ເຄື່ອນຂະບວນແຫ່ ຮູບຫຼໍ່ພຣະເຈົ້າໄຊຍະເຊດຖາທິຣາດ ໄປປະດິດສະຖານ ທີ່ແຂວງອັດຕະປື

ເຄື່ອນຂະບວນແຫ່ ຮູບຫຼໍ່ພຣະເຈົ້າໄຊຍະເຊດຖາທິຣາດ ໄປປະດິດສະຖານ ທີ່ແຂວງອັດຕະປື

July 27, 2020 0 By admin

ຂປລ.ໃນເວລາ 7:30 ຂອງວັນທີ 27 ກໍລະກົດ 2020 ໄດ້ເລີ່ມເຄື່ອນຍ້າຍຂະບວນແຫ່ ພຣະເຈົ້າໄຊຍະເຊດຖາທິຣາດ ມະຫາຣາດ ພ້ອມຊ້າງ ແລະ ພຣະພຸດທະຮູບ ອອກຈາກວັດພຣະທາດຫລວງ ນະຄອນຫລວງວຽງຈັນ ເພື່ອໄປປະດິດສະຖານ ຢູ່ແຂວງອັດຕະປື

ໂດຍໄດ້ແວ່ພັກຄ້າງຄືນ ເພືອເຮັດພິທີທາງສາສະຫນາ ຮັບບໍລິຈາກ ຈາກມວນຊົນຊາວແຂວງບໍລິຄຳໄຊ.


ການເຄື່ອນຂະບວນ ແຫ່ພຣະເຈົ້າໄຊເຊດຖາທິຣາດ ຄັ້ງນີ້ ນຳພາໂດຍທ່ານ ບົວເງິນ ຊາພູວົງ ຮອງລັດຖະມົນຕີ ກະ ຊວງຖະແຫລງຂ່າວ ວັດທະນະທຳ ແລະ ທ່ອງທ່ຽວ, ຜູ້ຊີ້ນຳວຽກງານວັດທະນະທຳ.

ປະຈຸບັນການກໍ່ສ້າງອະນຸສາວະລີ ສົມເດັດພຣະໄຊຍະເຊດຖາທັມມິກະຣາດເຈົ້າ ຢູ່ແຂວງອັດຕະປືສຳເລັດໃນຂັ້ນພື້ນຖານແລ້ວ ໂດຍສະເພາະບໍລິເວນສວນ, ແທ່ນຕັ້ງຮູບຫລໍ່ອານຸສາວະລີຂອງພຣະເຈົ້າໄຊຍະເສດຖາທິຣາດ ເພື່ອຈາລຶກເຖິງຄຸນງາມຄວາມດີ ແລະເຊີດຊູກຽດສັກສີຂອງວີຣະມະຫາ ກະສັດຕາທິຣາດເຈົ້າ ແນໃສ່ໃຫ້ຄົນຮຸ່ນຫລັງໄດ້ສຶກສາຮຽນຮູ້ເຖິງວິລະກຳ ແລະມູນເຊື້ອອັນພິລະອາດຫານຂອງເຈົ້າໄຊຍະເຊດຖາທິຣາດ.

ທ່ານ ອຸ່ນຫລ້າ ໄຊຍະສິດ, ຮອງເຈົ້າແຂວງໆອັດຕະປື ຜູ້ຮັບຜິດຊອບໂຄງການກໍ່ສ້າງອານຸສາວະລີພະເຈົ້າໄຊຍະເສດຖາທິຣາດ ໃຫ້ສຳພາດວ່າ: ໂຄງການນີ້ເປັນໂຄງການລະດັບຊາດເລີ່ມຈັດຕັ້ງປະຕິບັດນັບແຕ່ປີ 2014 ເປັນຕົ້ນມາ ໂດຍແມ່ນອົງການປົກຄອງແຂວງອັດຕະປື ເຊິ່ງມີທ່ານຈູມມາລີ ໄຊຍະສອນ ອະດີດປະທານປະເທດ ພ້ອມດ້ວຍພັນລະຍາ ເປັນປະທານທີ່ປຶກສາ ກິຕິມະສັກເປັນຜູ້ຊີ້ນໍາ – ນໍາພາໃນການກໍ່ສ້າງ.

ຮູບເໝືອນພະເຈົ້າໄຊຍະເຊດຖາທິຣາດ ທີ່ຫຼໍ່ດ້ວຍທອງເຫຼືອງສົດ 18 ໂຕນ ສຳລັບທຶນຮອນແມ່ນໄດ້ມາຈາກການປະກອບສ່ວນສົມທົບຂອງທົ່ວປວງຊົນເຊື້ອຊາດລາວ ທັງພາຍໃນ ແລະ ຕ່າງປະເທດ ລວມເຖິງການອຸປະຖໍາຫຼັກຂອງໂຄງການບໍ່ຄໍາວັງຕັດ ເມືອງຊານໄຊ ແຂວງອັດຕະປື ມູນຄ່າທັງໝົດ 39 ຕື້ກີບ

ຂະບວນແຫ່ ຈະເດີນທາງຮອດແຂວງອັດຕະປື ໃນວັນທີ 31 ກໍລະກົດ 2020 ຈາກນັ້ນກໍຈະຈັດພີທີສະເຫຼີມສະຫຼອງ ແລະ ຍົກຂຶ້ນພຣະແທ່ນປະດິດສະຖານ ໄວ້ ພ້ອມທັງບໍາເພັນບຸນກຸສົນຖວາຍທານ ໃນວັນທີ 01 ສິງຫາ 2020 ເປັນອັນຈົບພິທີການອັນເຊີນ ພຣະບໍຣົມມະຮູບເຫມືອນ ພຣະເຈົ້າໄຊຍະເຊດຖາທິຣາດ ໄປປະດິດສະຖານ ໄວ້ທີ່ພຣະແທນ ອະນຸສາວະລີ ແຂວງ ອັດຕະປື.

ອະນຸສາວະລີພຣະເຈົ້າໄຊເຊດຖາ ທີ່ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື