ລັດຖະບານປ້ອງກັນໂຄວິດ-19ຈາກພາຍນອກຢ່າງເຂັ້ມງວດ! ສັ່ງຢຸດຊົ່ວຄາວການອະນຸຍາດໃຫ້ຍົນເຊົ່າເໝົາລໍາລະຫວ່າງປະເທດ

ລັດຖະບານປ້ອງກັນໂຄວິດ-19ຈາກພາຍນອກຢ່າງເຂັ້ມງວດ! ສັ່ງຢຸດຊົ່ວຄາວການອະນຸຍາດໃຫ້ຍົນເຊົ່າເໝົາລໍາລະຫວ່າງປະເທດ

July 30, 2020 0 By admin

ລັດຖະບານ ຕົກລົງສືບຕໍ່ຈັດຕັ້ງປະຕິບັດມາດຕະການຜ່ອນຜັນ ແລະ ຄວບຄຸມ ໃນໄລຍະແຕ່ວັນທີ 01 ຫາ 31 ສິງຫາ 2020 ຕາມທີ່ໄດ້ກໍານົດໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 697/ສຫນຍ, ລົງ ວັນທີ 30 ມິຖຸນາ 2020;  ພ້ອມນັ້ນກໍໃຫ້ຢຸດຊົ່ວຄາວການອະນຸຍາດໃຫ້ຍົນເຊົ່າເຫມົາລໍາລະຫວ່າງປະເທດ ກ່ອນ

ຫ້ອງວ່າການສຳນັກງານນາຍົກລັດຖະມົນຕີ ໄດ້ອອກແຈ້ງການ806/ຫສນຍ ລົງວັນທີ29 ກໍລະກົດ 2020  ເຖິງບັນດາ ທ່ານ ລັດຖະມົນຕີ, ຫົວຫນ້າອົງການທຽບເທົ່າ , ທ່ານ ເຈົ້າຄອງນະຄອນຫຼວງວຽງຈັນ ແລະ ບັນດາ ທ່ານ ເຈົ້າແຂວງທົ່ວປະເທດ;  ເລື່ອງ :ການສືບຕໍ່ປະຕິບັດ ບັນດາມາດຕະການຜ່ອນຜັນ, ປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ໃນໄລຍະແຕ່ ວັນທີ 01-31 ສິງຫາ 2020.

ອີງຕາມຄໍາສັ່ງ ຂອງທ່ານ ນາຍົກລັດຖະມົນຕີ ສະບັບເລກທີ 06/ນຍ, ລົງວັນທີ 29 ມີນາ 2020; ອີງຕາມການລາຍງານ ການຈັດຕັ້ງປະຕິບັດ ບັນດາມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດ ຂອງພະຍາດໂຄວິດ-19 ໃນໄລຍະຜ່ານມາ;  ອີງຕາມການປະກອບຄໍາເຫັນຂອງ ບັນດາ ທ່ານ ຮອງນາຍົກລັດຖະມົນຕີ ໂດຍຜ່ານຈົດຫມາຍວຽນ ແລະ ອີງຕາມການຊີ້ນໍາຂອງ ທ່ານ ນາຍົກລັດຖະມົນຕີ ໃນວັນທີ 29 ກໍລະກົດ 2020.

ຫ້ອງວ່າການສໍານັກງານນາຍົກລັດຖະມົນຕີ ຂໍຖືເປັນກຽດແຈ້ງມາຍັງທ່ານຊາບ ດັ່ງນີ້: ຜ່ານການຈັດຕັ້ງ ປະຕິບັດມາດຕະການຜ່ອນຜັນ ແລະ ມາດຕະການປ້ອງກັນ ໃນໄລຍະຜ່ານມາ, ພວກເຮົາ ສາມາດສົບຕໍ່ຄວບຄຸມການແຜ່ ລະບາດໄວ້ໄດ້ ໂດຍບໍ່ພົບຜູ້ຕິດເຊື້ອໃນຊຸມຊົນ ເປັນເວລາ 03 ເດືອນກວ່າ ເຮັດໃຫ້ສັງຄົມ, ພາກທຸລະກິດ, ຜູ້ປະກອບ ການ, ໂຄງການ ແລະ ໂຮງງານຕ່າງໆ ໄດ້ກັບມາໃຊ້ຊີວິດ ແລະ ເຄື່ອນໄຫວທຸລະກິດ ພາຍໃຕ້ເງື່ອນໄຂໃຫມ່ ເກືອບວ່າ ປົກກະຕິເປັນສ່ວນໃຫຍ່ມາໄລຍະຫນຶ່ງ.

ເຖິງຢ່າງໃດກໍຕາມ, ພວກເຮົາ ກໍບໍ່ໄດ້ເຜີຕົວ ແລະ ປະຫມາດຢ່າງເດັດຂາດ ເນື່ອງຈາກໃນຕໍ່ຫນ້າ ຍັງມີຄວາມສ່ຽງ ແລະ ສິ່ງທ້າທາຍ ທີ່ຈະເກີດມີການລະບາດອີກຮອບໃຫມ່ ຍ້ອນສະພາບການລະບາດຢູ່ໃນພາກພື້ນ ແລະ ໃນໂລກ ຍັງສືບຕໍ່ ເພີ່ມຂຶ້ນ ແລະ ຍັງບໍ່ສາມາດຢັບຢັ້ງການລະບາດ ຂອງພະຍາດດັ່ງກ່າວໄດ້ເທື່ອ. ພ້ອມກັນນັ້ນ ຖ້າພວກເຮົາບໍ່ຄຸ້ມຄອງການ ເດີນທາງ ເຂົ້າ-ອອກ ປະເທດ ຢ່າງຮັດກຸມ ກໍຈະມີຄວາມສ່ຽງໃນການຕິດເຊື້ອຈາກຜູ້ທີ່ມາຈາກຕ່າງປະເທດ ຄືດັ່ງທີ່ມີ ກໍລະນີທີ່ໄດ້ປະກາດອອກໄປແລ້ວນັ້ນ ແລະ ສາມາດກະຈາຍອອກເປັນວົງກວ້າງໄດ້.

ສະນັ້ນ, ຈຶ່ງມີຄວາມຈໍາເປັນຕ້ອງໄດ້ ສືບຕໍ່ເຂັ້ມງວດປະຕິບັດມາດຕະການປ້ອງກັນ, ຄວບຄຸມ ແລະ ສະກັດກັ້ນ ການລະບາດ ຂອງພະຍາດ COVID-19, ລັດຖະບານ ໄດ້ຕົກລົງ ແລະ ຊີ້ນໍາ ດັ່ງນີ້:

1. ໃຫ້ສືບຕໍ່ຈັດຕັ້ງປະຕິບັດມາດຕະການຜ່ອນຜັນ ແລະ ຄວບຄຸມ ໃນໄລຍະແຕ່ວັນທີ 01 ຫາ 31 ສິງຫາ 2020 ຕາມທີ່ໄດ້ກໍານົດໃນແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 697/ສຫນຍ, ລົງ ວັນທີ 30 ມິຖຸນາ 2020;


2. ໃຫ້ຢຸດຊົ່ວຄາວການອະນຸຍາດໃຫ້ຍົນເຊົ່າເຫມົາລໍາລະຫວ່າງປະເທດ ກ່ອນ ແລະ ໃຫ້ຄະນະສະເພາະກິດ ສົມທົບກັບ ກົມການບິນພົນລະເຮືອນ ອອກມາດຕະການໃຫມ່ ທີ່ຮັດກຸມ ສະເຫນີມາຍັງລັດຖະບານ ເພື່ອຂໍອະນຸມັດກ່ອນຈຶ່ງດໍາເນີນການໄດ້. ໃຫ້ກົມການບິນພົນລະເຮືອນ ເຈລະຈາຄືນ ກັບສາຍການບິນຕ່າງປະເທດ ທີ່ໄດ້ດໍາເນີນການຜ່ານມາ ຕື່ມອີກ.

3. ສໍາລັບມາດຕະການກ່ຽວກັບການຄຸ້ມຄອງຄົນເຂົ້າ-ອອກ ສປປ ລາວ ໃນໄລຍະແຕ່ວັນທີ 01-31 ສິງຫາ 2020 ມອບໃຫ້ຄະນະສະເພາະກົດ ເຮັດຄໍາແນະນໍາສະເພາະຕື່ມ. ດັ່ງນັ້ນ, ຈຶ່ງແຈ້ງມາຍັງທ່ານ ເພື່ອຊາບ ແລະ ປະຕິບັດຕາມເນື້ອໃນແຈ້ງການສະບັບນີ້ດ້ວຍ.

.