ເຈົ້າແຂວງສະຫວັນນະເຂດ ລົງຕິດຕາມຄວາມຄືບໜ້າໂຄງການລຶບລ້າງຄວາມທຸກຍາກ ໂຄງການຮ່ວມໃຈ ສາຍໃຍໂລມາຄຳ ຢູ່ເມືອງນອງ

ເຈົ້າແຂວງສະຫວັນນະເຂດ ລົງຕິດຕາມຄວາມຄືບໜ້າໂຄງການລຶບລ້າງຄວາມທຸກຍາກ ໂຄງການຮ່ວມໃຈ ສາຍໃຍໂລມາຄຳ ຢູ່ເມືອງນອງ

June 19, 2020 0 By admin

ວິທະຍຸກະຈາຍສຽງ ສະຫວັນນະເຂດ, ໃນວັນທີ 17 ມິຖຸນາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຫົວໜ້າພະແນກການອ້ອມຂ້າງແຂວງ ແລະ ພາກສ່ວນທຸລະກິດໄດ້ລົງຕິດຕາມເບິ່ງຄວາມຄືບໜ້າ ວຽກງານລຶບລ້າງຄວາມທຸກຍາກ ເຂດຈຸດສຸມຕັງອາໄລ ເມືອງນອງ ເພື່ອເປັນການປະເມີນການຈັດຕັ້ງປະຕິບັດການພັດທະນາໂຄງການຮ່ວມໃຈສາຍໃຍໂລມາຄຳ,ໃນນັ້ນ ກໍ່ໄດ້ໄປຢ້ຽມຢາມເບິ່ງຄອບຄົວເປົ້າໝາຍ ແລະ ນອກເປົ້າໝາຍ ທີ່ມີການປູກພືດຜັກຕ່າງໆ ແລະ ການລ້ຽງສັດ ທີ່ຂຶ້ນກັບໂຄງການ, ເບິ່ງການຕ່ຳຫູກແຜ່ນແພ ຂອງບ້ານຕະຢົງ ເຊິ່ງມີທັງໝົດ 16 ຄອບຄົວ ແລະ ກຳລັງມີການຂະຫຍາຍຕື່ມອີກ 5 ຄອບຄົວ ພ້ອມນັ້ນກໍໄດ້ມອບຝ້າຍໃຫ້ແກ່ປະຊາຊົນກຸ່ມຕ່ຳຫູກ ຈຳນວນ 8 ຖົງ.


ທ່ານ ເກຍ ອູ໊ສິດທິເດດ ເຈົ້າຂອງໂຮງງານນໍ້າດື່ມໂລມາຄໍາ ຜູ້ປະກອບສ່ວນທຶນໃນການຊ່ວຍເຫຼືອການມີສ່ວນຮ່ວມລຶບລ້າງຄວາມທຸກຍາກຂອງປະຊາຊົນ ຢູ່ບ້ານຕະຢົງ ແລະ ບ້ານ ປ່າແນະ ເຂດຈຸດສຸມຕັງອາໄລ ເມືອງນອງ ໄດ້ໃຫ້ຮູ້ວ່າ: ໂຄງການຮ່ວມໃຈສາຍໃຍໂລມາຄໍາແມ່ນເປັນການຮ່ວມມືຂອງ 2 ຝ່າຍຄື: ສະຖາບັນການເງິນຈະລຸພາກທີ່ຮັບຝາກສາຍໃຍສໍາພັນ ແລະໂຮງງານນໍ້າດື່ມໂລມາຄໍາ ໂດຍມີຈຸດປະສົງເພື່ອຊ່ວຍເຫຼືອ, ສ້າງທ່າແຮງ ແລະເງື່ອນໄຂໃນພັດທະນາຕົນເອງ ເພື່ອການລຶບລ້າງຄວາມທຸກຍາກໃຫ້ປະຊາຊົນ ເຊິ່ງໂຄງການນີ້ເລີ່ມແຕ່ວັນທີ 1ມັງກອນ 2020 ຈະດໍາເນີນໄປຈົນເຖິງວັນທີ 31 ທັນວາ 2020 ເປັນໄລຍະເວລາ 1 ປີເຕັມ, ໃນເບື້ອງຕົ້ນຄາດວ່າຈະໃຊ້ງົບປະມານ 1 ຕື້ 500 ລ້ານກີບ.

ມາຮອດປະຈຸບັນ ໂຄງການຮ່ວມໃຈສາຍໃຍໂລມາຄຳ ກໍໄດ້ສະໜອງເຄື່ອງມືຮັບໃຊ້ໃນການຜະລິດເຊັ່ນ: ພ້າ, ຊ້ວນ, ສຽມ, ຈົກ, ຄາດ ແລະ ອື່ນໆ; ສະໜອງແນວພັນປະເພດຕ່າງໆ ເຊັ່ນ: ແນວພືດຜັກ, ແຂມ, ໜໍ່ກ້ວຍ, ເບ້ຍໝາກຮຸ່ງ, ຫວາຍ, ໝາກເຜັດ, ໝາກເຂືອ, ໝາກເນ, ເຂົ້າກ່ຳ,ຂີງ ຂ່າ, ມັນຕົ້ນ, ສາລີ ແລະອື່ນໆ; ສົ່ງເສີມຫັດຖະກຳຕ່ຳຫູກໃຫ້ປະຊາຊົນສອງບ້ານ ມີ 44 ຄອບຄົວ, ກໍ່ສ້າງພື້ນຖານໂຄງລ່າງຄື: ສ້າງບາດານຈຳນວນ 10 ບໍ່ ໃຫ້ 5 ບ້ານໃນ ແລະ ນອກເປົ້າໝາຍ, ສ້າງຝາຍເກັບນ້ຳບ້ານປ່າແນະ ແລະ ບ້ານຕາຢົງ, ໜອງສະໃຫຍ່ລວມ ບ້ານຕາຢົງ ແລະ ດິນຖົມຂຸມໃຫ້ໂຮງຮຽນບ້ານຕາຢົງ ພ້ອມທັງຄ່າບໍລິຫານຕ່າງໆ ລວມເປັນມູນຄ່າທັງໝົດ ໜຶ່ງຕື້ 900 ລ້ານກ່ວາກີບ.

ນອກນັ້ນ ທາງໂຄງການກໍຍັງໄດ້ສະໜອງແນວພັນປະເພດຕ່າງໆ ໃຫ້ຄອບຄົວນອກເປົ້າໝາຍ ແລະ ບ້ານນອກເປົ້າໝາຍ ທີ່ມີຄວາມຕ້ອງການຢາກປູກໃສ່ຕາມເນື້ອທີ່ໄຮ່ ເນື້ອທີ່ສວນຂອງຕົນຕື່ມອີກ. ປະຈຸບັນ ຜົນລະປູກຂອງປະຊາຊົນກຳລັງຂຽວງາມ ບາງພືດຜັກ ກໍສາມາດເກັບກິນຜົນລະປູກແລ້ວ. ເຊິ່ງການຢ້ຽມຢາມຄັ້ງນີ້ ກໍໄດ້ໄປເບິ່ງເນື້ອທີ່ສວນຂອງຄອບຄົວເປົ້າໝາຍ ແລະ ນອກເປົ້າໝາຍ ທີ່ມີເນື້ອທີ່ໜ້ອຍ ແລະ ມີເນື້ອທີ່ຫຼາຍ ໃນການປູູກພືດຜັກຕ່າງໆ, ເຊິ່ງບາງຄອບຄົວກໍວ່າມີແຮງງານບໍ່ພຽງພໍ ຈຶ່ງເຮັດໃຫ້ການປູກຝັງໄດ້ໜ້ອຍ.


ຈາກນັ້ນທ່ານ ສັນຕິພາບ ພົມວິຫານ ກໍ່ໄດ້ໃຫ້ທິດຊີ້ນໍາຕໍ່ການນໍາຂອງເມືອງໃນວຽກງານໂຄງການສາຍໃຍໂລມາຄຳ ໂດຍທ່ານເນັ້ນໝັກໃຫ້ພາກສ່ວນທີ່ກ່ຽວຂ້ອງ ຕ້ອງມີຄວາມເຂົ້າໃຈຢ່າງເລິກເຊິ່ງ ມີການປະສານສົມທົບ ປຶກສາຫາລືກັບຜູ້ໃຫ້ທຶນຢ່າງກົງໄປກົງມາ ເພື່ອພ້ອມກັນແກ້ໄຂຂໍ້ຄົງຄ້າງ ຈຸດອ່ອນຕ່າງໆ ໃຫ້ດີຂຶ້ນ, ຮ່ວມກັນເອົາໃຈໃສ່ຊຸກຍູ້ກິດຈະກຳຂອງໂຄງການຢ່າງຕໍ່ເນື່ອງ ມີຄວາມກະຕືລືລົ້ນໃນການມີສ່ວນຮ່ວມໂຄງການພັດທະນາ ທັງນີ້ກໍເພື່ອນຳພາປະຊາຊົນມີຢູ່ມີກິນ ແລະ ນຳພາປະຊາຊົນຫຼຸດພົ້ນອອກຈາກຄວາມທຸກຍາກ.

ໃນໂອກາດດຽວກັນນີ້ ທ່ານເຈົ້າແຂວງພ້ອມຄະນະ ກໍ່ໄດ້ພ້ອມກັນປ່ອຍປາລົງໜອງລວມຂອງບ້ານຕະຢົງ.