ການກໍ່ສ້າງທາງດ່ວນ ນະຄອນຫລວງວຽງຈັນ-ວັງວຽງ ຄືບໜ້າກວ່າ 80%

ການກໍ່ສ້າງທາງດ່ວນ ນະຄອນຫລວງວຽງຈັນ-ວັງວຽງ ຄືບໜ້າກວ່າ 80%

July 27, 2020 0 By admin

ຂປລ. ໃນວັນທີ 26 ກໍລະກົດ 2020 ນີ້, ທ່ານ ກິແກ້ວ ໄຂຄໍາພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ພ້ອມຄະນະ ໄດ້ລົງຕິດຕາມຄວາມຄືບໜ້າໂຄງການກໍ່ສ້າງທາງດ່ວນນະຄອນຫລວງວຽງຈັນ-ວັງວຽງ ໂດຍມີທ່ານ TANG Yongkuo ປະທານບໍລິສັດຮ່ວມທຶນພັດທະນາທາງດ່ວນ ລາວ-ຈີນ ຈໍາກັດ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ.


ກຸ່ມບໍລິສັດກໍ່ສ້າງ-ລົງທຶນ ແລະ ຖືຮຸ້ນຈໍາກັດ ແຂວງຢຸນນານ ສປຈີນ (ເປັນຜູ້ລົງທຶນ) ໂຄງການກໍ່ສ້າງທາງດ່ວນ ນະຄອນຫລວງວຽງຈັນ-ວັງວຽງ, ມາຮອດປັດຈຸບັນ ການກໍ່ສ້າງໂຄງການໄດ້ສໍາເລັດແລ້ວປະມານ 80%, ເຊິ່ງບໍລິສັດດັ່ງກ່າວໄດ້ຈ້າງບໍລິສັດທີ່ປຶກສາສິ່ງແວດລ້ອມລາວ ເພື່ອດໍາເນີນການຈັດຕັ້ງປະຕິບັດວຽກງານຊົດເຊີຍສິ່ງກີດຂວາງ ໃຫ້ຜູ້ທີ່ຖືກກະທົບຕາມແລວກໍ່ສ້າງທາງດ່ວນ ຮ່ວມກັບ ອົງການປົກຄອງແຂວງວຽງຈັນ ແລະ ນະຄອນຫລວງວຽງຈັນ ໂດຍມີບ້ານໄດ້ຮັບຜົນກະທົບ ລວມທັງໝົດ 65 ບ້ານ, 4 ເມືອງ. ໃນນັ້ນ ແຂວງວຽງຈັນ ກວມເອົາ 3 ເມືອງ 40 ບ້ານ ແລະ ນະຄອນຫລວງວຽງຈັນ 1 ເມືອງ 25 ບ້ານ.

ເສັ້ນທາງດັ່ງກ່າວ ຈະມີການກໍ່ສ້າງວົງວຽນເຊື່ອມຕໍ່ຂຶ້ນ-ລົງທັງໝົດ 7 ຈຸດ ຄື: ຈຸດບ້ານນາຊອນ, ບ້ານບົວ, ບ້ານສະກ້າ, ໂພນໂຮງ, ຫີນເຫີບ, ທ່າເຮືອ ແລະ ວັງວຽງ, ເຊິ່ງການກໍ່ສ້າງ ຊ່ວງທີ 1 ມີຄວາມຍາວປະມານ 109 ກິໂລແມັດ, ມູນຄ່າລົງທຶນປະມານ 1,3 ຕື້ໂດລາສະຫະລັດ, ມີ 4 ຊ່ອງລົດແລ່ນ, ອຸໂມງ 1 ແຫ່ງ ຍາວ 875 ແມັດ, ຂົວ 45 ແຫ່ງ ຍາວປະມານ 2.400 ແມັດ, ຄວາມໄວອອກແບບ 100-120 ກິໂລແມັດ/ຊົ່ວໂມງ. ຕາມແຜນການແມ່ນຈະກໍ່ສ້າງໃຫ້ສຳເລັດພາຍໃນ 3 ປີ ກໍຄື ທ້າຍປີ 2020 ນີ້.


ໂອກາດດຽວກັນ, ທ່ານລັດຖະມົນຕີ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ກໍໄດ້ໄປຢ້ຽມຢາມ ແລະ ຊຸກຍູ້ວຽກງານ ຖວທ ຢູ່ເມືອງວັງວຽງ ແຂວງວຽງຈັນ, ຢ້ຽມຢາມເຂດໂຄງການພັດທະນາພື້ນຖານເສດຖະກິດ ຕົວເມືອງວັງວຽງ ແລະ ໄປຢ້ຽມຢາມສະຖານທີ່ທ່ອງທ່ຽວຖໍ້ານາງນອນ ແລະ ນາງຟ້າ, ຊຸກຍູ້ບັນດາໂຄງການພັດທະນາທີ່ໄດ້ຮັບການຊ່ວຍເຫລືອຈາກ ADB ແລະ ບັນດາຫົວໜ່ວຍທຸລະກິດ ທີ່ຕິດພັນກັບວຽກງານທ່ອງທ່ຽວພາຍໃນຕົວເມືອງວັງວຽງ.