ແຂວງໄຊຍະບູລີ ໄດ້ຮັບຜົນກະທົບຈາກນໍ້າຖ້ວມ  8 ເມືອງ ກວມເອົາ54 ບ້ານ 1.740 ຄອບຄົວ 

ແຂວງໄຊຍະບູລີ ໄດ້ຮັບຜົນກະທົບຈາກນໍ້າຖ້ວມ  8 ເມືອງ ກວມເອົາ54 ບ້ານ 1.740 ຄອບຄົວ 

August 6, 2020 0 By admin

Media Laos, ຕາມການລາຍງານ ຂອງທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໆໄຊຍະບູລີ ທັງເປັນຫົວໜ້າຄະນະກຳມະການປ້ອງກັນໄພພິບັດຂັ້ນແຂວງ ໃຫ້ຮູ້ວ່າ: ມີ 8 ເມືອງຄື: ເມືອງໄຊຍະບູລີ, ບໍ່ແຕນ, ເມືອງເງິນ, ເມືອງຄອບ, ເມືອງພຽງ, ແກ່ນທ້າວ, ທົ່ງມີໄຊ ແລະ ເມືອງໄຊສະຖານ ແຂວງໄຊຍະບູລີ ປະຊາຊົນຈຳນວນ 54 ບ້ານ, 1.740 ຄອບຄົວ ໄດ້ຮັບຜົນກະທົບໜັກສົມຄວນຈາກສະພາບນໍ້າຖ້ວມຊຸ ຍ້ອນພາຍຸຊິນລາກູພັດຜ່ານ ລະຫວ່າງວັນທີ 1 ຫາ 4 ສິງຫານີ້ ລວມມູນຄ່າເສຍຫາຍເບື້ອງຕົ້ນຫລາຍກວ່າ 2 ຕື້ 880 ລ້ານກີບ.


ເມືອງທີ່ໄດ້ຮັບຜົນກະທົບໜັກແມ່ນເມືອງພຽງມີເນື້ອທີ່ນາຖືກນໍ້າຖ້ວມຫລາຍກວ່າ 300 ເຮັກຕາ, ເມືອງບໍ່ແຕນມີເສັ້ນທາງຂາດຫລາຍຈຸດ, ຂົວອູ່ 2 ແຫ່ງບໍ່ສາ ມາດນໍາໃຊ້ໄດ້, ສະເພາະເທດສະບານແຂວງຄືເມືອງໄຊຍະບູລີແມ່ນປະຊາຊົນທີ່ອາໃສຢູ່ລຽບແຄມແມ່ນໍ້າຮຸ່ງກວມເອົາ 12 ບ້ານ.

ມາຮອດປະຈຸບັນຫລາຍເມືອງລະດັບນໍ້າໄດ້ຫລຸດລົງ ແລະເລີ່ມເຂົ້າສູ່ສະພາບປົກກະຕິແລ້ວ ຕໍ່ສະພາບການດັ່ງກ່າວອົງການປົກຄອງແຂວງ ແລະເມືອງພວມລະດົມການຊ່ວຍເຫລືອປະຊາຊົນທີ່ໄດ້ຮັບຜົນກະທົບໃນເບື້ອງຕົ້ນຕາມເງື່ອນໄຂຕົວຈິງ.


ຮອງເຈົ້າແຂວງໆໄຊຍະບູລີ ໃຫ້ຮູ້ຕື່ມວ່າ: ປະຈຸບັນອົງການປົກຄອງແຂວງໄດ້ແຕ່ງຕັ້ງຄະນະກຳມະການປ້ອງກັນໄພພິບັດຂັ້ນແຂວງ, ຂັ້ນເມືອງ ລົງຕິດຕາມສະພາບການຢູ່ບັນດາເມືອງຢ່າງໃກ້ຊິດ ເພື່ອປະເມີນຜົນເກັບກຳສະພາບຄວາມເສຍຫາຍລະອຽດ, ແກ້ໄຂສຸກເສີນບ່ອນທີ່ມີຄວາມຈຳເປັນ ແລະ ໃຫ້ການຊ່ວຍເຫຼືອ ເປັນຕົ້ນການສະໜອງເຂົ້າສານ, ເຄື່ອງໃຊ້ຄົວເຮືອນສຳລັບຄອບຄົວ, ພ້ອມທັງເຕືອນປະຊາຊົນເພີ່ມຄວາມລະມັດລະວັງຕື່ມ ໂດຍສະເພາະເຮືອນທີ່ອາໃສຢູ່ແຄມນໍ້າ ເພື່ອຫລຸດຜ່ອນເສຍຫາຍໃຫ້ໜ້ອຍລົງ.