ເມືອງບໍລິຄັນ ມີນໍ້າຖ້ວມ 8 ບ້ານ ກວມເອົາເກືອບ500ຄົວເຮືອນ  ຄະນະກຳມະການປ້ອງກັນ ແລະ ຕ້ານໄພພິບັດຂັ້ນແຂວງ ເລັ່ງລົງຊ່ວຍເຫຼືອປະຊາຊົນບ້ານທົ່ງພັນຄຳ

ເມືອງບໍລິຄັນ ມີນໍ້າຖ້ວມ 8 ບ້ານ ກວມເອົາເກືອບ500ຄົວເຮືອນ ຄະນະກຳມະການປ້ອງກັນ ແລະ ຕ້ານໄພພິບັດຂັ້ນແຂວງ ເລັ່ງລົງຊ່ວຍເຫຼືອປະຊາຊົນບ້ານທົ່ງພັນຄຳ

August 8, 2020 0 By admin

ເນື່ອງຈາກສະພາບອາກາດມີການປຽ່ນແປງເຮັດໃຫ້ເກີດມີຝົນຕົກຕິດຕໍ່ກັນຫຼາຍວັນ ໃນທ້າຍເດືອນ ກໍລະກົດ ຫາ ຕົ້ນເດືອນສິງຫາ 2020 ຈົນເຮັດໃຫ້ເກີດມີນໍ້າຖ້ວມ, ນໍ້າຂັງຫຼາຍແຫ່ງພາຍໃນແຂວງ ບໍລິຄໍາໄຊ,ໂດຍສະເພາະ ແມ່ນຈຳນວນບ້ານຕ່າງໆລຽບຕາມແມ່ນໍ້າຊັນເທດສະບານເມືອງ ບໍລິຄັນ ແລະ ບາງບ້ານຂອງເມືອງປາກຊັນ ແມ່ນມີຫຼາຍຈຸດຖືກຖ້ວມເປັນບໍລິເວນກວ້າງ.


ໃນວັນທີ 6 ສິງຫາ 2020 ນີ້ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ປະທານຄະນະກຳມະການປ້ອງກັນ ແລະ ຕ້ານໄພພິບັດຂັ້ນແຂວງ ພ້ອມດ້ວຍຄະນະ ໄດ້ລົງຕິດຕາມ, ກວດກາຄວາມເສຍຫາຍຈາກໄພນໍ້າຖ້ວມຢູ່ເທດສະບານ ແລະ ບັນດາບ້ານຕ່າງໆພາຍໃນເມືອງ ບໍລິຄັນ ໂດຍການນຳພາທາງຂອງທ່ານ ວັນເລີນ ປູ້ຍໄມນີ ເຈົ້າເມືອງ ບໍລິຄັນ​ ການລົງຕິດຕາມ.

ກວດກາ ຄັ້ງນີ້ທ່ານໄດ້ໄດ້ເອົາເຄື່ອງ ອຸປະໂພກ-ບໍລິໂພກຈຳນວນໜຶ່ງ ໄປມອບໃຫ້ປະຊາຊົນຜູ້ໄດ້ຮັບຜົນກະທົບ ໃນນັ້ນມີນໍ້າດື່ມຕຸກໃຫຍ່ 20 ລີດ ຈຳນວນ 220 ຕຸກ,ນໍ້າດື່ມຕຸກ 1.5 ລິດ 250 ຕຸກ ແລະ ໜີ່ຈໍານວນ 10 ແກັດໃຫຍ່ ໄປມອບໃຫ້ປະຊາຊົນບ້ານທົ່ງພັນຄໍາ ເນື່ອງຈາກບ້ານດັ່ງກ່າວຖືກນໍ້າຖ້ວມຫຼາຍກວ່າໝູ່ ແລະ ຖ້ວມມາເປັນເວລາ 6 ວັນແລ້ວ, ເສັ້ນທາງຄົມມະ ນາຄົມຖືກຕັດຂາດຫຼາຍຈຸດ, ລະບົບນໍ້າລິນຖືກເສຍຫາຍ ເຮັດໃຫ້ປະຊາຊົນຂາດນ້ຳດື່ມ-ນ້ຳໃຊ້ທີ່ຈຳເປັນ, ການເດີນທາງໄປມອບເຄື່ອງໃນຄັ້ງນີ້ ແມ່ນມີຄວາມຫຍູ້ງຍາກຫຼາຍ ເສັ້ນທາງຄົມມະນາຄົມຫຼາຍບ່ອນຖືກນໍ້າຖ້ວມ.

ໃນສະພາວະດັ່ງກ່າວນີ້ທ່ານຮອງເຈົ້າແຂວງ ຍັງເນັ້ນໃຫ້ການນຳຂັ້ນເມືອງ ຈົ່ງໄດ້ລົງໄກ້ສິດຕິດແທດ,ຕິດຕາມການກວດກາສຸຂະພາບຂອງພໍ່ແມ່ປະຊາຊົນ,ເກັບກຳຂໍ້ມູນຜົນເສຍຫາຍຜົນຜະລິດ,ພ້ອມຮຽກຮ້ອງໃຫ້ພໍ່ແມ່ປະຊາຊົນຈົ່ງໄດ້ມີສະຕິລະວັງຕົວ ມີຄວາມສາມັກຄີຊ່ວຍເຫຼືອເຊີ່ງກັນ ແລະ ກັນ ຮັກສາຊີວິດ ແລະ ຊັບສິນຕ່າງໆ ນໍາເອົາສັດລ້ຽງໄປໄວ່ບ່ອນສູງ, ພາຍຫຼັງນໍ້າລຸດລົງ ຈົ່ງໄດ້ຮັກສາຄວາມສະອາດ ພາຍໃນເຮືອນເພື່ອຕ້ານການແຜ່ລະບາດຂອງພະຍາດທີ່ຕາມມາ ແລະ ເນັ້ນໃຫ້ຂະແໜງສາທາລະນະສຸກແຂວງ, ເມືອງ ລົງຕິດຕາມ, ກວດສຸຂະພາບ ແຈກຢາຍຢາປົວພະຍາດ ໃຫ້ພໍ່ແມ່ປະຊາຊົນ ແລະ ສັດລຽ້ງ ເພື່ອປ້ອງກັນຮັບມືທັນກັບພະຍາດທີ່ອາດຈະເກີດຂື້ນຫຼັງນໍ້າແຫ້ງ.

ທ່ານ ວັນເລີນ ປູ້ຍໄມນີ ເຈົ້າເມືອງ ບໍລິຄັນຍັງໄດ້ໃຫ້ຮູ້ຕື່ມອີກວ່າ ມາຮອດປະຈຸບັນ ທົ່ວເມືອງມີນໍ້າຖ້ວມ 8 ບ້ານ 473 ຄົວເຮືອນ,ຖ້ວມໜັກກວ່າໝູ່ມແມ່ນບ້ານທົ່ງພັນຄໍາເກືອບໝົດບ້ານ, ນາຖືກເສຍຫາຍ 46 ກວ່າເຮັກຕ່າ,ສັດເສຍຫາຍ ຄວຍ 1 ໂຕ,ໝູ 33 ໂຕ,ແບ້ 4 ໂຕ ແລະ ໄກ່ 65 ໂຕ,ພາຍຫຼັງນໍ້າແຫ້ງຈະໄດ້ເກັບກຳຂໍ້ມູນຜົນເສຍຫາຍຄືນ ພ້ອມທັງວາງແຜນປັບປຸງພື້ນຖານໂຄງລ່າງທີ່ໄດ້ຮັບຜົນເສຍຫາຍ ພ້ອມຮຽກຮ້ອງໃຫ້ພາກລັດ-ນິຕິບຸກຄົນມີສ່ວນຮ່ວມໃນການຊ່ວຍເຫຼືອປະຊາຊົນຜູ້ທີ່ຖືກຜົນກະທົບຈາກໄພພິບັດຄັ້ງນີ້