ເຈົ້າແຂວງ ໄຊຍະບູລີ ເຄື່ອນໄຫວຢ້ຽມຢາມປະຊາຊົນ ບ້ານນໍ້າພຽງ ເມືອງບໍ່ແຕນ

ເຈົ້າແຂວງ ໄຊຍະບູລີ ເຄື່ອນໄຫວຢ້ຽມຢາມປະຊາຊົນ ບ້ານນໍ້າພຽງ ເມືອງບໍ່ແຕນ

July 31, 2020 0 By admin

ຂປລ. ໃນວັນທີ 30 ກໍລະກົດ 2020 ນີ້, ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ, ປະທານປ້ອງກັນຊາດ-ປ້ອງກັນຄວາມສະຫງົບແຂວງ ໄດ້ນໍາພາ ທ່ານ ພົນຈັດຕະວາ ສີພັນ ພຸດທະວົງ ຫົວໜ້າກົມຊາຍແດນ ກະຊວງປ້ອງກັນປະເທດ ພ້ອມດ້ວຍທີມງານ ລົງຢ້ຽມຢາມ ແລະ ໂອ້ລົມປະຊາຊົນ ບ້ານນໍ້າພຽງ ເມືອງບໍ່ແຕນ ແຂວງໄຊຍະບູລີ.


ໃນໂອກາດນີ້ ໄດ້ຮັບຟັງການລາຍງານສະພາບຂອງບ້ານຈາກ ທ່ານ ຄໍາແພງ ພູສີຄໍາ ນາຍບ້ານ ນໍ້າພຽງ, ທ່ານ ໄດ້ກ່າວວ່າ: ບ້ານນໍ້າພຽງ ໄດ້ສ້າງຕັ້ງຂຶ້ນໃນຕົ້ນປີ 2017, ເປັນບ້ານ ທີ່ຕັ້ງຢູ່ລຽບຊາຍແດນ ລາວ-ໄທ, ມີ 50 ຄອບຄົວ, ມີຈຳນວນພົນລະເມືອງ 293 ຄົນ, ຍິງ 147 ຄົນ, ອາຊີບສ່ວນໃຫຍ່ແມ່ນເຮັດນາ, ເຮັດສວນປູກພືດ ແລະ ລ້ຽງສັດ, ເປັນຕົ້ນແມ່ນ ປູກສາລີ, ມັນຕົ້ນ, ໝາກເດືອຍ ແລະ ອື່ນໆ.

ພ້ອມນີ້ຄະນະບ້ານ ຍັງໄດ້ເຮັດໜ້າທີ່ເຄື່ອນໄຫວຮ່ວມກັບອ້າຍນ້ອງທະຫານຊາຍແດນທີ່ປະຈໍາແຕ່ລະປ້ອມ ກວດກາຂອບເຂດຊາຍແດນທີ່ບ້ານຮັບຜິດຊອບ, ເຮັດໃຫ້ບໍລິເວນດັ່ງກ່າວມີຄວາມສະຫງົບໂດຍພື້ນຖານ, ຈາກນັ້ນ ທ່ານເຈົ້າແຂວງ ກໍ່ໄດ້ຮຽກຮ້ອງໃຫ້ອົງການປົກຄອງບ້ານ ສືບຕໍ່ຊື້ນໍາ-ນໍາພາປະຊາຊົນໃນການປູກພືດເປັນສິນຄ້າໃຫ້ຫລາຍ, ປູກໃນສະຖານທີ່ ທີ່ຂັ້ນເທິງໄດ້ຈັດສັນໃຫ້, ເອົາໃຈໃສ່ປົກປັກຮັກສາປ່າໄມ້, ຮັກສາສຸຂະພາບ ພ້ອມທັງປ້ອງກັນ ແລະ ເຝົ້າລະວັງການແພ່ລະບາດຂອງພະຍາດຄົນ, ສັດ ຕາມລະດູການ ແລະ ການລະບາດຂອງພະຍາດ ໂຄວິດ-19, ຮັກສາຄວາມສາມັກຄີໃຫ້ເປັນປືກແຜ່ນ, ສືກສາອົບຮົມລູກຫລານໃຫ້ຫ່າງໄກຈາກຢາເສບຕິດ ແລະ ເປັນເຈົ້າການໃນການປ້ອງກັນຊາຍແດນຮ່ວມກັບອ້າຍນ້ອງທະຫານຊາຍແດນໃຫ້ມີຄວາມສະຫງົບ.


ຈາກນັ້ນ ທ່ານ ເຈົ້າແຂວງ ກໍ່ໄດ້ນໍາພາທີມງານຂອງ ທ່ານ ນາຍພົນ ຢ້ຽມຢາມອ້າຍນ້ອງທະຫານຊາຍແດນທີ່ເຮັດໜ້າທີ່ປ້ອງກັນຊາຍແດນຢູ່ປ້ອມນໍ້າພຽງ, ປ້ອມພູວຽງ 1 ແລະ ພູວຽງ 2, ໂດຍໄດ້ຖາມຂ່າວຄາວ, ຄວາມສຸກທຸກ ແລະ ໃຫ້ກໍາລັງໃຈຕໍ່ອ້າຍນ້ອງທະຫານຊາຍແດນແຕ່ລະຄົນ, ພ້ອມທັງໄດ້ຮຽກຮ້ອງໃຫ້ອ້າຍນ້ອງທະຫານແຕ່ລະສະຫາຍ ທີ່ປະຈໍາແຕ່ລະປ້ອມຈົ່ງເຊີດຊູທຸກກໍາລັງແຮງເຂົ້າໃນການປະຕິບັດໜ້າທີ່ ທີ່ຊາດໄດ້ມອບໝາຍໃຫ້, ກໍ່ຄືການຮັກສາຊາຍແດນ, ເຂດນໍ້າແດນດິນອັນຄົບຖ້ວນຂອງຊາດ ເວົ້າລວມ, ເວົ້າສະເພາະແມ່ນເຂດນໍ້າແດນດິນຂອງແຂວງໄຊຍະບູລີ ໄວ້ໃຫ້ໝັ້ນຄົງ, ພ້ອມກັນອົດທົນຜ່ານຜ່າອຸປະສັກນານາປະການ ເພື່ອເຮັດໜ້າທີ່ວິຊາສະເພາະໃຫ້ສໍາເລັດ.


ໃນໂອກາດຢ້ຽມຢາມຄັ້ງນີ້, ທ່ານ ພົງສະຫວັນ ສິດທະວົງ ປະທານປ້ອງກັນຊາດ ປ້ອງກັນຄວາມສະຫງົບແຂວງ ແລະ ທ່ານ ພົນຈັດຕະວາ ສີພັນ ພຸດທະວົງ ຫົວໜ້າກົມຊາຍແດນ ກະຊວງປ້ອງກັນປະເທດ ຍັງໄດ້ນໍາເອົາເຄື່ອງອຸປະໂພກ ບໍລິໂພກ ແລະ ເຄື່ອງກິລາ ມອບໃຫ້ອ້າຍນ້ອງທະຫານທີ່ເຮັດໜ້າທີ່ປ້ອງກັນຊາຍແດນ.

ຂ່າວ-ພາບ: ອຸ່ນເຮືອນ ໂພທິລັກ