ສະຫາຍ ເຫລັກໄຫລ ສີວິໄລ  ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກແຂວງເຊກອງສະໄໝທີ X

ສະຫາຍ ເຫລັກໄຫລ ສີວິໄລ ໄດ້ຮັບເລືອກຕັ້ງເປັນເລຂາຄະນະບໍລິຫານງານພັກແຂວງເຊກອງສະໄໝທີ X

July 30, 2020 0 By admin

ກອງປະຊຸມໃຫຍ່ຜູ້ແທນອົງຄະນະພັກແຂວງເຊກອງຄັ້ງທີ X ໄດ້ປິດລົງດ້ວຍຜົນສຳເລັດອັນຈົບງາມ, ທັງຖືກຕ້ອງຕາມກົດລະບຽບຂອງພັກ ແລະເຕັມໄປດ້ວຍເນື້ອໃນຄວາມໝາຍສໍາຄັນ, ພາຍຫຼັງດຳເນີນມາເປັນເວລາ 2 ວັນເຕັມ ໂດຍມີສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະ ທານສູນກາງແນວລາວສ້າງຊາດ, ມີຜູ້ແທນສົມບູນເຂົ້າຮ່ວມ 155 ສະຫາຍ, ຍິງ 21 ສະຫາຍ ຊຶ່ງເປັນຕົວແທນໃຫ້ແກ່ສະມາຊິກພັກໃນທົ່ວແຂວງຈຳນວນ 9.182 ສະຫາຍ.


ກອງປະຊຸມໄດ້ພ້ອມກັນຄົ້ນຄ້ວາ, ປະກອບຄໍາເຫັນພິຈາລະນາຢ່າງເລິກເຊິ່ງ ແລະເປັນເອກະສັນກັນຮັບຮອງເອົາບົດລາຍງານການເມືອງ, ພ້ອມກັນນັ້ນກອງປະຊຸມໄດ້ເປັນເອກະພາບຕໍ່ການຕີລາຄາດ້ານອອ່ນ-ຂໍ້ຄົງຄ້າງ, ສາເຫດ ແລະບົດຮຽນຖອດຖອນໄດ້ ທີ່ໄດ້ຍົກໃນລາຍງານການເມືອງ ແລະແຜນພັດທະນາເສດຖະກິດ-ສັງຄົມ, ໄດ້ເປັນເອກະພາບຮັບຮອງເອົາບັນດາຄາດໝາຍລວມ, ທິດທາງ, ໜ້າທີ່ລວມ ແລະຄາດໝາຍສູ້ຊົນໃນ 5 ປີແຕ່ນີ້ຮອດ 2025.


ພ້ອມກັນນັ້ນ, ບັນດາຜູ້ແທນສົມບູນກໍໄດ້ໃຊ້ສິດປະຊາທິປະໄຕ ເພື່ອປ່ອນບັດເລືອກຕັ້ງເອົາຄະນະບໍລິຫານງານພັກແຂວງຊຸດໃໝ່ ໂດຍມີຜູ້ອອກຮັບສະໝັກທັງໝົດ 38 ສະຫາຍ,ຍິງ 7 ສະຫາຍ, ເລືອກໄດ້ 33 ສະຫາຍ, ຍິງ 5 ສະຫາຍ ເຊິ່ງບັນດາສະຫາຍທີ່ໄດ້ຮັບການເລືອກຕັ້ງຊຸດນີ້ ລ້ວນແຕ່ມີປະສົບການໃນການຊີ້ນໍາ-ນໍາພາ, ມີຄວາມຮູ້ຄວາມສາມາດ, ມີຄວາມຫ້າວຫັນ, ມີຄຸນສົມບັນສິນທໍາປະຕິວັດ ແລະໜັກແໜ້ນທາງດ້ານການເມືອງ ເພື່ອເປັນຫຼັກແຫຼ່ງແກ່ນ ສານສືບຕໍ່ນໍາພາຈັດຕັ້ງປະຕິບັດໜ້າທີ່ການເມືອງ ກໍຄືພາລະກິດການປົກປັກຮັກສາ ແລະສ້າງສາພັດທະນາແຂວງເຊກອງໃນ 5 ປີຕໍ່ໜ້າ.


ຜ່ານການດຳເນີນກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກແຂວງເຊກອງຄັ້ງທີ X ໄດ້ເລືອກຕັ້ງເອົາຄະນະປະຈຳພັກແຂວງ 11 ສະຫາຍ, ຍິງ 2 ສະຫາຍ ໂດຍໄດ້ເຫັນດີເປັນເອກະພາບເລືອກເອົາສະຫາຍ ເຫຼັກໄຫຼ ສີວິໄລ ເປັນເລຂາຄະນະບໍລິຫານງານພັກແຂວງເຊກອງຄັ້ງທີ X, ສະຫາຍ ນາງ ຈັນຫອມ ມະຫາໄຊ, ສະຫາຍ ດົງເພັດ ພະຍົນ ເປັນຮອງເລຂາຄະນະບໍລິຫານງານພັກແຂວງ ແລະໄດ້ເລືອກຕັ້ງເອົາສະຫາຍ ສົມນິດ ສີລິບຸນລ້ຽງ ເປັນປະທານຄະນະກວດກາພັກແຂວງ, ສະຫາຍ ຫີນເພັດ ແກ້ວຫົງສາ, ສະຫາຍ ນາງ ແສງມະນີ ໄຊສົງຄາມ, ສະຫາຍ ອ່ອນມະນີວັນ ຈັນດາວົງ ເປັນຮອງປະທານຄະນະກວດກາພັກແຂວງ. ພ້ອມນັ້ນ, ກອງປະຊຸມຍັງໄດ້ປ່ອນບັດເລືອກເອົາຜູ້ແທນສົມບູນໄປເຂົ້າຮ່ວມກອງປະຊຸມໃຫຍ່ຄັ້ງທີ XI ຂອງສູນກາງພັກ ທີ່ຈະຈັດຂຶ້ນໃນຕໍ່ໜ້າຈໍານວນ 17 ສະຫາຍ, ຍິງ 4 ສະຫາຍ ແລະຜູ້ແທນສຳຮອງ 2 ສະຫາຍ.


ໂອກາດດັ່ງກ່າວ, ສະຫາຍ ໄຊສົມພອນ ພົມວິຫານ ໄດ້ມີຄຳເຫັນໂອ້ລົມ ໂດຍໄດ້ສະແດງຄວາມຊົມເຊີຍຕໍ່ຜົນສຳເລັດຂອງກອງປະຊຸມໃນຄັ້ງນີ້, ພ້ອມທັງເນັ້ນໃຫ້ຄະນະບໍລິຫານງານພັກແຂວງຊຸດໃໝ່ຫັນເອົາມະຕິກອງປະຊຸມໃຫຍ່ຄັ້ງນີ້ໃຫ້ເປັນແຜນງານ, ໂຄງການ ແລະສ້າງເປັນນິຕິກໍາລະອຽດ ເພື່ອຈັດຕັ້ງການເຜີຍແຜ່ເຊື່ອມຊຶມ, ໂດຍເລີ່ມແຕ່ຄະນະບໍລິຫານງານພັກແຂວງຈົນເຖິງບັນດາເມືອງ, ຂະແໜງການ ແລະຮາກຖານຕ່າງໆ ເພື່ອສ້າງຄວາມຮັບຮູ້ເຂົ້າໃຈ ແລະເປັນເອກະພາບກັນກັບແນວທາງນະໂຍບາຍທີ່ວາງອອກ ກໍຄືມະຕິກອງປະຊຸມໃຫຍ່ຄັ້ງນີ້, ສືບຕໍ່ຂົນຂວາຍ, ຍາດແຍ່ງດຶງດູດການຊ່ວຍເຫຼືອ ແລະລົງທຶນຈາກທຸກພາກສ່ວນເຂົ້າໃນການພັດທະນາແຂວງເຊກອງໃຫ້ນັບມື້ນັບເພີ່ມຂຶ້ນຕິດພັນກັບການສ້າງເງື່ອນໄຂຄວາມສະດວກ ແລະນະໂຍບາຍຊຸກຍູ້ສົ່ງເສີມການຜະລິດເປັນສິນຄ້າ ໂດຍສະເພາະພືດທີ່ເປັນທ່າແຮງຂອງແຂວງ ແລະຕະຫຼາດມີຄວາມຕ້ອງການ ເພື່ອແນໃສ່ແກ້ໄຂຄວາມທຸກຍາກຂອງປະຊາຊົນໃຫ້ນັບມື້ຫຼຸດລົງເປັນກ້າວໆ.


ໃຫ້ຄະນະບໍລິຫານງານພັກແຂວງຊຸດໃໝ່ຮີບຮ້ອນແບ່ງວຽກ, ແບ່ງຄວາມຮັບຜິດຊອບໃຫ້ລະອຽດ, ຈະແຈ້ງຕິດພັນກັບການປັບປຸງລະບອບແບບແຜນວິທີເຮັດວຽກ, ການປະຕິບັດຫຼັກການລວມສູນປະຊາທິປະໄຕນໍາພາເປັນໝູ່ຄະນະບຸກຄົນຮັບຜິດຊອບຢ່າງຈະແຈ້ງ, ແນໃສ່ຫັນປ່ຽນແນວຄິດຈິນຕະນາການໃໝ່, ເປັນເຈົ້າການເຊີດຊູຈິດໃຈເອກະ ລາດເປັນເຈົ້າຕົນເອງ, ເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງ, ຕັ້ງໜ້າປຸກລະດົມທຸກກໍາລັງແຮງຂອງທົ່ວປວງຊົນເຂົ້າຮ່ວມໃນການປົກປັກຮັກສາ ແລະພັດທະນາແຂວງເຊກອງໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້, ທັງເຮັດໃຫ້ແຂວງມີຄວາມໜັກແໜ້ນທາງດ້ານການເມືອງ, ເຂັ້ມແຂງທາງດ້ານປ້ອງກັນຊາດ-ປ້ອງກັນຄວາມສະຫງົບ, ອຸດົມຮັ່ງມີທາງດ້ານເສດຖະກິດ ແລະຈະເລີນກ້າວໜ້າທາງດ້ານວັດທະນະທໍາ-ສັງຄົມ.

ຂ່າວ: ສັນຍາ