ຕິດຕາມ! ແຊ້ມປ້ຽນລີກ ແລະ ຢູໂຣປ້າລີກ ລະດູການນີ້ ຮອບ 8 ທີມເຖິງຮອບຊິງ ແຂ່ງແບບນັດດຽວ ເລີ່ມເດືອນສິງຫານີ້!!

ຕິດຕາມ! ແຊ້ມປ້ຽນລີກ ແລະ ຢູໂຣປ້າລີກ ລະດູການນີ້ ຮອບ 8 ທີມເຖິງຮອບຊິງ ແຂ່ງແບບນັດດຽວ ເລີ່ມເດືອນສິງຫານີ້!!

June 18, 2020 0 By admin

ສະຫະພັນບານເຕະເອີຣົບ ຫລື ຢູຟ້າ ມີມະຕິເປັນເອກະສັນ ປັບປ່ຽນການແຂ່ງຂັນ ຢູຟ້າ ແຊ້ມປ້ຽນລີກ ແລະ ຢູໂຣປ້າລີກລະດູການນີ້ໃຫ້ສັ້ນລົງ ແລະ ປອດໄພຂຶ້ນ ຈາກເຊື້ອພະຍາດ ໂຄວິດ-19 ໂດຍສະເພາະໃນຮອບ 8 ທີມສຸດທ້າຍ ຈົນເຖິງຮອບຊິງຊະນະເລີດ ຈະແຂ່ງແບບນັດດຽວ ຢູ່ສະໜາມເປັນກາງ ໂດຍ ຢູຟ້າ ແຊ້ມປ້ຽນລີກ ຈະແຂ່ງຢູ່ນະຄອນຫລວງລິສບ້ອນ, ປະເທດປັອກຕຸຍການ ແລະ ຢູໂຣປ້າລີກ ຈະແຂ່ງຢູ່ປະເທດເຢຍລະມັນໃນ 4 ເມືອງຄື: ໂຄໂລນ, ດຸຍສະບວກ, ດຸສເຊວດັອຟ ແລະ ເກວເຊັ້ນເຄີເຊິນ.

ສ່ວນຮອບ 16 ທີມສຸດທ້າຍ ນັດທີ 2 ຂອງແຊ້ມປ້ຽນລີກ ລະດູການນີ້ ໃຫ້ສືບຕໍ່ແຂ່ງຂັນທີ່ບ້ານອີກຝ່າຍໜຶ່ງ, ຈະແຂ່ງຂັນໃນວັນທີ 7-8 ສິງຫາ, ຮອບ 8 ທີມຈະແຂ່ງຂັນວັນທີ 12-15 ສິງຫາ, ຮອບ 4 ທີມສຸດທ້າຍຈະແຂ່ງຂັນວັນທີ 18-19 ແລະ ຮອບຊິງະແຂ່ງຂັນວັນທີ 23 ສິງຫາ 2020 ທີ່ສະໜາມ ເອັສຕາດີໂອ ດາລຸຊ, ນະຄອນຫລວງລິສບ້ອນ, ປະເທດປັອກຕຸຍການ.

ຂະນະທີ່ ຮອບ 16 ທີມສຸດທ້າຍ ນັດທີ 2 ຂອງຢູໂຣປ້າລີກ ລະດູການນີ້ ຍັງບໍ່ທັນຕັດສິນ ອາດຈັດທີ່ບ້ານອີກຝ່າຍໜຶ່ງ ຫລື ສະໜາມເປັນກາງທີ່ເຢຍລະມັນ, ໂດຍຈະແຂ່ງຂັນໃນວັນທີ 5-6 ສິງຫາ, ສ່ວນ 2 ຄູ່ທີ່ຍັງບໍ່ໄດ້ແຂ່ງນັດທີ 1 ຮອບ 16 ທີມຄື: ອິນເຕີ ມິລານ ພົບ ເກຕາເຟ່ ແລະ ເຊບີຢ້າ ພົບ ໂຣມ້າ ແມ່ນໃຫ້ແຂ່ງນັດດຽວຢູ່ສະໜາມເປັນກາງ.

ສ່ວນຮອບ 8 ທີມຈົນໄປເຖິງຮອບຊິງຈະແຂ່ງຂັນຢູ່ສະໜາມເປັນກາງທີ່ເຢຍລະມັນ ໂດຍຮອບ 8 ທີມ ຈະແຂ່ງຂັນວັນທີ 10-11 ສິງຫາ, ຮອບ 4 ທີມສຸດທ້າຍຈະແຂ່ງຂັນວັນທີ 16-17 ແລະ ຮອບຊິງະແຂ່ງຂັນວັນທີ 21 ສິງຫາ 2020 ທີ່ສະໜາມ ເຣນແອເນີຈີ້ ສະຕາດີອົງ, ໃນເມືອງໂຄໂລນ, ປະເທດເຢຍລະມັນ.

ສຳລັບສະໜາມທີ່ກຳນົດໃຫ້ເປັນເຈົ້າພາບຮອບຊິງ ແຊ້ມປ້ຽນລີກ ແລະ ຢູໂຣປ້າລີກ ລະດູການນີ້ ກ່ອນການລະບາດຂອງພະຍາດ ໂຄວິດ-19 ຄື: ສະໜາມອັນຕາຕຸກ (Atatürk Olympic) ໃນນະຄອນອິສຕັນບູນ, ປະເທດຕວກກີ້ ຈະເປັນເຈົ້າພາບສັງວຽນຮອບຊິງ ແຊ້ມປ້ຽນລີກ ແລະ ສະໜາມສະຕາດີອົງ ອີເນີກ້າ ກະດັ້ນ (Stadion Energa Gdańsk ), ໃນເມືອງ ປະເທດໂປໂລຍ ຈະເປັນເຈົ້າພາບຮອບຊິງ ຢູໂຣປ້າລີກ ໃຫ້ເລື່ອນໄປເປັນເຈົ້າພາບໃນລະດູການຕໍ່ໄປ.

ສ່ວນການແຂ່ງຂັນເຕະບານ ແຊ້ມປ້ຽນລີກ ປະເພດຍິງ ຫຼື Women’s Champions League 2019-20 ຮອບນັອກເອົ້າ ຈະແຂ່ງຂັນໃນວັນທີ 21–30 ສິງຫານີ້ ທີ່ພາກເໝືອຂອງປະເທດແອັສປາຍ. ຂະນະທີ່ ຢູຟ້າ ຊຸບເປີຄັບ ຈະຈັດຢູ່ສະໜາມ ປຸສກັສ ອາຣີນ້າ ໃນນະຄອນຫລວງປູດາເປັສ ປະເທດຮົງກາຣີ ໃນວັນທີ 24 ກັນຍາ 2020.

Photo: UEFA Champions League & UEFA Europa League