ເຈົ້າແຂວງສະຫວັນນະເຂດ ແນະນຳອຳນາດການປົກຄອງ ແລະ ເຈົ້າໜ້າທີ່ທຸກພາກສ່ວນ ເຂັ້ມງວດໃນການຕ້ານ ສະກັດກັ້ນການພະຍາດໂຄວິດ -19

ເຈົ້າແຂວງສະຫວັນນະເຂດ ແນະນຳອຳນາດການປົກຄອງ ແລະ ເຈົ້າໜ້າທີ່ທຸກພາກສ່ວນ ເຂັ້ມງວດໃນການຕ້ານ ສະກັດກັ້ນການພະຍາດໂຄວິດ -19

August 10, 2020 0 By admin

ວິທະຍຸກະຈາຍສຽງ ແຂວງສະຫວັນນະເຂດ, ເມື່ອວັນທີ 6 ສິງຫາ 2020ຜ່ານມາ  ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະພະແນກການກ່ຽວຂ້ອງອ້ອມຂ້າງແຂວງໄດ້ລົງພົບປະ ໂອ້ລົມ ແລະໃຫ້ທິດຊີ້ນຳ ຄະນະນຳຂອງເມືອງນອງ,ເມືອງວິລະບູລີ,ເມືອງເຊໂປນ ແລະເຈົ້າໜ້າທີ່ທຸກພາກສ່ວນ ຢູ່ດ່ານສາກົນ ແດນສະຫວັນ-ລາວບາວ ເພື່ອພ້ອມກັນເພີ່ມທະວີ ການປ້ອງກັນ ຕ້ານແລະສະກັດກັ້ນການລະບາດຂອງພະຍາດໂຄວິດ 19 .

ປະຈຸບັນມີການແຜ່ລະບາດເປັນຮອບທີ 2 ຢູ່ໃນຫຼາຍປະເທດ ແລະຍັງມີທ່າອ່ຽງຈະເພີ່ມຂຶ້ນ ໂດຍສະເພາະ ສສ ຫວຽດນາມ ເຊິ່ງມີຫຼາຍແຂວງທີ່ມີຊາຍແດນຕິດກັບສ ປປ ລາວ ແຕ່ເໜືອ ຮອດໃຕ້, ໃນຜ່ານມາເຈົ້າໜ້າທີ່ທຸກຂະແໜງການ ກໍ່ໄດ້ເອົາໃຈໃສ່ໃນການປະຕິບັດ ຕາມແຈ້ງການແລະມາດຕະການຕ່າງໆ ທີ່ທາງສູນກາງ ກໍ່ຄືແຂວງວາງອອກ ຢ່າງເຄັ່ງຄັດ,ແຕ່ກໍ່ຍັງພົບຄວາມຫຍຸ້ງຍາກ ເນື່ອງຈາກວ່າ ຈຳນວນເຈົ້າໜ້າທີ່ ຍັງມີໜ້ອຍ,ບໍ່ສາມາດກວດກາ ລາດຕະເວນໄດ້ຢ່າງທົ່ວເຖິງ ເຮັດໃຫ້ມີຍັງການລັກລອບເຂົ້າມາຕາມເຂດຊາຍແດນໂດຍບໍ່ຖືກຕ້ອງຕາມລະບຽບກົດໝາຍ ເຊິ່ງກໍ່ມີຄວາມສ່ຽງທີ່ຈະນຳເຊື້ອພະຍາດດັ່ງກ່າວເຂົ້າມາໄດ້.

ດັ່ງນັ້ນເຈົ້າໜ້າທີ່ປະຈຳດ່ານ ແລະ ເມືອງວິລະບູລີ,ເມືອງເຊໂປນ ,ເມືອງນອງ ຕ້ອງໄດ້ກວດກາຄືນ ບັນຫາຄົນຕ່າງດ້າວ ທີ່ເຂົ້າມາອາໄສ ທຳມາຫາກິນ ຫຼືປະກອບອາຊີບ ຢູ່ແຂວງສະຫວັນນະເຂດ ຍັງມີຫຼາຍປານໃດ,ມີໜັງສືຖືກຕ້ອງບໍ່ ໝົດກຳນົດຫຼືຍັງ,ກວດຄືນຄົນຂັບລົດຂົນສົ່ງສິນຄ້າ,ລົດບໍລິສັດຕ່າງປະເທດ ມີເທົ່າໃດ ຈະຕ້ອງຂຶ້ນທະບຽນຫຼືບໍ່ ເພື່ອໃຫ້ມີຄວາມສະດວກໃນການຄຸ້ມຄອງ,ການຕິດຕາມ ກວດກາຕ່າງໆ.

ຖ້າຫາກພົບເຫັນກໍລະນີ ທີ່ເຂົ້າມາໂດຍບໍ່ຖືກຕ້ອງ ກໍ່ຕ້ອງປະສານ ຫາເຈົ້າໜ້າທີ່ ທາງຝ່າຍຫວຽດນາມ ເພື່ອນຳສົ່ງແລະມອບຄືນຢ່າງເປັນທາງການ,ນອກຈາກນັ້ນທ່ານຍັງໄດ້ແນະນຳ ໃນການປ້ອງກັນພະຍາດໄຂ້ຍູງລາຍ,ພະຍາດລະດູການ,ການຕ້ານແລ້ງ ຕ້ານຖ້ວມ ຕື່ມອີກ ເພາະວ່າມາຮອດປະຈຸບັນການປັກດຳເຂົ້ານາປີ ຫຼາຍທ້ອງຖິ່ນບໍ່ສຳເລັດຕາມແຜນ ເນື່ອງຈາກເກີດສະພາບແຫ້ງແລ້ງ.