ບົດກະວີ ຫອມແຜ່ນດິນລາວ ຖືກຄັດເລືອກເຂົ້າຮັບລາງວັນ ຊີໄຣ ປະຈໍາປີ 2019

ບົດກະວີ ຫອມແຜ່ນດິນລາວ ຖືກຄັດເລືອກເຂົ້າຮັບລາງວັນ ຊີໄຣ ປະຈໍາປີ 2019

July 24, 2020 0 By admin

ຂປລ. ບົດກະວີ “ຫອມແຜ່ນດິນລາວ” ທີ່ຂຽນໂດຍ ພຣະ ໄພວັນ ມາລາວົງ (ນາມປາກກາ ລູກດອນກະເດັນ) ໄດ້ຖືກຄັດເລືອກໃຫ້ເຂົ້າຮັບລາງວັນ ວັນນະກໍາສ້າງສັນສຸດຍອດແຫ່ງອາຊຽນ ຫລື ຊີໄຣ (SEA Write) ປະຈໍາປີ 2019 ແລະ ພິທີມອບ-ຮັບລາງວັນດັ່ງກ່າວ, ຈະໄດ້ຈັດຂຶ້ນທີ່ຣາຊະອານາຈັກໄທພາຍຫລັງ ທີ່ສະພາບການເອື້ອອໍານວຍເໝາະສົມ ຈາກສະພາບການລະບາດຂອງພະຍາດໂຄວິດ-19.


ພິທີປະກາດຜູ້ໄດ້ຮັບລາງວັນດັ່ງກ່າວ, ໄດ້ຈັດຂຶ້ນໃນວັນທີ 24 ກໍລະກົດ 2020 ຢູ່ກະຊວງຖະ ແຫລງຂ່າວ, ວັດທະນະທໍາ ແລະ ທ່ອງທ່ຽວ, ໂດຍການເປັນປະທານຂອງທ່ານ ທອງໃບ ໂພທິສານ ຫົວໜ້າກົມມໍລະດົກ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທັງເປັນປະທານສະມາຄົມນັກປະພັນລາວ, ມີບັນດາຮອງປະທານ ແລະ ສະມາຊິກສະມາຄົມນັກປະພັນລາວ, ພ້ອມດ້ວຍແຂກຖືກເຊີນເຂົ້າຮ່ວມເປັນຈໍານວນຫລາຍ.


ທ່ານປະທານສະມາຄົມນັກປະພັນລາວ ກ່າວວ່າ: ຜ່ານການຄັດເລືອກຕາມລະບຽບການ ແລະ ເງື່ອນໄຂ ຂອງຄະນະກໍາມະການຕັດສີນລາງວັນ ວັນນະກໍາສ້າງສັນສຸດຍອດແຫ່ງອາຊຽນຂອງລາວ SEA Write ແມ່ນໄດ້ເປັນເອກະພາບ ຮັບຮອງເອົາບົດກະວີທີ່ມີຊື່ວ່າ: “ຫອມແຜ່ນດິນລາວ” ທີ່ຂຽນໂດຍ ພຣະ ໄພວັນ ມາລາວົງ ເປັນບົດກະວີຊະນະເລີດຂອງ ສປປ ລາວ ດ້ວຍຄະແນນ 311 ຄະແນນ (ຖືວ່າເປັນຄະແນນທີ່ສູງກວ່າບົດຂຽນອື່ນໆ) ເພື່ອເຂົ້າຮ່ວມຮັບລາງວັນຊີໄຣ ປະຈໍາປີ 2019.

ບົດກະວີດັ່ງກ່າວແມ່ນມີຄວາມຍາວ 22 ບາດ ແລະ ໄດ້ຖືກຈັດພີມຢູ່ໃນປື້ມໂຮມກະວີ ທີ່ມີຊື່ວ່າ: “ລະດູການຊີວິດ” ທີ່ໄດ້ຈັດພີມເມື່ອປີ 2019, ໂດຍມີເນື້ອໃນສ່ອງແສງເຖິງຄວາມອຸດົມຮັ່ງມີ ແລະ ສວຍສົດງົດງາມຂອງປະເທດຊາດທີ່ແສນຮັກ ແລະ ຫວງແຫນ ຂອງປະຊາຊົນລາວບັນດາເຜົ່າ ບໍ່ວ່າຈະເປັນທາງດ້ານທໍາມະຊາດ, ປະຫວັດສາດ ແລະ ວັດທະນະທໍາ-ສັງຄົມ, ຊຶ່ງຜູ້ຂຽນໄດ້ບັນຍາຍ ໃນແງ່ມູມຕ່າງໆໄດ້ຢ່າງໜ້າປະທັບໃຈ ແລະ ມ່ວນຊື່ນອ່ອນຊອນ, ເຮັດໃຫ້ຜູ້ອ່ານເກີດອາລົມຈິດເພີດເພີນມີຄວາມພາກພູມໃຈ ແລະ ກະຕຸ້ນຄວາມຮັກຊາດ, ຮັກບ້ານເກີດເມືອງນອນຂອງຕົນ. ບົດກະວີນີ້, ຖືວ່າມີເນື້ອໃນໂດດເດັ່ນ, ເປັນເອກະລັກ, ສ້າງສັນສັງຄົມ, ສ່ອງແສງໃຫ້ເຫັນແນວ ທາງນະໂຍບາຍອັນຖືກຕ້ອງເປັນທໍາຂອງພັກ-ລັດ, ມີສິລະປະໃນການປະດິດແຕ່ງສູງ, ມີຄຸນຄ່າທາງວັນນະກໍາ, ຄໍາສັບສໍານວນພາສາເຂົ້າໃຈງ່າຍ ແລະ ກະທັດຮັດອີກດ້ວຍ.


ພຣະ ໄພວັນ ມາລາວົງ ເກີດເມື່ອ ປີ 1990 ທີ່ບ້ານດອນກະເດັນ ເມືອງໂຂງ ແຂວງຈໍາປາສັກ, ປັດຈຸບັນ ຢູ່ວັດຕົ້ນຕະກຸນສີຊົມຊື່ນ, ບ້ານໜອງບົວທອງ, ເມືອງສີໂຄດຕະບອງ ນະຄອນຫລວງວຽງຈັນ, ຈົບການສຶກສາປະລິນຍາເອກ ສາຂາພຸດທະສາສະໜາ ຈາກມະຫາວິທະຍາໄລຈຸລາລົງກອນຣາຊະວິທະຍາໄລ (ປະເທດໄທ) ໃນປີ 2020. ນອກນີ້, ພຣະ ໄພວັນ ຍັງເປັນສະມາຊິກສະມາຄົມນັກປະພັນລາວ ເມື່ອປີ 2006, ພ້ອມທັງເຄີຍໄດ້ຮັບລາງວັນ ວັນນະກໍາແມ່ນໍ້າຂອງຈ າກບົດກະວີທີ່ມີຊື່ວ່າ: “ອະລິຍະທໍາລຸ່ມແມ່ນໍ້າຂອງ” ໃນປີ 2015. ນອກຈາກນີ້, ພຣະ ໄພວັນ ຍັງເປັນອາຈານສອນຮັບເຊີນທີ່ຄະນະອັກສອນສາດ ພາກວິຊາພາສາ-ວັດທະນະທໍາລາວ ແລະ ຄະນະສຶກສາສາດ ພາກວິຊາສ້າງຄູພາສາລາວ-ວັນນະຄະດີ ມະຫາວິທະຍາໄລແຫ່ງຊາດລາວ ອີກດ້ວຍ.


ຂ່າວ: ສຸພາສະຫວັນ ສີຊະນະມຸງຄຸນ.