ປະມວນພາບ ຊາວແຂວງສະຫວັນນະເຂດ ຕ້ອນຮັບຂະບວນແຫ່ຮູບຫຼໍ່ ພຣະເຈົ້າໄຊຍະເຊດຖາທິຣາດ

ປະມວນພາບ ຊາວແຂວງສະຫວັນນະເຂດ ຕ້ອນຮັບຂະບວນແຫ່ຮູບຫຼໍ່ ພຣະເຈົ້າໄຊຍະເຊດຖາທິຣາດ

July 30, 2020 0 By admin

ຂະບວນເຄື່ອນຍ້າຍແຫ່ຮູບຫຼໍ່ ພຣະເຈົ້າໄຊຍະເສດຖາທິຣາດ ພ້ອມດ້ວຍຊ້າງ ແລະ ພະພຸດທະຮູບ ຈາກນະຄອນຫຼວງວຽງຈັນ ລົງໄປແຂວງອັດຕະປື ໄດ້ເຄື່ອນຍ້າຍມາຮອດເທດສະບານແຂວງສະຫວັນະເຂດ ໃນຕອນບ່າຍຂອງວັນທີ 29 ກໍລະກົດ 2020.

ໂດຍມີການນຳພັກ-ລັດ ຮ່ວມຕ້ອນຮັບທີ່ວົງວຽນອາຊຽນ ຖະໜົນໄກສອນພົມວິຫານ, ນຳໜ້າຂະບວນແຫ່ໂດຍທ່ານ ປອ ໂພໄຊ ໄຊຍະສອນ ຮອງເຈົ້າແຂວງສະຫວັນະເຂດ, ທ່ານ ຄຳເຜີຍ ຜັນທະຈອນ ປະທານສະພາປະຊາຊົນແຂວງ, ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ-ວັດທະນະທຳ ແລະ ທ່ອງທ່ຽວ.

ພ້ອມດ້ວຍການນຳພັກ-ລັດ, ພະນັກງານ, ທະຫານ-ຕຳຫຼວດ, ກ້ອນກຳລັງຊາວໜຸ່ມ-ເຍົາວະຊົນ ແລະ ມວນຊົນຊາວນະຄອນໄກສອນພົມວິຫານ ກໍຄືແຂວງສະຫວັນະເຂດ, ກໍ່ຮ່ວມແຮ່ຂະບວນຢ່າງຄຶກຄື້ນ ດ້ວຍຄວາມສັດທາໃນອົງພຣະເຈົ້າໄຊຍະເສດຖາທິຣາດ, ຂະບວນແຫ່ເລີ່ມຍ່າງຈາກວົງວຽນອາຊຽນ ຖະໜົນໄກສອນພົມວິຫານ ໄປຕາມຖະໜົນຟ້າງຸ່ມ ເພື່ອໄປພັກຄືນທີ່ໜ້າສະໂມສອນຫ້ອງວາການປົກຄອງແຂວງສະຫັວນະເຂດ.


ຮ່ວມຮັບທີ່ໜ້າປະຕູຫ້ອງວ່າການປົກຄອງແຂວງສະຫວັນະເຂດ ໂດຍທ່ານ ສັນຕິພາບ ພົມວິຫານ ເຈົ້າແຂວງສະຫວັນະເຂດ ພ້ອມດ້ວຍ ການນຳ ແລະ ພະນັກງານບຳນານປະຕິວັດອາວຸໂສ ເຊິ່ງກໍແມ່ນຮັບຕາມຮີດຄອງປະເພນີກໍມີເຫຼົ້າຂາວ, ຜ້າແພ, ໄກ່ຕົ້ມ ຂັນຫ້າ, ຫຼັງຈາກນັ້ນກໍຮ່ວມນຳໜ້າຂະບວນແຮ່ເຂົ້າໄປທີ່ສະໂມສອນຫ້ອງວ່າການປົກຄອງແຂວງ.


ຂະບວນເຄື່ອນຍ້າຍແຫ່ຮູບຫຼໍ່ ພຣະເຈົ້າໄຊຍະເສດຖາທິຣາດ ພ້ອມດ້ວຍຊ້າງ ແລະ ພະພຸດທະຮູບ ເດີນທາງຈາກນະຄອນຫຼວງວຽງຈັນແຕ່ວັນທີ 27 ກໍລະກົດ, ໄດ້ພັກແຮມທີ່ແຂວງບໍລິຄຳໄຊ, ແຂວງຄຳມ່ວນ ແລະ ວັນທີ 29 ກໍ່ໄດ້ພັກແຮມທີ່ນະຄອນໄກສອນພົມວິຫານ ແຂວງສະຫວັນະເຂດ, ເຊິ່ງໄດ້ມີການຄົບງັນຕາມປະເພນີ ທີ່ເດີ່ນຫ້ອງວ່າການປົກຄອງແຂວງສະຫວັນະເຂດ.

ໃນນັ້ນກໍໄດ້ມີພິທີສູດປະລິຕະຄຸນ ຟັງທຳມະເທດສະໜາ, ນຸ່ງຂາວ ຮົມຂາວ ໄຫວ້ພະສູດມົນຕະຫຼອດຄ່ຳຄືນຂອງວັນທີ 29 ກໍລະກົດ. ເຊົ້າວັນຕໍ່ມາ ຄື ວັນທີ 30 ກໍລະກົດ 2020 ຢູ່ທີ່ຫ້ອງວ່າການປົກຄອງແຂວງ ຊາວແຂວງສະຫວັນນະເຂດ ກໍ່ຄື ມວນຊົນຊາວນະຄອນໄກສອນ ພົມວິຫານ ເຊິ່ງນໍາໂດຍ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ.

ທ່ານ ປອ.ແສງທອງ ວັງແກ້ວມະນີ ເຈົ້ານະຄອນໄກສອນ ພົມວິຫານ.ອະດີດ ຮອງເຈົ້າແຂວງອັດຕະປື ກໍໄດ້ຮ່ວມພິທີຕັກບາດ ຖວາຍທານ ຕໍ່ໜ້າຮູບຫຼໍ່່ພຣະເຈົ້າໄຊຍະເຊດຖາທິຣາດ ເພື່ອນໍາໄປປະດິດສະຖານ ທີ່ແຂວງອັດຕະປື ໂດຍມີພະສົງ 39 ອົງ ຮ່ວມສູດໄຊຍັນໂຕ-ຫົດນໍ້າມົນ ສົ່ງຂະບວນແຫ່ອອກແຫ່ອອກເດີນທາງ ເພື່ອເຄື່ອນຍ້າຍໄປແຂວງຈໍາປາສັກ ໃນການຮ່ວມຂະບວນ ແລະ ຢຸດພັກທີ່ແຂວງສະຫວັນນະເຂດ ກໍໄດ້ມີອໍານາດການປົກຄອງ ແລະ ປະຊາຊົນ ຮ່ວມທໍາບຸນ ເປັນປັດໄຈ ໜຶ່ງຮ້ອຍລ້ານກວ່າກີບ;

ພາຍຫຼັງຂະບວນແຫ່ ຈາກເທສະບານນະຄອນໄກສອນ ພົມວິຫານ ກໍຍັງໄດ້ມີອໍານາດການປົກຄອງ ແລະ ປະຊາຊົນ ຮ່ວມໂມທະນາທານນໍາຕາມສາຍທາງ ເປັນຕົ້ນຈຸດຫຼັກ35 ເມືອງຈໍາພອນ ແລະ ຂະບວນແຫ່ ຈະແວ່ພັກຊົ່ວຄາວ ຢູ່ເມືອງສອງຄອນ ເຊິ່ງມີພະສົງ ແລະ ການນໍາເມືອງ,ເຖົ້າແກ່ແນວໂຮມ ເມືອງສອງຄອນ ແຂວງສະຫວັນນະເຂດ ຮ່ວມຕ້ອນຮັບ,ທໍາບຸນ-ຮ່ວມທານ ແລະ ຈັດພິທີສູດໄຊຍັນໂຕ-ຫົດນໍ້າມົນ ສົ່ງຂະບວນ.

ຕາມແຜນ ຂະບວນເຄື່ອນຍ້າຍຈະໄປຮອດຈຸດໝາຍປາຍທາງທີ່ແຂວງອັດຕະປື ໃນວັນທີ 31 ກໍລະກົດ 2020 ເພື່ອຈັດພິທີສະຫຼອງ ແລະ ອັນເຊີນຂຶ້ນປະດິດສະຖານເທິງພຣະແທ່ນອະນຸສາວະລີ ແຂວງອັດຕະປືຢ່າງເປັນທາງການ.