ແຕ່ງຕັ້ງ ທ່ານ ແກ້ວຈະເລີນ ເຊ່ຍຢິ້ງຢ່າງ ເປັນປະທານອົງການກວດກາພັກ-ລັດ ແຂວງໄຊສົມບູນ ຄົນໃໝ່

ແຕ່ງຕັ້ງ ທ່ານ ແກ້ວຈະເລີນ ເຊ່ຍຢິ້ງຢ່າງ ເປັນປະທານອົງການກວດກາພັກ-ລັດ ແຂວງໄຊສົມບູນ ຄົນໃໝ່

August 13, 2020 0 By admin

Media Laos, ພິທີມອບ-ຮັບ ໜ້າທີ່ ລະຫວ່າງ ປະທານຄະນະກວດກາພັກ, ອົງການກວດກາລັດ #ແຂວງໄຊສົມບູນ ຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນຕອນເຊົ້າຂອງວັນທີ 12 ສິງຫາ ນີ້ ທີ່ຫ້ອງປະຊຸມຫ້ອງວ່າການແຂວງ ເປັນກຽດເຂົາຮ່ວມຂອງທ່ານ ພົຕ ຄຳລຽງ ອຸທະໄກສອນ ເລຂາພັກແຂວງ, ເຈົ້າແຂວງໄຊສົມບູນ, ມີບັນດາພະແນກການອ້ອມຂ້າງແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.


ໂອກາດ ນີ້ ທ່ານ ບຸນຜອງ ຄຳມະນີວົງ ຮອງປະທານກວດພັກ-ລັດ ແຂວງໄຊສົມບູນ ໄດ້ຜ່ານມະຕິຂອງຄະນະເລຂາທິການສູນກາງພັກ ວ່າດ້ວຍການອະນຸມັດໃຫ້ພະນັກງານອອກພັກການ-ຮັບອຸດໜູນບຳນານ ຊຶ່ງໄດ້ຕົກລົງໃຫ້ທ່ານ ບຸນຜັນ ພົມມະຈັນ ກຳມະການປະຈຳພັກແຂວງ, ປະທານກວດກາພັກ-ລັດ ແຂວງ ອອກພັກການ-ຮັບອຸດໜູນບຳນານ ແລະ ຜ່ານມະຕິຕົກລົງວ່າດ້ວຍການແຕ່ງຕັ້ງພະນັກງານດຳລົງຕ່ຳແໜ່ງບໍລິຫານ ໄດ້ແຕ່ງຕັ້ງ ທ່ານ ແກ້ວຈະເລີນ ເຊ່ຍຢິ້ງຢ່າງ ຮອງປະທານອົງການກວດກາພັກແຂວງ ຂຶ້ນເປັນປະທານອົງການກວດກາພັກ-ລັດ ແຂວງໄຊສົມບູນ.

ຈາກນັ້ນ ທ່ານ ບຸນຜັນ ພົມມະຈັນ ກຳມະການປະຈຳພັກແຂວງ, ປະທານກວດກາພັກ-ລັດ ແຂວງ ຜູ້ເກົ່າ ໄດ້ຜ່ານບົດບັນທຶກກ່າວມອບຮັບໜ້າທີ່ ຊຶ່ງທ່ານໄດ້ຍົກໃຫ້ເຫັນການເຄື່ອນໄຫວຈັດຕັ້ງປະຕິບັດວຽກງານໂດຍຫຍໍ້ ທີ່ທ່ານດຳລົງຕຳແໜ່ງ ຊຶ່ງຕະຫລອດໄລຍະຜ່ານມາ ໄດ້ເອົາໃຈໃສ່ຊີ້ນຳ-ນຳພາ ຄະນະພັກ, ສະມາຊິກພັກ, ພະນັກງານ-ລັດຖະກອນ ໃນການຈັດຕັ້ງປະຕິບັດວຽກງານຕ່າງໆ ໂດຍສະເພາະແມ່ນການສະກັດກັ້ນຕ້ານການສໍ້ລາດບັງຫລວງ ແລະ ຄົ້ນຄ້ວາແກ້ໄຂຄຳຮ້ອງສະເໜີສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ຊຶ່ງມີຜົນສຳເລັດຫລາຍດ້ານ.

ໃນໂອກກາດດຽວກັນ ທ່ານ ແກ້ວຈະເລີນ ເຊ່ຍຢິ້ງຢ່າງ ປະທານອົງການກວດກາພັກ-ລັດແຂວງ ຜູ້ໃໝ່ ກໍໄດ້ກ່າວຮັບໜ້າທີ່ ເພື່ອສືບຕໍ່ເຮັດສຳເລັດໜ້າທີ່ ທີ່ໄດ້ມອບໝາຍໃຫ້ ໃນພິທີ ໄດ້ມີການເຊັນບົດບັນທຶກກ່າວມອບໜ້າທີ່ ລະຫວ່າງ ທ່ານ ບຸນຜັນ ພົມມະຈັນ ກຳມະການປະຈຳພັກແຂວງ, ປະທານກວດກາພັກ-ລັດ ແຂວງ ຜູ້ເກົ່າ ແລະ ທ່ານ ແກ້ວຈະເລີນ ເຊ່ຍຢິ້ງຢ່າງ ປະທານອົງການກວດກາພັກ-ລັດແຂວງ ຜູ້ໃໝ່ ຢ່າງເປັນທາງການ ໂດຍຊ່ອງໜ້າທ່ານເຈົ້າແຂວງ ພາກສ່ວນທີ່ກ່ຽວຂ້ອງ ເຂົ້າຮ່ວມ ເປັນສັກຂີພີຍານ.


ໃນໂອກາດທີ່ມີຄວາມໝາຍຄວາມສຳຄັນນີ້ ທ່ານ ພົຕ ຄຳລຽງ ອຸທະໄກສອນ ຍັງໄດ້ມີຄຳເຫັນໂອ້ລົມ ຊຶ່ງທ່ານໄດ້ຍົກໃຫ້ເຫັນເຖິງ ໜ້າທີ່ການເມືອງຂອງພະນັກງານ-ລັດຖະກອນ ທີຕ້ອງໄປຕາມການເວລາ ກະສຽນອາຍຸ ຊຶ່ງເປັນກົດເກນຂອງພະນັກງານ ທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດ ທີ່ທ່ານປະກວດກາພັກ-ລັດແຂວງ ຜູ້ເກົ່າ ຍາດມາໄດ້ ໃນໄລຍະຜ່ານມາ ແລະ ໄດ້ຮຽກຮ້ອງໃຫ້ປະທານກວດກາພັກ-ລັດ ແຂວງ ຜູ້ໃໝ່ ຈົ່ງສືບຕໍ່ຊີ້ນຳ-ນຳພາວຽກງານ ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ແກ່ສະມາຊິກພັກ-ພະນັກງານ ພ້ອມທັງ ຈັດຕັ້ງປະຕິບັດວຽກງານຕິດຕາມກວດກາພາຍໃນພັກ, ການຄຸ້ມຄອງບໍລິຫານລັດ ສະກັດກັ້ນ ຕ້ານການສໍ້ລາດບັງຫລວງ ແລະ ການແກ້ໄຂຄຳຮ້ອງ-ຄຳສະເໜີ ແລະ ວຽກງານຕ່າງໆ ໃຫ້ບັນລຸຕາມຄາດໝາຍທີ່ວາງໄວ້.