ອຸຕຸນິຍົມແຈ້ງເຕືອນໄພຝົນຕົກໜັກ! ວັນທີ 31 ກໍລະກົດ ຫາ 04 ສິງຫາ 2020

ອຸຕຸນິຍົມແຈ້ງເຕືອນໄພຝົນຕົກໜັກ! ວັນທີ 31 ກໍລະກົດ ຫາ 04 ສິງຫາ 2020

July 31, 2020 0 By admin

ກົມອຸຕຸນິຍົມ ແລະ ອຸທົບກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ອອກແຈ້ງເລກທີ 1025/ກອຕທ, ນະຄອນຫຼວງວຽງຈັນ ລົງ ວັນທີ 31 ກໍລະກົດ 2020 ເຕືອນໄພຝົນຕົກໜັກ ວັນທີ 31 ກໍລະກົດ ຫາ 4 ສິງຫາ 2020 .

ເນື່ອງຈາກພາຍຸດີເປຣຊັ້ນ ໄດ້ກໍ່ໂຕຢູ່ທະເລຈີນໃຕ້, ໃນເວລາ 7 ໂມງເຊົ້າຂອງວັນທີ 31 ກໍລະກົດ 2020 ມີຈຸດສູນກາງຢູ່ເສັ້ນຂະໜານທີ່ 16.9 ອົງສາເໜືອ ແລະ ເສັ້ນແວງທີ 113.1 ອົງສາຕາເວັນອອກ ພວມເຄື່ອນທີ່ໄປທາງທິດຕາເວັນຕົກ-ຕາເວັນຕົກສ່ຽງເໜືອ ດ້ວຍຄວາມໄວ 20 ກິໂລແມັດຕໍ່ຊົ່ວໂມງ, ພ້ອມດຽວກັນມໍລະສຸມຕາເວັນຕົກສ່ຽງໃຕ້ມີກໍາລັງແຮງເພີ່ມຂື້ນພັດປົກຄຸມຢູ່ທົ່ວທຸກພາກຂອງປະເທດລາວ.


ດັ່ງນັ້ນ ໃນໄລຍະວັນທີ 31 ກໍລະກົດ ຫາ 1 ສິງຫາ 2020 ຈະມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກໜັກ ຢູ່ບາງທ້ອງຖິ່ນແຂວງພາກເໜືອດ້ານຕາເວັນອອກ ລົງຫາ ພາກກາງ ແລະ ພາກໃຕ້ ເຊັ່ນ: ແຂວງ ຫົວພັນ, ຊຽງຂວາງ, ວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ອັດຕະປື.


ໃນໄລຍະວັນທີ 2 ຫາ 4 ສິງຫາ 2020 ຈະມີຝົນຕົກເປັນບໍລິເວນກວ້າງ, ພ້ອມຈະມີລົມພັດແຮງໃນຂອບເຂດທົ່ວປະເທດ. ດັ່ງນັ້ນ, ຈຶ່ງແຈ້ງເຕືອນເຖິງອົງການປົກຄອງທຸກພາກສ່ວນ ແລະ ປະຊາຊົນບັນດາເຜົ່າ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ ແລະ ລົມພັດແຮງ, ທີ່ຈະເຮັດໃຫ້ເກີດມີຟ້າຜ່າ, ນ້ຳຖ້ວມຊູ, ຖ້ວມອັ່ງ ແລະ ດິນເຈື່ອນ.

ຢູ່ບັນດາແຂວງ ຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ຫຼວງນ້ຳທາ, ບໍ່ແກ້ວ, ຫຼວງພະບາງ, ໄຊຍະບູລີ, ວຽງຈັນ, ໄຊສົມບຸນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ, ອັດຕະປື ແລະ ນັບທັງນະຄອນຫຼວງວຽງຈັນ.