ນາຍົົກລັດຖະມົນຕີ ເຄື່ອນໄຫວຊຸກຍູ້ການລົງທຶນ ຢູ່ນະຄອນຫລວງວຽງຈັນ

ນາຍົົກລັດຖະມົນຕີ ເຄື່ອນໄຫວຊຸກຍູ້ການລົງທຶນ ຢູ່ນະຄອນຫລວງວຽງຈັນ

July 30, 2020 0 By admin

ຂປລ. ໃນວັນທີ 30 ກໍລະກົດ 2020 ນີ້, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະ ໄດ້ລົງເຄື່ອນໄຫວ, ຢ້ຽມຢາມ ການພັດທະນາໂຄງການທ່າບົກ ທ່ານາແລ້ງ ແລະ ເຂດໂລຈິດສະຕິກ ນະຄອນຫລວງວຽງຈັນ, ຢູ່ເຂດທ່ານາແລ້ງ ເມືອງຫາດຊາຍຟອງ, ລົງຢ້ຽມຢາມ ໂຄງການກໍ່ສ້າງສະຖານີລົດໄຟ ນະຄອນຫລວງວຽງຈັນ ຢູ່ບ້ານໄຊ ເມືອງໄຊທານີ ແລະ ລົງເຄື່ອນໄຫວຢ້ຽມຢາມ ຫໍພິພິທະພັນ ວຽງຈັນສິລະປະຮ່ວມສະໄໝ ຢູ່ບ້ານຊ້າງຄູ້ ເມືອງໄຊທານີ ນະຄອນຫລວງວຽງຈັນ ເພື່ອຊຸກຍູ້, ສົ່ງເສີມ ແລະ ໃຫ້ທິດຊີ້ນຳແກ່ຜູ້ປະກອບການ ກໍຄື ຜູ້ລົງທຶນໃຫ້ຈັດຕັ້ງປະຕິບັດໂຄງການດັ່ງກ່າວ, ໃຫ້ສຳເລັດຕາມເປົ້າໝາຍ ແລະ ຖືກຕ້ອງ, ສອດຄ່ອງຕາມກົດໝາຍ ແລະ ລະບຽບການທີ່ພັກ, ລັດ ວາງອອກ.


ສະເພາະໂຄງການທ່າບົກ ທ່ານາແລ້ງ ແລະ ເຂດໂລຈິດສະຕິກ ນະຄອນຫລວງວຽງຈັນ, ທ່ານ ຈັນທອນ ສິດທິໄຊ ປະທານບໍລິສັດ ວຽງຈັນ ໂລຈິດສະຕິກ ພຣາກ ຈຳກັດ ໄດ້ລາຍງານໃຫ້ຮູ້ວ່າ: ໂຄງການດັ່ງກ່າວ, ຈະສ້າງເຂດໂລຈິດສະຕິກ ທີ່ເປັນຕົວເມືອງສີຂຽວ ເນັ້ນທໍາມະຊາດເປັນສ່ວນໃຫ່ຍ, ເປັນຕົວເມືອງທີ່ທັນສະໄໝ ແລະ ສີວິໄລ ເຊິ່ງແຜນແມ່ບົດລວມຂອງໂຄງການດັ່ງກ່າວ ຍັງມີການສ້າງສະຖານີຄ່ຽນຖ່າຍສິນຄ້າ ທ່າບົກ-ທ່ານາແລ້ງ ທີ່ເຊື່ອມຈອດກັບທາງລົດໄຟລາວ – ຈີນ ແລະ ທາງລົດໄຟ ລາວ-ໄທ ໂດຍມີພາລະກິດຫລັກໃນການແກ້ໄຂບັນຫາຄວາມແອອັດ, ຂັ້ນຕອນຫຍຸ້ງຍາກໃນການຂົນສົ່ງສິນຄ້າຂ້າມແດນ ເພື່ອໃຫ້ເປັນພື້ນຖານໂຄງລ່າງແຫ່ງຊາດລະດັບສາກົນ, ຊຶ່ງປັດຈຸບັນແມ່ນສຳເລັດການສຳຫລວດ ແລະ ຈະເລີ່ມກໍ່ສ້າງສໍານັກງານຫ້ອງການ ໃນເດືອນສິງຫານີ້, ຄາດວ່າຈະເລີ່ມໃຫ້ບໍລິການໃນເດືອນມີນາ 2021. ສ່ວນການພັດທະນາເຂດໂລຈິດສະຕິກ ນະຄອນຫລວງວຽງຈັນ ທີ່ຈະກາຍເປັນຕົວເມືອງໃໝ່ນັ້ນ ຄາດວ່າຈະເລີ່ມໃຫ້ບໍລິການໃນເດືອນຕຸລາ 2021.


ພ້ອມດຽວກັນນີ້, ທ່ານ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍຕໍ່ກັບການສ້າງແຜນລວມຂອງໂຄງການໄດ້ສຳເລັດ ແລະ ໄດ້ເນັ້ນໃຫ້ບໍລິສັດວຽງຈັນ ໂລຈິດສະຕິກ ພຣາກ ກັບ ບໍລິສັດທາງລົດໄຟ ລາວ – ຈີນ ສືບຕໍ່ເຮັດວຽກຮ່ວມກັນໃຫ້ກົມກ່ຽວ, ຊ່ວຍເຫລືອເຊິ່ງກັນ ແລະ ກັນ, ເຊິ່ງໂຄງການນີ້ ຈະເປັນສູນກາງທາງດ້ານໂລຈິດສະຕິກ ທີ່ໃຫຍ່ທິ່ສຸດ ຕ້ອງສ້າງສິ່ງອື່ນໆມາຊ່ວຍໜູນເປັນຕົ້ນແມ່ນຮ້ານຄ້າ, ຮ້ານອາຫານ, ການບໍລິການອື່ນໆ ຖ້າບໍ່ມີໂຄງການແມ່ນຈະບໍ່ສາມາດສໍາເລັດໄດ້ ແລະ ຕ້ອງສ້າງເຂດໂລຈິດສະຕິກ ຕາມແຜນແມ່ບົດທີ່ຈະມີຕົວເມືອງໃໝ່ ທີ່ເປັນຕົວເມືອງສີຂຽວ, ທັນສະໄໝ, ສີວິໄລໄດ້ຢ່າງຖືກຕ້ອງ.


ສຳລັບຢູ່ສະຖານີລົດໄຟ ນະຄອນຫລວງວຽງຈັນ, ທ່ານ ສ້ຽວ ຊຽນເຫວິນ (Xiao Qianwen) ຜູ້ອໍານວຍການໃຫຍ່ ບໍລິສັດທາງລົດໄຟ ລາວ – ຈີນ ໄດ້ລາຍງານໃຫ້ຮູ້ ກ່ຽວກັບຄວາມຄືບໜ້າຂອງການກໍ່ສ້າງທາງລົດໄຟ ລາວ-ຈີນ, ເຊິ່ງປັດຈຸບັນ ໄດ້ສຳເລັດການເຈາະອຸໂມງ 71 ອຸໂມງ ຈາກທັງໝົດ 75 ອຸໂມງ, ສໍາເລັດການກໍ່ສ້າງຂົວ 88%, ທາງ 100%, ການວາງລາງລົດໄຟ ສໍາເລັດ 21,4% ຄາດວ່າທ້າຍປີນີ້ ຈະວາງລາງຮອດແຂວງຫລວງພະບາງ ແລະ ສຳເລັດການຕິດຕັ້ງເສົາໄຟແຮງສູງ 57,4% ແຕ່ຍັງມີບາງສະຖານີ ທີ່ຍັງບໍ່ທັນໄດ້ລົງມືກໍ່ສ້າງ ຍ້ອນຖືກຜົນກະທົບອັນໜັກໜ່ວງຈາກການລະບາດຂອງພະຍາດໂຄວິດ-19 ແລະ ມີບາງພື້ນທີ່ຍັງຢູ່ໃນຂັ້ນຕອນໄກ່ເກ່ຍກັບປະຊາຊົນ. ພາຍຫລັງຮັບຟັງການລາຍງານແລ້ວ, ທ່ານ ນາຍົກລັດຖະມົນຕີ ກໍໄດ້ສະແດງຄວາມຊົມເຊີຍບໍລິສັດດັ່ງກ່າວ, ຕໍ່ການກໍ່ສ້າງທາງລົດໄຟ ທີ່ໄດ້ມີຄວາມຄືບໜ້າມາເລື້ອຍໆ ພ້ອມທັງໄດ້ເນັ້ນໃຫ້ບໍລິສັດ ແລະ ພາກສ່ວນກ່ຽວຂ້ອງໄກ່ເກ່ຍກັບປະຊາຊົນ ແຕ່ສະຖານີນະຄອນຫລວງວຽງຈັນ ໄປຫາສະຖານີ ທ່ານາແລ້ງ ໃນໄລຍະທາງ 12,7 ກິໂລແມັດ, ໃຫ້ແກ້ໄຂຢ່າງມີລະບົບບໍ່ໃຫ້ເກີດມີບັນຫາ ແລະ ການຈັດຕັ້ງປະຕິບັດການກໍ່ສ້າງທາງລົດໄຟລາວ – ຈີນ ຕ້ອງເຮັດຖືກຕ້ອງຕາມການລົງນາມຂອງລັດຖະບານລາວ ແລະ ລັດຖະບານຈີນ. ພ້ອມນັ້ນ, ທ່ານນາຍົກ ຍັງໄດ້ສະເໜີໃຫ້ ບໍລິສັດທາງລົດໄຟລາວ-ຈີນ ພິຈາລະນາ ແລະ ອະນຸຍາດ ໃຫ້ພາກສ່ວນອື່ນເຂົ້າມາມີສ່ວນຮ່ວມ ຖ້າເຂົາເຈົ້າມີຄວາມສົນໃຈມາລົງທຶນນຳ ຫລື ພັດທະນາດ້ານອື່ນໆ ຕາມແລວທາງລົດໄຟ ເພື່ອໃຫ້ມີສ່ວນຮ່ວມໃນການພັດທະນາໃຫ້ຫລາຍຂຶ້ນ.


ສ່ວນຢູ່ຫໍພິພິດທະພັນ ວຽງຈັນສິລະປະຮ່ວມສະໄໝ ທ່ານ ພິຊິດ ໄຊຍະທິດ, ຜູ້ສ້າງຕັ້ງ ແລະ ຜູ້ອຳນວຍການ ຫໍພິພິທະພັນວຽງຈັນສິນລະປະຮ່ວມສະໄໝ ໄດ້ລາຍງານໃຫ້ຮູ້ ກ່ຽວກັບປະຫວັດຄວາມເປັນມາ ແລະ ແຮງຈູງໃຈ ຂອງການສ້າງພິພິດຕະພັນດັ່ງກ່າວ, ເຊິ່ງຫໍພິພິທະພັນວຽງຈັນສິລະປະຮ່ວມສະໄໝ ເປັນພິພິທະພັນ ທີ່ມີຄວາມສວຍງາມ, ມີເຄື່ອງຫັດຖະກຳ, ເຄື່ອງແກະສະຫລັກຫລາກຫລາຍຮູບແບບທີ່ມີຄວາມສວຍງາມ ໄວ້ຄອຍໃຫ້ແຂກທັງພາຍໃນ ແລະ ຕ່າງປະເທດ ເຂົ້າມາເບິ່ງມາຊົມ, ເຊິ່ງໄດ້ສຸມທຶນຮອນຢ່າງມະຫາສານເພື່ອສະສົມໄມ້ເສດ ແລະ ເຕົ້າໂຮມ ເອົາວິຈິດຕະກອນທີ່ມີຊື່ສຽງຂອງລາວ ມາສ້າງງານສິນ ແລະ ສະສົມໄວ້ ເພື່ອເປັນມໍລະດົກຂອງຊາດ ກໍຄື ຂອງໂລກ, ພ້ອມນັ້ນຈະເປັນບ່ອນໃຫ້ຄົນລຸ້ນຫລັງໄດ້ມາສຶກສາຮຽນຮູ້ງານສິນລະປະ, ຜະລິດຕະພັນທາງທຳມະຊາດ ແລະ ປະຫວັດສາດ ນຳອີກ. ສຳລັບທິດທາງໃນຕໍ່ໜ້າ ຈະສ້າງຫໍພິພິທະພັນແຫ່ງໃໝ່ ຢູ່ໜອງເຊືອມ ໃນເນື້ອທີ່ປະມານ 22 ເຮັກຕາ ເພື່ອຮອງຮັບນັກທ່ອງທ່ຽວ ໃຫ້ໄດ້ປະມານ 5.000 ຄົນຕໍ່ມື້, ເພື່ອກະກຽມຕ້ອນຮັບນັກທ່ອງທ່ຽວຈີນ ພາຍຫລັງສຳເລັດກໍ່ສ້າງທາງລົດໄຟຄວາມໄວສູງ ແລະ ນັກທ່ອງທ່ຽວອາຊຽນ ແລະ ອື່ນໆ ພາຍຫລັງສາມາດຄວບຄຸມການແພ່ລະບາດຂອງພະຍາດໂຄວິດ-19ໄດ້.


ໂອກາດນີ້, ທ່ານ ນາຍົກລັດຖະມົນຕີ ກໍໄດ້ກ່າວຍ້ອງຍໍຊົມເຊີຍ ຕໍ່ທ່ານ ພິຊິດ ໄຊຍະທິດ ທີ່ໄດ້ສ້າງພິພິທະພັນນີ້ຂຶ້ນມາ, ເຊິ່ງເປັນການດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ຫລາຍສົມຄວນ ທັງເປັນການນຳສະເໜີຜົນງານສິລະປະ ຫັດຖະກໍາ, ວັດທະນະທຳ ຂອງຊາດລາວ ແລະ ຂອງມວນມະນຸດຊາດຕໍ່ໄປ. ພ້ອມກັນນັ້ນ, ທ່ານ ນາຍົກລັດຖະມົນຕີ ຍັງໄດ້ເນັ້ນໃຫ້ພິພິທະພັນເອົາໃຈໃສ່ໃນການໃຫ້ຂໍ້ມູນ ແລະ ທີ່ມາຂອງທຸກຜົນງານທີ່ໄດ້ວາງສະແດງຢູ່ຫໍພິພິທະພັນແຫ່ງນີ້ ຢ່າງລະອຽດຈະແຈ້ງ ເພື່ອໃຫ້ຜູ້ເຂົ້າມາຢ້ຽມຊົມໄດ້ຮັບຮູ້ສິລະປະ ຫັດຖະກໍາທີ່ສວຍງາມ ແລະ ລໍ້າຄ່າຂອງລາວ.

ຂ່າວ: ທະນູທອງ, ພາບ: ອ່າຍຄຳ