ເຈົ້າແຂວງໄຊຍະບູລີ ລົງຊຸກຍູ້ການຜະລິດຂອງປະຊາຊົນບ້ານຫ້ວຍເລິກ ແລະ ບ້ານຫ້ວຍບູຮາ

ເຈົ້າແຂວງໄຊຍະບູລີ ລົງຊຸກຍູ້ການຜະລິດຂອງປະຊາຊົນບ້ານຫ້ວຍເລິກ ແລະ ບ້ານຫ້ວຍບູຮາ

August 4, 2020 0 By admin

ຂປລ. ລາຍງານຂ່າວຈາກພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ແຂວງໄຊຍູລີ ໃຫ້ຮູ້ວ່າ, ໃນວັນທີ 31 ກໍລະກົດ 2020 ນີ້, ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ລົງຊຸກຍູ້ການຜະລິດຂອງປະຊາຊົນ ຢູ່ບ້ານຫ້ວຍເລິກ ແລະ ບ້ານຫ້ວຍບູຮາ ເມືອງແກ່ນທ້າວ, ເປັນກຽດຕ້ອນຮັບໂດຍທ່ານ ອໍາຄາ ລັດສະໝີ ເຈົ້າເມືອງໆແກ່ນທ້າວ, ທ່ານ ປະເສີດ ອິນວົງຄໍາ ປະທານແນວລາວສ້າງຊາດເມືອງ, ມີຫົວໜ້າຫ້ອງການກະສິກໍາ ແລະ ປ່າໄມ້ເມືອງ, ພະນັກງານຊີ້ນໍາບ້ານ, ການຈັດຕັ້ງບ້ານ, ຊາວກະສິກອນບ້ານຫ້ວຍເລິກ ແລະ ບ້ານຫ້ວຍບູຮາເຂົ້າຮ່ວມຕ້ອນຮັບ.

ໃນໂອກາດດັ່ງກ່າວ, ທ່ານເຈົ້າແຂວງໄຊຍະບູລີ ພ້ອມດ້ວຍທີມງານຂອງແຂວງ ໄດ້ລົງເບິ່ງຕົວຈິງການປູກພືດຂອງປະຊາຊົນຢູ່ບ້ານຫ້ວຍເລິກ ຊຶ່ງຕາມການລາຍງານຂອງທ່ານ ສົມພາວັນ ຫອມສົມບັດ ນາຍບ້ານໆຫ້ວຍເລິກ, ປະຊາຊົນປູກມັນຕົ້ນ 170 ກວ່າຄອບຄົວ ເນື້ອທີ່ 200 ກວ່າເຮັກຕາ, ສາລີ 10 ກວ່າຄອບຄົວ ເນື້ອທີ່ 10 ກວ່າເຮັກຕາ, ຖົ່ວດິນ 20 ກວ່າຄອບຄົວ ເນື້ອທີ່ 10 ກວ່າເຮັກຕາ, ສ່ວນນາປີກໍ່ໄດ້ ປັກດໍານາສໍາເລັດແລ້ວ 100 %. ນອກຈາກ ເຮັດເຂົ້ານາແລ້ວ ປະຊາຊົນ ຍັງປູກເຂົ້າໄຮ່ ໃນເນື້ອທີ່ 30 ກວ່າເຮັກຕາຕື່ມອີກ.

ຈາກນັ້ນ, ທ່ານເຈົ້າແຂວງ ແລະຄະນະກໍ່ໄດ້ສືບຕໍ່ໄປຕິດຕາມການປູກພືດຂອງປະຊາຊົນຢູ່ບ້ານຫ້ວຍບູຮາ. ບ້ານນີ້ ມີເນື້ອທີ່ປູກມັນຕົ້ນ 700 ກວ່າເຮັກຕາ, ຖົ່ວດິນ 190 ກວ່າເຮັກຕາ, ຖົ່ວແດງ 70 ກວ່າເຮັກຕາ ແລະ ພືດອື່ນໆ ເນື້ອທີ່ 9 ເຮັກຕາ ແລະ ປັກດໍານາກໍ່ສໍາເລັດ 100 %, ນອກນີ້, ຍັງໄດ້ປູກເຂົ້າໄຮ່ ເນື້ອທີ່ 30 ກວ່າເຮັກຕາ ແລະ ພືດອື່ນໆຕື່ມອີກ.

ໃນການລົງໄປແຕ່ລະບ້ານ, ທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ ໄດ້ເນັ້ນໃຫ້ຊາວກະສິກອນເອົາໃຈໃສ່ບົວລະບັດພືດພັນທີ່ໄດ້ປູກໃຫ້ງອກງາມ, ທັງຕ້ອງຕິດຕາມ, ເຝົ້າລະລັງການລະບາດຂອງສັດຕູພືດ ແລະ ອື່ນໆ ເພື່ອໃຫ້ໄດ້ຜົນຜະລິດສູງ.