ເມືອງໄຊພູທອງ ສ້າງຂະບວນການອອກແຮງງານລວມ ສ້າງຮົ້ວກັນນໍ້າເຊາະເຈື່ອນຫົວຂົວຫ້ວຍໂດນ

ເມືອງໄຊພູທອງ ສ້າງຂະບວນການອອກແຮງງານລວມ ສ້າງຮົ້ວກັນນໍ້າເຊາະເຈື່ອນຫົວຂົວຫ້ວຍໂດນ

August 10, 2020 0 By admin

ວັນທີ 7 ສິງຫາ ນີ້, ຄະນະພັກ-ຄະນະນໍາຂອງເມືອງໄຊພູທອງນໍາໂດຍ ທ່ານ ຫ່ວນ ຮັງບົວສອນ ຮອງເລຂາພັກເມືອງ ຜູ້ຊີ້ນໍາວຽກງານການເມືອງ-ແນວຄິດພັກ-ພະນັກງານຂອງເມືອງ, ພ້ອມດ້ວຍປະຊາຊົນ ກຸ່ມບ້ານທີ 3 ໄດ້ພ້ອມກັນອອກແຮງງານລວມສ້າງຮົ້ວກັນນໍ້າເຊາະເຈື່ອນຫົວຂົວຫ້ວຍໂດນ ບ້ານ ພູມມະເຈດີ ຫາ ບ້ານໂພນທາດ ມີຄວາມຍາວ 50 ແມັດ.

ເຂົ້າຮ່ວມໃນການອອກແຮງງານຄັ້ງນີ້, ປະກອບມີ 4 ບ້ານຄື: ບ້ານ ພູມມະເຈດີ,ບ້ານ ໂພນທາດ, ບ້ານ ນາໝາກເກຶອ ແລະ ບ້ານໂພນສົ້ມໂຮງ, ມີອ້າຍນ້ອງທະຫານ 325 ແລະ ພະນັກງານອອ້ມຂ້າງເມືອງ ເຂົ້າຮ່ວມ ຈໍານວນ 150 ກວ່າຄົນ.


ທ່ານ ສີທາ ມາໄລທອງ ກໍາມະການພັກເມືອງ ຜູ້ຊີ້ນໍາກຸ່ມບ້ານທີ 3 ຂອງເມືອງ ໄດ້ໃຫ້ສໍາພາດວ່າ: ສໍາລັບໜ້າວຽກຫຼັກຂອງການອອກແຮງງານແມ່ນໄດ້ສາມັກຄີກັນສັກຫຼັກສ້າງຮົ້ວກັນນໍ້າເຊາະເຈື່ອນຕະຝັ່ງຫົວຂົວຫ້ວຍໂດນ ເຊິ່ງມີຄວາມຍາວຂອງຮົ້ວກັນນໍ້າ 50 ແມັດ, ທັງນີ້ກໍ່ເພື່ອຮັບປະກັນບໍ່ໃຫ້ຕະຝັ່ງຫົວຂົວຫ້ວຍໂດນເຊາະເຈື່ອນໃນເວລາຝົນຕົກນໍ້າໄຫຼແຮງ, ພ້ອມນັ້ນກໍ່ເພື່ອເປັນການສ້າງຄວາມສາມັກຄີຂອງຄະນະພັກ-ຄະນະນໍາຂອງເມືອງໄຊພູທອງ ແລະ ຊາຊົນພາຍໃນກຸ່ມບ້ານທີ 3 ພ້ອມດ້ວຍພະນັກງານຫຼັກແຫຼ່ງພາຍໃນເມືອງ.

ການອອກແຮງງານກໍ່ເພື່ອເປັນການສ້າງຂະບວນການຂໍານັບຮັບຕ້ອນໃຫ້ແກ່ ວັນສໍາຄັນຂອງພັກ-ຂອງຊາດ ໂດຍສະເພາະກໍ່ຄື ກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ ສະຫວນນະເຂດ ໃຫ້ເຕັມໄປ ດ້ວຍ ຝົນງານອັນຍິ່ງໃຫຍ່ ແລະ ໄດ້ຮັບຜົນສໍາເລັດ ຢ່າງຈົບງາມ, ໄປຄຽງຄູ່ກັບການສ້າງສາ ແລະ ພັດທະນາພື້ນຖານໂຄງລ່າງ ຂອງວຽກງານພັດທະນາຊົນນະບົດໃຫ້ມີຄວາມເຂັ້ມແຂງເພື່ອຈະເຮັດໃຫ້ເມືອງໄຊພູທອງກາຍເປັນເມືອງພັດທະນາຮອບດ້ານ ແລະ ສ້າງບ້າງບ້ານໃຫຍ່ຄ້າຍຄືຕົວເມືອງນ້ອຍໃນຊົນນະບົດ.

ສະນັ້ນ ທຸກພາກສ່ວນ ຕ້ອງໄດ້ເຂົ້າຮ່ວມໃນຂະບວນການຕ່າງໆຂອງເມືອງ ເປັນຕົ້ນວຽກງານການສ້າງສາເສັ້ນທາງຄົມມະນາຄົມພາຍໃນເມືອງ ໃຫ້ມີຄວາມສະດວກສະບາຍໃນການສັນຈອນໄປມາຄ້າຂາຍແລກປ່ຽນສິນຄ້າຂອງພໍ່ແມ່ປະຊາຊົນໃນເຂດກຸ່ມບ້ານດັ່ງກ່າວ ໃຫສະດວກ ແລະ ວ່ອງໄວຂື້ນ. ອີກຢ່າງໜຶ່ງ ກໍ່ເພື່ອຮັບປະກັນບໍໃຫ້ສົ້ນຫົວຂົວຫ້ວຍໂດນເຊາະເຈື່ອນທີ່ຈະສ້າງຄວາມເສຍຫາຍ ແລະ ເປ້ເພໃນຕໍ່ໜ້າ.