ແຂວງຫົວພັນ ຈະລົງມືປັບປຸງ ສ້ອມແປງ ທາງຫລວງທ້ອງຖິ່ນຢູ່ 3 ເມືອງ

ແຂວງຫົວພັນ ຈະລົງມືປັບປຸງ ສ້ອມແປງ ທາງຫລວງທ້ອງຖິ່ນຢູ່ 3 ເມືອງ

July 27, 2020 0 By admin

ວັນທີ 24 ກໍລະກົດ ຜ່ານມາ, ທ່ານ ຮຸ່ງອາລຸນ ບຸນທະເມືອງ ຫົວໜ້າພະແນກໂຍທາທິການ ແລະ ຂົ່ນສົ່ງແຂວງ ໄດ້ເຊັນສັນຍາ ໂຄງການກໍ່ສ້າງສ້ອມ ແປງບັນດາເສັ້ນທາງຫລວງທ້ອງຖິ່ນ ໄລຍະ 2 ກັບ 3 ບໍລິສັດຄື: ບໍລິສັດກິ່ງແກ້ວອຸດົມ ກໍ່ສ້າງຂົວທາງ ຈໍາກັດຜູ້ດຽວ, ບໍລິສັດຈະເລີນຊໍາກໍ່ສ້າງສົ່ງເສີມກະສິກໍາ ຂາອອກ-ຂາເຂົ້າຈໍາກັດ ແລະ ບໍລິສັດຈິດຈະເລີນກໍ່ສ້າງ ລວມມູນຄ່າທັງໝົດ 31,4 ຕື້ກວ່າກີບ.


ໂຄງການກໍ່ສ້າງສ້ອມແປງບັນດາເສັ້ນທາງຫລວງທ້ອງຖິ່ນ ໃນຄັ້ງແມ່ນກູ້ຢຶມຈາກທະນາຄານໂລກ ເຊິ່ງປະກອບມີ 3 ເສັ້ນທາງຄື: ເສັ້ນທາງແຕ່ບ້ານປຸງໄຮ ເມືອງຮ້ຽມ-ຊາຍແດນຊຽງຂວາງ ມີຄວາມຍາວ 36 ກິໂລແມັດ ແມ່ນມອບໃຫ້ ບໍລິສັດກິ່ງແກ້ວອຸດົມກໍ່ສ້າງຂົວທາງ ຈໍາກັດຜູ້ດຽວ ເປັນຜູ້ຮັບເໝົາກໍ່ສ້າງສ້ອມແປງໃນມູນຄ່າ 12,4 ຕື້ກວ່າກີບ;

ເສັ້ນທາງແຕ່ ເມືອງກວັນ-ລ້ອງກ້ວາງ ແລະ ເສັ້ນທາງຫີນເງີບ-ຫ້ວຍບໍ ເມືອງກວັນ, ມີຄວາມຍາວ 9 ກິໂລແມັດກວ່າ ໂດຍແມ່ນ ບໍລິສັດຈະເລີນຊໍາ ກໍ່ສ້າງສົ່ງເສີມກະສິກໍາ ຂາອອກ-ຂາເຂົ້າ ຈໍາກັດ ເປັນຜູ້ຮັບເໝົາກໍ່ສ້າງ ໃນມູນຄ່າ 7,2 ຕື້ກວ່າກີບ ;

ເສັ້ນທາງແຕ່ບ້ານພຽງຖິ່ນ-ບ້ານຄາ ເມືອງຊໍາໃຕ້, ມີຄວາມຍາວ 20 ກິໂລແມັດ ມອບໃຫ້ ບໍລິສັດຈິດຈະເລີນກໍ່ສ້າງ ເປັນຜູ້ຮັບເໝົາກໍ່ສ້າງ ແລະ ສ້ອມແປງ ໃນມູນຄ່າການກໍ່ສ້າງ 11,8 ຕື້ກວ່າກີບ.


ເມື່ອການກໍ່ສ້າງສ້ອມແປງບັນດາເສັ້ນທາງນີ້ສໍາເລັດ ຈະສາມາດທຽວໄດ້ສອງລະດູ, ເຮັດໃຫ້ການໄປມາ ຫາສູ່ລະຫວ່າງເມືອງຕໍ່ເມືອງ, ບ້ານຕໍ່ບ້ານ ແລະ ການຄ້າຂາຍແລກປ່ຽນສິນຄ້າ ມີຄວາມສະດວກສະບາຍຂຶ້ນກວ່າເກົ່າ.

ຂ່າວ-ພາບ: ວັນແສງ