ຊາວເມືອງປາກກະດິງ ຕ້ອນຮັບໂມທະນາ ພຣະເຈົ້າໄຊຍະເຊດຖາທິຣາດ

ຊາວເມືອງປາກກະດິງ ຕ້ອນຮັບໂມທະນາ ພຣະເຈົ້າໄຊຍະເຊດຖາທິຣາດ

July 28, 2020 0 By admin

ໃນຕອນ ເຊົ້າຂອງວັນທີ 28 ກໍລະກົດ 2020  ຫຼັງສຳເລັດພິທີໃສ່ບາດແດ່ພຣະສົງ ສາມະເນນ ເພື່ອອຸທິດບຸນກຸສົນເຖິງພະເຈົ້າໄຊຍະເຊດຖາທິຣາດ ມະຫາຣາດ ທີ່ເມືອງປາກຊັນ ແຂວງບໍລິຄຳໄຊແລ້ວ ຂະບວນແຫ່ກໍໄດ້ເຄື່ອນຍ້າຍໄປສູ່ ແຂວງຄຳມ່ວນ.

ບັນຍາກາດການຕ້ອນຮັບ ຂະບວນແຫ່ຮູບຫລໍ່ທອງ ເຫລືອງ ພຣະເຈົ້າໄຊຍະເຊດຖາທິຣາດ ມະຫາຣາດ ທີ່ພັດທະຄານທັນວາໂຊກໄຊ(ທາງແບ່ງຫລັກ 20) ເມືອງປາກກະດິງ ແຂວງບໍລິຄຳໄຊ ໂດຍມີອຳນາດການປົກຄອງ ແລະ ປະຊາຊົນ ຊາວເມືອງປາກກະດິງເຂົ້າຮ່ວມໂມທະນາ ກາບໄຫວ້ ແລະ ທຳບຸນກິນທານຈຳນວນຫລວງຫລາຍ.


ພິທີຕ້ອນຮັບ ຂະບວນແຫ່ພຣະເຈົ້າໄຊຍະເຊດຖາທິຣາດ ໃນຄັ້ງນີ້ ນຳພາໂດຍ ທ່ານ ສົມພອນ ຈັນທະນາສຸກ ເຈົ້າເມືອງປາກກະດິງ ພ້ອມດ້ວຍຄະນະນຳເມືອງ ໂດຍໄດ້ມອບຜ້າໄກໃຫ້ແກ່ພະ ສົງຈຳນວນ 23 ອົງ ແລະ ມອບເງິນບໍລິຈາກ ຂອງຊາວເມືອງປາກກະດິງ ອີກຈຳນວນຫນຶ່ງ.

ໃນວັນທີ28 ກໍລະກົດ ແມ່ນຈະມີການຄົບງັນສະເຫລີມສະຫຼອງຂຶ້ນທີ່ເມືອງທ່າແຂກແຂວງຄຳມ່ວນ  ຈາກນັ້ນວັນທີ 29 ກໍລະກົດ ກໍຈະເຄື່ອນຍ້າຍໄປຄ້າງຄືນທີ່ແຂວງສະຫວັນນະເຂດ.

ທ່ານ ອຸ່ນຫລ້າ ໄຊຍະສິດ, ຮອງເຈົ້າແຂວງໆອັດຕະປື ຜູ້ຮັບຜິດຊອບໂຄງການກໍ່ສ້າງອານຸສາວະລີພະເຈົ້າໄຊຍະເສດຖາທິຣາດ ໃຫ້ສຳພາດກ່ອນໜ້ານີ້ວ່າ: ໂຄງການນີ້ເປັນໂຄງການລະດັບຊາດເລີ່ມຈັດຕັ້ງປະຕິບັດນັບແຕ່ປີ 2014 ເປັນຕົ້ນມາ ໂດຍແມ່ນອົງການປົກຄອງແຂວງອັດຕະປື ເຊິ່ງມີທ່ານຈູມມາລີ ໄຊຍະສອນ ອະດີດປະທານປະເທດ ພ້ອມດ້ວຍພັນລະຍາ ເປັນປະທານທີ່ປຶກສາ ກິຕິມະສັກເປັນຜູ້ຊີ້ນໍາ – ນໍາພາໃນການກໍ່ສ້າງ.

ຮູບເໝືອນພະເຈົ້າໄຊຍະເຊດຖາທິຣາດ ທີ່ຫຼໍ່ດ້ວຍທອງເຫຼືອງສົດ 18 ໂຕນ ສຳລັບທຶນຮອນແມ່ນໄດ້ມາຈາກການປະກອບສ່ວນສົມທົບຂອງທົ່ວປວງຊົນເຊື້ອຊາດລາວ ທັງພາຍໃນ ແລະ ຕ່າງປະເທດ ລວມເຖິງການອຸປະຖໍາຫຼັກຂອງໂຄງການບໍ່ຄໍາວັງຕັດ ເມືອງຊານໄຊ ແຂວງອັດຕະປື ມູນຄ່າທັງໝົດ 39 ຕື້ກີບ

ຂະບວນແຫ່ ຈະເດີນທາງຮອດແຂວງອັດຕະປື ໃນວັນທີ 31 ກໍລະກົດ 2020 ຈາກນັ້ນກໍຈະຈັດພີທີສະເຫຼີມສະຫຼອງ ແລະ ຍົກຂຶ້ນພຣະແທ່ນປະດິດສະຖານ ໄວ້ ພ້ອມທັງບໍາເພັນບຸນກຸສົນຖວາຍທານ ໃນວັນທີ 01 ສິງຫາ 2020 ເປັນອັນຈົບພິທີການອັນເຊີນ ພຣະບໍຣົມມະຮູບເຫມືອນ ພຣະເຈົ້າໄຊຍະເຊດຖາທິຣາດ ໄປປະດິດສະຖານ ໄວ້ທີ່ພຣະແທນ ອະນຸສາວະລີ ແຂວງ ອັດຕະປື.