ປະມວນພາບຂະບວນແຫ່ ພຣະເຈົ້າໄຊຍະເຊດຖາທິຣາດ ເຖິງແຂວງຈຳປາສັກ

ປະມວນພາບຂະບວນແຫ່ ພຣະເຈົ້າໄຊຍະເຊດຖາທິຣາດ ເຖິງແຂວງຈຳປາສັກ

July 31, 2020 0 By admin

ຂປລ. ຂະບວນແຫ່ຮູບຫລໍ່ທອງເຫລືອງ ພຣະເຈົ້າໄຊຍະເຊດຖາທິຣາດ ມະຫາຣາດ ພ້ອມດ້ວຍຊ້າງ ແລະ ພຣະພຸດທະຮູບ ໄດ້ເຄື່ອນຍ້າຍອອກຈາກນະຄອນໄກສອນ ພົມວິຫານ ແຂວງສະຫວັນນະເຂດ ເຖິງ ນະຄອນປາກເຊ ແຂວງຈຳປາສັກ ໃນຕອນແລງຂອງວັນທີ 30 ກໍລະກົດ 2020

ນຳພາໂດຍທ່ານ ບົວເງິນ ຊາພູວົງ ຮອງລັດຖະມົນຕີ ກະຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ ໂດຍໃຫ້ກຽດຕ້ອນຮັບ ຈາກທ່ານ ວິໄລວົງ ບຸດດາຄຳ ເຈົ້າແຂວງ ຈຳປາສັກ, ມີບັນດາການນຳ ພັກ-ລັດແຂວງ ແລະ ມວນຊົນ ຊາວແຂວງຈຳປາສັກ ເຂົ້າຮ່ວມຢ່າງຫລວງຫລາຍ.


ຂະຂວນແຫ່ພຣະເຈົ້າໄຊຍະເຊດຖາທິຣາດ ຈະພັກຄ້າງຄືນທີ່ນະຄອນປາກເຊ ຊຶ່ງເປັນແຂວງສຸດທ້າຍ ກ່ອນເດີນທາງເຖິງສະຖານທີ່ປະດິດສະຖານ ຢູ່ອານຸສາວະລີ ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື. ໂດຍຕອນຄ່ຳຈະມີພິທີທາງສາສະໜາ ສູດປະຣິຕະມຸງຄຸນ ເສີມບຸນປຣະຣາມີ ຈາກ ພຣະສົງ ແລະ ເປີດໂອກາດໃຫ້ມວນຊົນຊາວແຂວງຈຳປາສັກ ໄດ້ກາບໄຫວ້ ຊັກກະລະບູຊາ ພ້ອມທັງໂມທະນາທານຕາມເວລາອັນຄວນ.

ສ່ວນໃນຕອນເຊົ້າ ຈະມີພິທີທາງສາສະໜາ ແລະ ໃສ່ບາດ ຖວາຍສັງຄະຖານ ພຣະສົງ 39 ອົງ ເພື່ອອຸທິດແດ່ ພຣະເຈົ້າໄຊຍະເຊດຖາທິຣາດມະຫາຣາດ ຈາກການນຳພັກ-ລັດ ແລະ ອອກຕົນຍາດໂຍມ ແຂວງຈຳປາສັກ ກ່ອນເດີນທາງໄປຍັງແຂວງອັດຕະປື.