ຊາວເມືອງທ່າແຂກ ຕ້ອນຮັບຂະບວນແຫ່ຮູບຫລໍ່ ພຣະເຈົ້າໄຊຍະເຊດຖາທິຣາດ

ຊາວເມືອງທ່າແຂກ ຕ້ອນຮັບຂະບວນແຫ່ຮູບຫລໍ່ ພຣະເຈົ້າໄຊຍະເຊດຖາທິຣາດ

July 28, 2020 0 By admin

ຂະບວນແຮ່ຮູບຫລໍ່ພຣະເຈົ້າໄຊຍະເຊດຖາທິຣາດ ພ້ອມດ້ວຍຊ້າງ ແລະ ພຣະພຸດທະຮູບ ໄດ້ມາຮອດແຂວງຄຳມ່ວນໃນຕອນບ່າຍຂອງວັນທີ 28 ກໍລະກົດ 2020 ໂດຍມີການນຳພັກ – ລັດ ນໍາໂດຍ ທ່ານ ໂອໄດ ສຸດາພອນ ເຈົ້າແຂວງໆ ຄຳມ່ວນ, ມີ ທ່ານ ຈັນ ບຸບຜາລີວັນ ປະທານແນວລາວສ້າງຊາດແຂວງ, ທ່ານ ແກ້ວລັນດອນ ຈັນທະປານີ ເຈົ້າເມືອງໆ ທ່າແຂກ ພ້ອມດ້ວຍຄະນະ ແລະ ມວນຊົນລາວບັນດາເຜົ່າຊາວເມືອງທ່າແຂກເຂົ້າຮ່ວມຕ້ອນຮັບຢ່າງເປັນຂະບວນ.

ຂະບວນແຫ່ຮູບຫລໍ່ພຣະເຈົ້າໄຊຍະເຊດຖາທິຣາດໄດ້ເດີນທາງມາຈາກນະຄອນ ຫລວງວຽງຈັນແຕ່ວັນທີ 27 ກໍລະກົດ ມື້ວານນີ້ໄດ້ພັກແຮມທີແຂວງບໍລິຄຳໄຊ ແລະ ມື້ນີ້ຈະໄດພັກແຮມທີ່ເມືອງທ່າແຂກ ເຊິ່ງຈະໄດ້ມີການຄົບງັນຕາມປະເພນີຢູ່ທີ່ເດີ່ນຫ້ອງວ່າການປົກຄອງເມືອງທ່າແຂກ, ຈະມີພິທີສູດປະລິມຸງຄຸນ, ນຸ່ງຂາວ, ຮົ່ມຂາວ ໄຫວ້ພຣະສູດມົນ.

ໃນຕອນເຊົ້າຂອງວັນທີ 29 ກໍລະກົດ ຈະໄດ້ມີການໃສ່ບາດ,ຫລັງຈາກນັ້ນຈະໄດ້ເຄື່ອນຂະບວນດັ່ງກ່າວໄປແຂວງສະຫວັນະເຂດ.

ທ່ານ ອຸ່ນຫລ້າ ໄຊຍະສິດ, ຮອງເຈົ້າແຂວງໆອັດຕະປື ຜູ້ຮັບຜິດຊອບໂຄງການກໍ່ສ້າງອານຸສາວະລີພະເຈົ້າໄຊຍະເສດຖາທິຣາດ ໃຫ້ສຳພາດກ່ອນໜ້ານີ້ວ່າ: ໂຄງການນີ້ເປັນໂຄງການລະດັບຊາດເລີ່ມຈັດຕັ້ງປະຕິບັດນັບແຕ່ປີ 2014 ເປັນຕົ້ນມາ ໂດຍແມ່ນອົງການປົກຄອງແຂວງອັດຕະປື ເຊິ່ງມີທ່ານຈູມມາລີ ໄຊຍະສອນ ອະດີດປະທານປະເທດ ພ້ອມດ້ວຍພັນລະຍາ ເປັນປະທານທີ່ປຶກສາ ກິຕິມະສັກເປັນຜູ້ຊີ້ນໍາ – ນໍາພາໃນການກໍ່ສ້າງ.

ຮູບເໝືອນພະເຈົ້າໄຊຍະເຊດຖາທິຣາດ ທີ່ຫຼໍ່ດ້ວຍທອງເຫຼືອງສົດ 18 ໂຕນ ສຳລັບທຶນຮອນແມ່ນໄດ້ມາຈາກການປະກອບສ່ວນສົມທົບຂອງທົ່ວປວງຊົນເຊື້ອຊາດລາວ ທັງພາຍໃນ ແລະ ຕ່າງປະເທດ ລວມເຖິງການອຸປະຖໍາຫຼັກຂອງໂຄງການບໍ່ຄໍາວັງຕັດ ເມືອງຊານໄຊ ແຂວງອັດຕະປື ມູນຄ່າທັງໝົດ 39 ຕື້ກີບ

ຂະບວນແຫ່ ຈະເດີນທາງຮອດແຂວງອັດຕະປື ໃນວັນທີ 31 ກໍລະກົດ 2020 ຈາກນັ້ນກໍຈະຈັດພີທີສະເຫຼີມສະຫຼອງ ແລະ ຍົກຂຶ້ນພຣະແທ່ນປະດິດສະຖານ ໄວ້ ພ້ອມທັງບໍາເພັນບຸນກຸສົນຖວາຍທານ ໃນວັນທີ 01 ສິງຫາ 2020 ເປັນອັນຈົບພິທີການອັນເຊີນ ພຣະບໍຣົມມະຮູບເຫມືອນ ພຣະເຈົ້າໄຊຍະເຊດຖາທິຣາດ ໄປປະດິດສະຖານ ໄວ້ທີ່ພຣະແທນ ອະນຸສາວະລີ ແຂວງ ອັດຕະປື.

.

.

ແລ່ງທີ່ມາ:Khammouane News