ເຊັນບົດບັນທຶກຄວາມເຂົ້າໃຈ  ໂຄງການສຳຫຼວດນ້ຳປະປາຊຸມຊົນ ເມືອງເຟືອງ ແຂວງວຽງຈັນ.

ເຊັນບົດບັນທຶກຄວາມເຂົ້າໃຈ ໂຄງການສຳຫຼວດນ້ຳປະປາຊຸມຊົນ ເມືອງເຟືອງ ແຂວງວຽງຈັນ.

August 1, 2020 0 By admin

Media Laos, ໃນວັນທີ 30 ກໍລະກົດ 2020 ນີ້ ຢູ່ທີ່ຫ້ອງການແຜນການ ແລະການລົງທຶນເມືອເຟືອງ ແຂວງວຽງຈັນ ໄດ້ຈັດພິທີ ເຊັນບົດບັນທຶກຄວາມເຂົ້າໃຈ MOU ໂຄງການສຳຫຼວດ ອອກແບບ ລະບົບນ້ຳປະປາຊຸມຊົນຂະໜາດນ້ອຍ ຫ້ວຍປຸ່ງ ບ້ານໂພນໄຊ ເມືອງເຟືອງ.

ລະຫວ່າງ ອົງການປົກຄອງເມືອງເຟືອງ ( ເຈົ້້າຂອງໂຄງການ) ຕາງໜ້າໂດຍ ທ່ານ ຄຳສອນ ສີວົງດາວ ກຳມະການພັກເມືອງ ຫົວໜ້າຫ້ອງການແຜນການ ແລະການລົງທຶນເມືອງ ກັບ ບໍລິສັດພັດທະນາເມືອງລາວ ( ຜູ້ສຳປະທານໂຄງການ ) ທ່ານ ສຸກັນ ຄູນວິໄລ ປະທານບໍລິສັດ. ໃຫ້ກຽດເຂົ້າຮ່ວມເປັນສັກຂີພິຍານໂດຍ ທ່ານ ຄຳເພັດ ຈັນສົມພູ ເລຂາພັກເມືອງ ເຈົ້າເມືອງໆເຟືອງ, ມີຫົວໜ້າຫ້ອງການທີ່ກ່ຽວຂ້ອງຂັ້ນເມືອງ, ນາຍບ້ານໆໄພນໄຊ ແລະພະນັກງານວິຊາການທັງສອງຝ່າຍໄດ້ພ້ອມກັນເຂົ້າຮ່ວມ.


ທັງສອງຝ່າຍມີຄວາມເຫັນດີ ເອກະພາບສ້າງບົດບັນທຶກຮ່ວມກັນ ໃນການສຶກສາສຳຫຼວດຂໍ້ມູນ ຄວາມເປັນໄປໄດ້ ການກໍ່ສ້າງນ້ຳປະປາຊຸມຊົນ ຂະໜາດນ້ອຍ ຢູ່ບ້ານໂພນໄຊ ເມືອງເຟືອງ, ອົງການປົກຄອງເມືອງເຟືອງ ເຫັນດີອຳນວຍຄວາມສະດວກທາງດ້ານ ຂໍ້ມູນ, ສະຖານທີ່ສຳຫຼວດ, ບ່ອນທີ່ຈະກໍ່ສ້າງໂຄງການ ແລະຈັດສັນທີ່ດິນເໝາະສົມແກ່ບໍລິສັດພັດທະນາເມືອງລາວ. ສຳລັບເວລາໃນການສຳຫຼວດແມ່ນກຳນົດ 2 ເດືອນ ຫຼື 60 ວັນ.

ນັບແຕ່ວັນທີ 10 ສິງຫາ 2020 ຫາ ວັນທີ 10 ຕຸລາ 2020 ຄາດໝາຍໃຫ້ສໍາເລັດ. ເພຶ່ອເປັນການສຶກສາສໍາຫຼວດຄວາມເປັນໄປໄດ້ຂອງໂຄງການກ່ອນຈະນຳສະເໜີຂໍອະນຸມັດກໍ່ສ້າງ ແລະສຳປະທານຈາກອົງການປົກຄອງເມືອງເຟືອງ. ຖ້າຫາກໂຄງການນີ້ສຳເລັດ ແລະເປັນໄປຕາມລະດັບຄາດໝາຍ ຜູ້ທີ່ໄດ້ຮັບຜົນປະໂຫຍດແມ່ນປະຊາຊົນເມືອງເຟືອງ ເວົ້າສະເພາະກໍ່ແມ່ນປະຊາຊົນບ້ານໂພນໄຊ ແລະບ້ານທີ່ໄກ້ຄຽງ ຢູ່ເມືອງເຟືອງຈະໄດ້ຊົມໃຊ້ນ້ຳປະປາທີ່ມີຄວາມສະອາດ ແລະຖືກຫຼັກອະນາໄມ ທີ່ໄດ້ຜ່ານການກັ່ນຕອງຕາມລະບົບນ້ຳປະປາ,.

ໃນໂອກາດນີ້ ທ່ານ ເຈົ້າເມືອງໆເຟືອງ ຍັງໄດ້ມີຄຳເຫັນຊີ້ນຳຄະນະກຳມະການຂັ້ນເມືອງ , ບໍລິສັດພັດທະນາເມືອງລາວ ແລະບ້ານທີ່ກ່ຽວຂ້ອງ ຈົ່ງພ້ອມກັນເອົາໃຈໃສ່ປະຕິບັດຕາມບົດບັນທຶກທີ່ໄດ້ຕົກລົງເອກະພາບ ພ້ອມກັນລົງສຳຫຼວດໃຫ້ທ່ວງທັນກັບເວລາທີ່ກຳນົດ ເພຶ່ອເຮັດໃຫ້ໂຄງການດັ່ງກ່າວນີ້ເກີດຂື້ນຢ່າງແທ້ຈິງ.

ພາບ-ຂ່າວໂດຍ:ຄໍາລຸນ ສົມວົງໄຊ