ວປະເທດ ແລະ ວຽກງານສໍາຄັນອື່ນຯ ຕື່ມອີກ.

ຂ່າວ: ບຸນຕຽງ ຈັນທະວົງ
ພາບ: ຄໍາກອງ ກິດຕິຄຸນ