ທະຫານແຂວງຫຼວງພະບາງ ເລື່ອນຊັ້ນໃຫ້ນາຍສິບ 51 ສະຫາຍ

ທະຫານແຂວງຫຼວງພະບາງ ເລື່ອນຊັ້ນໃຫ້ນາຍສິບ 51 ສະຫາຍ

August 2, 2020 0 By admin

ພິທີປະກາດເລື່ອນຊັ້ນໃຫ້ນາຍສິບຂອງກອງບັນຊາການທະຫານແຂວງຫຼວງພະບາງ ໄດ້ຈັດຂື້ນຕອນເຊົ້າຂອງວັນທີ 31 ກໍລະກົດ 2020 ໂດຍການເປັນປະທານຂອງ ສະຫາຍ ພັນເອກ ອຸ່ນເຮືອນ ເຮືອງບົວສອນ ຄະນະພັກກອງບັນຊາການ, ຫົວໜ້າຫ້ອງເສນາທິການທະຫານແຂວງ, ມີຄະນະພັກ – ຄະນະບັນຊາອົງການ 5 ຫ້ອງ, ພະນັກງານຫຼັກແຫຼ່ງຈາກບັນດາກົມກອງ ແລະ ອ້າຍນ້ອງນາຍສິບເຂົ້າຮ່ວມ.


ອີງຕາມຂໍ້ກໍານົດວ່າດ້ວຍລະບຽບ ຂອງນາຍສິບ ແລະ ພົນທະຫານກອງທັບປະຊາຊົນລາວ (ສະບັບປັບປຸງ) ສະບັບເລກທີ 1681/ກປທ, ລົງວັນທີ 12 ພຶສະພາ 2016 ແລະ ອີງຕາມໜັງສືສະເໜີເລື່ອນຊັ້ນຂອງກອງບັນຊາການທະຫານແຂວງຫຼວງພະບາງ ສະບັບເລກທີ 278/ກບຊບ.ຫຼບ, ລົງວັນທີ 13 ພຶດສະພາ 2020 ໂອກາດນີ້ ສະຫາຍ ພັນໂທ ໄພວັນ ເພັງສຸວັນ ຫົວໜ້າພະແນກກໍາລັງພົນຫ້ອງເສນາທິການ ໄດ້ຂື້ນຜ່ານຂໍ້ຕົກລົງຂອງກົມໃຫຍ່ເສນາທິການ ເລກທີ 1110/ກສນ, ລົງວັນທີ 16 ມິຖຸນາ 2020 ວ່າດ້ວຍການອະນຸມັດເລື່ອນຊັ້ນນາຍສິບ ຢູ່ກອງບັນຊາການທະຫານແຂວງຫຼວງພະບາງ ເຊິ່ງໃນນີ້ແມ່ນໄດ້ເລື່ອນຊັ້ນສິບເອກຂື້ນວາທີ ຈໍານວນ 51 ສະຫາຍ, ໂດຍແມ່ນ ສະຫາຍ ພັນເອກ ອຸ່ນເຮືອນ ເຮືອງບົວສອນ ຄະນະພັກກອງບັນຊາການ, ຫົວໜ້າຫ້ອງເສນາທິການທະຫານແຂວງເປັນຜູ້ຂື້ນປະດັບຊັ້ນຢ່າງສົມກຽດ.


ຕອນທ້າຍພິທີ ສະຫາຍ ພັນເອກ ອຸ່ນເຮືອນ ເຮືອງບົວສອນ ໄດ້ມີຄໍາເຫັນໂອ້ລົມເນັ້ນໜັກໃຫ້ພົນທະຫານທີ່ໄດ້ຮັບການເລື່ອນຊັ້ນໃໝ່ ສືບຕໍ່ຝຶກຝົນຫຼໍ່ຫຼອມຕົນເອງດ້ານຄຸນທາດການເມືອງ,ຄຸນສົມບັດ, ສິນທໍາປະຕິວັດໃຫ້ໜັກແໜ້ນ, ຄົ້ນຄ້ວາເຊື່ອມຊຶມກໍາແໜ້ນແນວທາງແຜນນະໂຍບາຍຂອງພັກ, ແຜນພັດທະນາເສດຖະກິດ ແລະ ກົດໝາຍຂອງລັດ, ລະບຽບວິໄນຂອງກອງທັບ 7 ລະບອບ 18 ວຽກໃຫ້ເຂັ້ມງວດ,

ເປັນເຈົ້າການຕ້ານ ແລະ ສະກັດກັ້ນບັນຫາປາກົດການຫຍໍ້ທໍ້ໃນກົມກອງ ແລະ ສັງຄົມ, ຫຼໍ່ຫຼອມຕົນເອງໃຫ້ກາຍເປັນນັກຮົບວັດທະນະທໍາ ສ້າງເງື່ອນໄຂໃຫ້ກົມກອງກາຍເປັນກອງວັດທະນະທໍາ, ກອງ 3 ປອດ. ສູ້ຊົນປະຕິບັດແຜນການເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ຕາມທິດ 4 ປູກ 4 ລ້ຽງ ເພື່ອຮັບປະກັນເຮັດໃຫ້ຊີວິດການເປັນຢູ່ນັບມື້ໄດ້ຮັບການພັດນາດີຂື້ນເປັນລໍາດັບ.


ຂ່າວ: ສົມພອນ ສຸວັນທອນ.