ນໍ້າຮຸ່ງລົ້ນຝັ່ງ ເຂົ້າຖ້ວມບ້ານເຮືອນປະຊາຊົນ ເມືອງໄຊຍະບູລີ , ຂະນະທີ່ກົມອຸຕຸອອກແຈ້ງເຕືອນຍັງຈະມີຝົນຕົກໜັກຢູ່ແຂວງໄຊຍະບູລີ

ນໍ້າຮຸ່ງລົ້ນຝັ່ງ ເຂົ້າຖ້ວມບ້ານເຮືອນປະຊາຊົນ ເມືອງໄຊຍະບູລີ , ຂະນະທີ່ກົມອຸຕຸອອກແຈ້ງເຕືອນຍັງຈະມີຝົນຕົກໜັກຢູ່ແຂວງໄຊຍະບູລີ

August 3, 2020 0 By admin

ໃນວັນທີ 2-3 ສິງຫາ 2020 ນີ້ເມືອງ ໄຊຍະບູລີ ແຂວງໄຊຍະບູລີ ໄດ້ເກີດມີຝົນຕົກໜັກຫຼາຍຊົ່ວໂມງຕິດຕໍ່ກັນ ທັງເວັນ ແລະ ຄືນ ມາຮອດຕອນເຊົ້າຂອງວັນທີ 3 ສິງຫາ 2020 ໄດ້ເຮັດໃຫ້ແມ່ນໍ້າຮຸ່ງເຊິ່ງເປັນແມ່ນໍ້າສາຍຫຼັກຂອງເມືອງ ບວກກັບນໍ້າປ່າໄຫຼລັ່ງເຂົ້າຖ້ວມ ທົ່ງນາ ຮົ້ວ-ສວນ ແລະ ຖ້ວມບ້ານເຮືອນຂອງປະຊາຊົນຫລາຍບ້ານພາຍໃນເມືອງ.

ປະຈຸບັນການນຳຂອງແຂວງ, ຂອງເມືອງ ພໍ່ ແມ່ປະຊາຊົນ, ເຈົ້າໜ້າທີ່ກຳລັງ ປກສ, ປກຊ ແລະ ພາກສ່ວນທີ່ກ່ຽວຂ້ອງໂດຍສະເພາະແມ່ນຄະນະກໍາມະການຕ້ານ ແລະ ສະກັດກັ້ນໄພພິບັດຂອງແຂວງ, ຂອງເມືອງກໍາລັງເລັ່ງໃຫ້ຄວາມຊ່ວຍເຫຼືອຂົນຍ້າຍເຄື່ອງຂອງ ແລະ ສັດລ້ຽງອອກຈາກເຂດດັ່ງກ່າວໄປໄວ້ໃນເຂດທີ່ປອດໄພ ສ່ວນມູນຄ່າການເສຍຫາຍຈະແຈ້ງໃຫ້ຊາບຕາມພາຍຫຼັງ.

ຂະນະທີ່ ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນຝົນຕົກໜັກປະຈຳວັນທີ 03/08/2020 ໂດຍລະບຸວ່າ: ລົມມໍລະສຸມຕາເວັນຕົກສ່ຽງໃຕ້ຍັງມີກຳລັງແຮງພັດປົກຄຸມຢູ່ທົ່ວທຸກພາກຂອງປະເທດລາວ, ຊື່ງຈະເຮັດໃຫ້ຝົນຍັງຈະສືບຕໍ່ຕົກໜັກຢູ່ແຂວງ ບໍ່ແກ້ວ,ໄຊຍະບູລີ, ວຽງຈັນ ແລະ ບໍລິຄໍາໄຊ. ສ່ວນພາກໃຕ້ ຍັງຈະມີຝົນຕົກໃນລະດັບຄ່ອຍ ຫາ ປານກາງ ພ້ອມຈະມີລົມພັດແຮງເປັນບາງໂອກາດຢູ່ບາງທ້ອງຖິ່ນ.

ດັ່ງນັ້ນຈຶ່ງແຈ້ງເຕືອນເຖິງ ປະຊາຊົນບັນດາເຜົ່າ, ອົງການປົກຄອງທຸກພາກສ່ວນໃຫ້ມີສະຕິລະມັດລະວັງຕໍ່ສະພາບລົມພັດແຮງ, ຝົນຕົກໜັກທີ່ຈະເຮັດໃຫ້ເກີດມີ ນໍ້າຖ້ວມຊຸ,ຖ້ວມອັ່ງ ແລະ ດິນເຈື່ອນ ແລະ ຂໍໃຫ້ຕິດຕາມຂ່າວພະຍາກອນອາກາດ ຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.

.