ຫວຽດ​ນາມ​ ມີ​ຜູ້​ຕິດ​ເຊື້ອພະ​ຍາດໂຄວິດ – 19 ເພີ່ມ​ຕື່ມ​ອີກ 5 ຄົນ

ຫວຽດ​ນາມ​ ມີ​ຜູ້​ຕິດ​ເຊື້ອພະ​ຍາດໂຄວິດ – 19 ເພີ່ມ​ຕື່ມ​ອີກ 5 ຄົນ

August 9, 2020 0 By admin

(VOVWORLD), ຕາມແຫຼ່ງຂ່າວຈາກຄະນະຊີ້ນຳແຫ່ງຊາດກ່ຽວກັບການປ້ອງກັນ, ສະກັດກັ້ນພະຍາດໂຄວິດ– 19 ແລ້ວ, ໄລ່ຮອດເວລາ 6 ໂມງວັນທີ 8 ສິງຫາ, ຫວຽດນາມມີຜູ້ຕິດເຊື້ອພະຍາດໂຄວິດ– 19 ໃໝ່ຕື່ມອີກ 5 ຄົນ, ໃນນັ້ນ 3 ຄົນແມ່ນມີສ່ວນກ່ຽວຂ້ອງເຖິງນະຄອນ ດານັງ (ຢູ່ ກ໋ວາງຫງາຍ2 ຄົນ, ຮ່າໂນ້ຍ 1 ຄົນ) ແລະ 2 ຄົນໄດ້ ແຍກຕົວໃນທັນທີພາຍຫຼັງທີ່ເດີນທາງເຂົ້າແຂວງແຄ໊ງຮ່ວາ.

ດັ່ງນັ້ນ ມາຮອດປັດຈຸບັນ, ຫວຽດນາມ ໄດ້ຢັ້ງຢືນວ່າມີຜູ້ຕິດເຊື້ອພະຍາດໂຄວິດ– 19 ຈຳນວນ 789 ຄົນ, ໃນນັ້ນມີ ຜູ້ຕິດເຊື້ອມາຈາກຕ່າງປະເທດ ແມ່ນ 316 ຄົນ, ຜູ້ຕິດເຊື້ອໃໝ່ໃນຊຸມຊົນ ແມ່ນ 333 ຄົນ.

ສະເພາະແຕ່ວັນທີ 25 ກໍລະກົດມາຮອດປັດຈຸບັນ ຜູ້ຕິດເຊື້ອ 395 ຄົນແມ່ນໄດ້ຮັບການປິ່ນປົວຫາຍດີເປັນປົກກະຕິແລ້ວ ແລະ ມີຜູ້ເສຍຊີວິດ 10 ຄົນ.

ກ່ອນໜ້ານັ້ນ, ໃນວັນທີ 7 ສິງຫາ, ບັນດາອົງການທີ່ມີໜ້າທີ່ຮັບຜິດຊອບຫວຽດນາມ, ບັນດາອົງການຕາງໜ້າຫວຽດນາມປະຈຳ ອົດສະຕາລີ ແລະ ບໍລິສັດການບິນແຫ່ງຊາດຫວຽດນາມ ໄດ້ສົມທົບກັບບັນດາອົງການທີ່ມີໜ້າທີ່ຮັບຜິດຊອບອົດສະຕາລີຈັດຖ້ຽວບິນນຳສົ່ງພົນລະເມືອງຫວຽດນາມ 340 ຄົນ ກັບມາປະເທດ. ພາຍຫຼັງ ເຮືອບິນລົງຈອດຢູ່ສະໜາມບິນເຕິນເຊີນເຍິດ ຜູ້ໂດຍສານທັງໝົດໄດ້ກວດສຸຂະພາບ ແລະ ນຳສົ່ງໄປຍັງຮາກຖານແຍກຕົວຢ່າງຖືກຕ້ອງຕາມຂໍ້ກຳນົດ.

ໃນເຫດການທີ່ກ່ຽວຂ້ອງ, ໃນວັນທີ 7 ສິງຫາ, ສະຖານທູດຫວຽດນາມປະຈຳອາເມລິກາ ໄດ້ມອບຜ້າອັດປາກ – ດັງ 10.000 ອັນ ໃຫ້ແກ່ ລັດ Maryland ອາເມລິກາ.