ເຈົ້າແຂວງສະຫວັນະເຂດ ຢ້ຽມຢາມເບິ່ງການສ້ອມແປງຄອງຊົນລະປະທານເຊສາລາລອງ ເພື່ອໃຫ້ທ່ວງທັນກັບການສະໜອງນ້ຳໃຫ້ແກ່ການຜະລິດ

ເຈົ້າແຂວງສະຫວັນະເຂດ ຢ້ຽມຢາມເບິ່ງການສ້ອມແປງຄອງຊົນລະປະທານເຊສາລາລອງ ເພື່ອໃຫ້ທ່ວງທັນກັບການສະໜອງນ້ຳໃຫ້ແກ່ການຜະລິດ

August 10, 2020 0 By admin

Media Laos, ຕອນເຊົ້າວັນທີ 7 ສິງຫາ 2020 ທ່ານ ສັນຕິພາບ ພົມວິຫານ ເຈົ້າແຂວງສະຫວັນະເຂດ ພ້ອມການນຳພະແນກການທີ່ກ່ຽວຂ້ອງ ໄດ້ໄປຢ້ຽມຢາມເບິ່ງການຜະລິດຂອງປະຊາຊົນເມືອງທ່າປາງທອງ ສະເພາະກໍແມ່ນຢ້ຽມຢາມເບິ່ງການສ້ອມແປງຄອງຊົນລະປະທານເຊສາລາລັອງ ທີ່ມີການເປ່ເພ ເພື່ອໃຫ້ສຳເລັດຕາມແຜນ ແລະ ທ່ວງທັນກັບການສະໜອງນ້ຳໃຫ້ແກ່ການຜະລິດ ກະກຽມຕ້ານແລ້ງຕ້ານຖ້ວມໃນລະດູການນີ້.


ທ່ານ ຄຳປະສົງ ຂົງຄຳ ເຈົ້າເມືອງທ່າປາງທອງ ລາຍງານໃຫ້ຮູ້ວ່າ: ສະເພາະການສ້ອມແປງຄອງຊົນລະປະທານເຊສາລາລັອງ ມີ 3 ຈຸດ ຍາວ 900 ແມັດ ແລະ ການວາງທໍ່ເພື່ອເອົານ້ຳເຂົ້າສູນເຕັກນິກ ຍາວ 1.100 ແມັດ ແມ່ນບໍລິສັດວັນວິໄລກໍ່ສ້າງ ແລະ ສ້ອມແປງຊົນລະປະທານ ຈຳກັດ ໃນມູນຄ່າ 4 ຕື້ 80 ລ້ານກີບ ໂດຍແມ່ນເງິນຮ່ວງງົບປະມານສ້ອມແປງສຸກເສີນໄພພິບັດ 2019, ການສ້ອມແປງແມ່ນໄດ້ເລີ່ມໃນເດືອນພະຈິກ 2019 ຮອດເດືອນຕຸລາ 2020 ໃຫ້ສຳເລັດ ເຊິ່ງປະຈຸບັນສາມາດປະຕິບັດໄດ້ແລ້ວ 50%.

ສະພາບການຜະລິດເຂົ້ານາປີໃນທົ່ວເມືອງທ່າປາງທອງ ມາຮອດປະຈຸບັນສາມາດປັກດຳໄດ້ 73% ຂອງເນື້ອທີ່ 9.300 ກ່ວາເຮັກຕາ, ໃນເບື້ອງຕົ້ນການຕົກກ້າປະຕິບັດໄດ້ 100% ແຕ່ເກີດມີສະພາບແຫ້ງແລ້ງ ຝົນຕົກບໍ່ຖືກຕ້ອງຕາມລະດູການ ເຮັດໃຫ້ກ້າຂອງປະຊາຊົນທີ່ຕົກແລ້ວຖືກເສຍຫາຍ ຕາຍ ແລະ ເປັນບັ້ງ ເຖິງ 20% ສະເພາະແມ່ນເຂດກຸ່ມເຊປັອງ, ກະທອງເໜືອ, ກະທອງໃຕ້, ທ່າພີ່ ແລະ ເຊກື-ພູມມະລີ, ນອກນັ້ນປະຊາຊົນກໍໄດ້ປູກພືດລະດູຝົນ ເຊັ່ນ: ໝາກແຕງ, ມັນດ້າງ, ໝາກຖົ່ວ, ສາລີ, ໝາກເຂືອ, ໝາກເຜັດ ແລະ ພືດຜັກຕ່າງໆ ໄດ້ 539 ເຮັກຕາ.


ໂອກາດນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນະເຂດ ກໍໄດ້ສະແດງຄວາມເປັນຫ່ວງຕໍ່ສະພາບການຜະລິດຂອງປະຊາຊົນໃນປີນີ້, ການນຳເມືອງຕ້ອງໄດ້ເອົາໃຈໃສ່ຕໍ່ປັດໃຈຕ່າງໆ ເພື່ອກະກຽມຕ້ານແລ້ງຕ້ານຖ້ວມ, ຕໍ່ກັບບັນຫາການແຫ້ງແລ້ງເມືອງກໍຕ້ອງກະກຽມແນວພັນຕ່າງໆ ບໍ່ວ່າເປັນແນວພັນເຂົ້າ ແນວພັນພືດ ເພື່ອສົ່ງເສີມປະຊາຊົນປູກທົດແທນເຂົ້າທີ່ເສຍຫາຍ, ພ້ອມນັ້ນກໍຕ້ອງລ້ຽງສັດໃຫ້ຫຼາຍ ເພື່ອແກ້ໄຂຊີວິດການເປັນຢູ່ ຂາຍແລກປ່ຽນສິນຄ້າ. ຊຸກຍູ້ສົ່ງເສີມແຮງງານທີ່ກັບມາຈາກປະເທດເພື່ອນບ້ານ ໃຫ້ເອົາໃຈໃສ່ຕໍ່ການຜະລິດກະສິກຳເປັນສິນຄ້າ ເພື່ອແກ້ໄຂຊີວິດການເປັນຢູ່ ກໍຄືການສ້າງວຽກເຮັດງານທຳໃຫ້ເຂົາເຈົ້າ.

ຕໍ່ກັບການສ້ອມແປງຄອງຊົນລະປະທານເຊສາລາລັອງ ກໍຕ້ອງໃຫ້ສຳເລັດຕາມແຜນ ເພື່ອໃຫ້ທ່ວງທັນກັບການຕ້ານແລ້ງ ແລະ ການຜະລິດນາແຊງຂອງປະຊາຊົນ. ພ້ອມນັ້ນຢູ່ຕາມບັນດາອ່າງເກັບນ້ຳ ແລະ ບ້ານຂອງປະຊາຊົນ ອຳນາດການປົກຄອງເມືອງ ກໍຕ້ອງປຸກລະດົມປະຊາຊົນໃຫ້ພ້ອມກັນຮັກສາທຳມະຊາດ ແລະ ປ່າໄມ້ ເພາະສິ່ງເຫຼົ່ານັ້ນ ແມ່ນຕິດພັນກັບການດຳລົງຊີວິດປະຈຳວັນຂອງພວກເຮົາ ເຮັດໃຫ້ພວກເຮົາມີອາຫານຈາກທຳມະຊາດ ແລະ ຕາມລະດູການ ໄວ້ກິນ ແລະ ເປັນສິນຄ້າອີກດ້ວຍ.


ໃນເວລາຕໍ່ມາ ຄະນະຂອງທ່ານເຈົ້າແຂວງສະຫວັນະເຂດ ກໍໄດ້ໄປຢ້ຽມຢາມເບິ່ງອ່າງເກັບນ້ຳຊົນລະປະທານເຊກື ເຊິ່ງໄດ້ສ້າງສຳເລັດ ແຕ່ບໍ່ທັນມີຄອງຊົນລະປະທານ, ໃນນັ້ນປະຊາຊົນແມ່ນມີຄວາມຕ້ອງການຄອງ ເພື່ອຫົດພືດ ແລະ ປູກເຂົ້າໃນລະດູແລ້ງ, ເຊິ່ງໃນລະດູຝົນປີນີ້ ປະຊາຊົນທີ່ຢູ່ໃກ້ອ່າງເກັບນ້ຳເຊກື ກໍໄດ້ໃຊ້ຈັກດູດນ້ຳ ເພື່ອຫົດເນື້ອທີ່ນາປີ ແກ້ໄຂໃນຍາມທີ່ຝົນບໍ່ຕົກ ເພື່ອບໍ່ໃຫ້ເຂົ້າຕາຍ.

ຕໍ່ກັບແຜນການສ້າງຄອງຊົນລະປະທານເຊກື ທ່ານ ສູນທະລາ ຕົ້ນພານິດ ຮອງຫົວໜ້າພະແນກກະສິກຳ ແລະ ປ່າໄມ້ ບອກໃຫ້ຮູ້ວ່າ: ອ່າງເກັບນຳ້ຊົນລະປະທານເຊກື ມີລວງຍາວເຄື່ອນ 1.100 ແມັດ, ສູງ 16 ແມັດ, ສາມາດເກັບກັກນ້ຳໄດ້ 6ລ້ານ 6ແສນແມັດກ້ອນ, ສາມາດສ້າງຄອງຊົນລະປະທານ ມີຄວາມຍາວ 6 ກິໂລແມັດ ແລະຫົດເນື້ອທີ່ນາແຊງໄດ້ 250 ເຮັກຕາ ເຊິ່ງຈະນຳໃຊ້ງົບປະມານໃນການກໍ່ສ້າງປະມານ 20ຕື້ກີບ.