ຄ້າຍຄຸມຂັງດັດສ້າງ ປກສ ແຂວງ ຄຳມ່ວນ ສຶກສາອົບຮົມນັກໂທດ ຜູ້ຖືກຫາ ແລະ ຜູ້ຖືກດັດສ້າງ

ຄ້າຍຄຸມຂັງດັດສ້າງ ປກສ ແຂວງ ຄຳມ່ວນ ສຶກສາອົບຮົມນັກໂທດ ຜູ້ຖືກຫາ ແລະ ຜູ້ຖືກດັດສ້າງ

August 5, 2020 0 By admin

Khammouane News, ໃນວັນທີ 4 ສິງຫາ 2020 ຢູ່ທີ່ສະໂມສອນ ຄ້າຍຄຸມຂັງດັດສ້າງ ປກສ ແຂວງ ຄຳມ່ວນໄດ້ #ຈັດພິທີເຜີຍແຜ່ກົດລະບຽບວ່າດ້ວຍນັກໂທດຜູ້ຖືກຫາ ແລະ ຜູ້ຖືກດັດສ້າງ ໂດຍການເຂົ້າຮ່ວມ ແລະ ເຜີຍແຜ່ໂດຍທ່ານ ພັທ ວໍລະຈິດ ດວງລາຕີ ຫົວໜ້າຄ້າຍຄຸມຂັງດັດສ້າງ ປກສ ແຂວງຄຳມ່ວນ ມີບັນດາຫົວໜ້າພະແນກ-ຮອງພະແນກ ຕາງໜ້າອົງການໄອຍະການປະຊາຊົນ ພະແນກຍຸຕິທຳ ແຂວງ, ພະນັກງານທີ່ກ່ຽວຂ້ອງຕະຫຼອດຮອດນັກໂທດຜູ້ຖືກດັດກສ້າງເຂົ້າຮ່ວມ 591 ຄົນ, ຍິງ 74 ຄົນ.


ເອກະສານຕ່າງໆທີ່ສຳຄັນນຳມາເຜີຍແຜ່ໃນຄັ້ງນີ້ປະກອບມີ ເອກະສານກົດໝາຍວ່າດ້ວຍການດຳເນີນຄະດີອາຍາມາດຕາ 252,253,254 ແລະ ປະມວນກົດໝາຍອາຍາມາດຕາ 104 ເອກະສານລະບຽບການສຳລະຄ່າປັບໃໝ ແລະ ຄ່າເສຍຫາຍທາງແພ່ງ ແລະ ເອກະສານກົດລະບຽບຂອງຄ້າຍຄຸມຂັງວ່າດ້ວຍນັກໂທດ ຜູ້ຖືກຫາ ແລະ ຜູ້ຖືກດັດສ້າງຈຳນວນ 3 ໝວດຄື : ໝວດທີ 1 ວ່າດ້ວຍບົດບັນຍັດທົ່ວໄປ, ໝວດທີ 2 ວ່າດ້ວຍລະບຽບການຕ່າງໆຂອງນັກ ໂທດຕ້ອງຫາ ຜູ້ຖືກດັດສ້າງ ແລະ ໝວດທີ 3 ວ່າດ້ວຍການນະໂຍບາຍຕໍ່ຜູ້ທີ່ມີຜົນງານ ແລະ ມາດຕະການຕໍ່ຜູ້ລະເມີດ.

ໃນການເຜີຍແຜ່ກົດລະບຽບຄັ້ງນີ້ກໍ່ເພື່ອເຮັດໃຫ້ນັກໂທດ ຜູ້ຖືກຫາ ແລະ ຜູ້ຖືກດັດສ້າງພາຍໃນຄ້າຍຄຸມຂັງດັ່ງກ່າວຮັບຮູ້ເຖີງລະບຽບການ ທີ່ຕັ້ງ, ສີດ ແລະ ພັນທະ, ຂໍ້ຫ້າມ, ນະໂຍບາຍ ແລະ ມາດຕະການຕ່າງໆຕໍ່ຜູ້ທີ່ລະເມີດລະບຽບ ເພື່ອເຮັດໃຫ້ນັກໂທດຜູ້ຖືກຫາ ແລະ ຜູ້ຖືກດັດສ້າງ ເຊື່ອມຊືມຕໍ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ. ເຂົ້າໃຈເລີກເຊິ່ງຕໍ່ໂທດກຳທີ່ຕົນເອງໄດ້ສ້າງຂຶ້ນ ເຊິ່ງມັນໄດ້ກໍ່ຜົນເສຍຫາຍໃຫ້ແກ່ສັງຄົມ ເຮັດໃຫ້ສັງຄົມບໍ່ມີຄວາມສະຫງົບ ແລະ ເຮັດໃຫ້ນັກໂທດເກີດມີຄວາມຮູ້ສືກກີນແໜງ .

ນອກນັ້ນຍັງໄດ້ເຮັດໃຫ້ພວກເຂົາມີຄວາມຕື່ນຕົວໃນການຝຶກຝົນຫຼໍ່ຫຼອມ ດັດສ້າງຕົນເອງ ດ້ວຍການອອກແຮງງານ, ທຳການຜະລີດ ຮ່ຳຮຽນ ເຝີກວິຊາຊີບດັດ ແປງແນວຄິດ ແລະ ການກະທຳທີ່ຜິດພາດໃນອາດີດ ສ້າງຕົນເອງໃຫ້ເປັນບຸກຄົນທີ່ມີຜົນງານດີເດັ່ນ ເມື່ອພົ້ນໂທດອອກໄປແລ້ວ ຈຶ່ງເຮັດໃຫ້ເຂົາເຈົ້າກາຍເປັນຄົນດີຂອງຄອບຄົວ ເປັນພົນລະເມືອງດີຂອງສັງຄົມ ແລະ ປະເທດຊາດ