ຈະກໍ່ສ້າງລະບົບນໍ້າປະປາ 2 ແຫ່ງ ມູນຄ່າກວ່າ 6 ແສນໂດລາ ຢູ່ແຂວງຫຼວງພະບາງ

ຈະກໍ່ສ້າງລະບົບນໍ້າປະປາ 2 ແຫ່ງ ມູນຄ່າກວ່າ 6 ແສນໂດລາ ຢູ່ແຂວງຫຼວງພະບາງ

June 18, 2020 0 By admin

ຂ່າວສານຫລວງພະບາງ Luangprabang News, ພາຍຫຼັງທີ່ເຈົ້າແຂວງຫຼວງພະບາງຕົກລົງເຫັນດີໃຫ້ ບໍລິສັດ ທໍ່ນໍ້າລາວ ຈຳກັດ ຊະນະການປະມູນໂຄງການກໍ່ສ້າງລະບົບນໍ້າປະປາກຸ່ມບ້ານເມືອງຂາຍ ນະຄອນຫຼວງພະບາງ ແລະບໍລິສັດຕ່ອງຄຳກໍ່ສ້າງເຄຫາສະຖານຈຳກັດເປັນຜູ້ຊະນະ ໂຄງການກໍ່ສ້າງລະບົບນໍ້າປະປາກຸ່ມບ້ານປາກເກງ-ຫາດຮວຍເມືອງປາກແຊງ ແຂວງຫຼວງພະບາງ.


ມາໃນວັນທີ 17ມິຖຸນາ 2020 ພະແນກ ໂຍທາທິການ ແລະຂົນສົ່ງແຂວງ(ຍທຂ)ຮ່ວມກັບມູນນິທິອິສ໌ມິສ໌ເມດປະຈຳລາວ ໄດ້ຈັດພິທີເຊັນສັນຍາກັບ2ບໍລິສັດດັ່ງກ່າວທີ່ຫ້ອງປະຊຸມພະແນກ ຍທຂ, ໂດຍການເຂົ້າຮ່ວມເປັນສັກຂີພີຍານຂອງທ່ານ ສຸກັນ ບຸນຍົງ ຮອງເຈົ້າແຂວງຫຼວງພະບາງ ຜູ້ຊີ້ນຳວຽກງານເສດຖະກິດ, ມີທ່ານ ບຼົ່ງວ່າງ ຫວ່າງເຈ່ຍຊ່າ ຫົວໜ້າພະແນກຍທຂ(ເຈົ້າຂອງໂຄງ ການ), ທ່ານ ບຸນລົງ ດວງນາລີ ປະທານບໍລິສັດທໍ່ນໍ້າລາວ ຈຳກັດ(ຜູ້ຮັບເໝົາ), ທ່ານ ທິບພະສອນ ຄຳພູວົງ ປະທານ ບໍລິສັດ ຕ່ອງຄຳກໍ່ສ້າງ ແລະສ້ອມແປງເຄຫາສະຖານ ຈຳກັດ(ຜູ້ຮັບເໝົາ), ມີປະ ທານ ມູນນິທິອິສ໌ມິສ໌ເວດປະຈຳລາວ(ຜູ້ໃຫ້ທຶນ), ແຂກຖືກເຊີນທີ່ກ່ຽວຂ້ອງເຂົ້າຮ່ວມພິທີເຊັນສັນຍາໃນຄັ້ງນີ້ຢ່າງພ້ອມພຽງ.ສຳລັບໄລຍະເວລາການກໍ່ສ້າງແຕ່ລະແຫ່ງແມ່ນໃຊ້ເວລາ 10 ເດືອນ ນັບແຕ່ ມື້ລົງລາຍເຊັນນີ້ ຈົນເຖິງວັນທີ 16 ເມສາ 2021 ແມ່ນໃຫ້ສຳເລັດ100%.

ໃນນີ້ມູນຄ່າສັນຍາຂອງໂຄງການກໍ່ສ້າງນໍ້າປະປາ ກຸ່ມບ້ານເມືອງຂາຍນະຄອນຫຼວງພະບາງແມ່ນ 392.988ໂດລາສະຫະລັດໃນນັ້ນ ມີທຶນສົມທົບຂອງມູນນິທິອິສ໌ມິສ໌ເມດປະຈຳລາວ 80.000 ໂດລາສະຫະລັດ.

ສ່ວນໂຄງການກໍ່ສ້າງລະບົບນໍ້າປະປາຢູ່ ກຸ່ມບ້ານປາກເກງ-ຫາດຮວຍ ເມືອງປາກແຊງແມ່ນ 263.151 ໂດລາສະຫະລັດ, ໃນນັ້ນ, ມີທຶນສົມທົບຂອງມູນນິທິອິສ໌ມິສ໌ເມດປະຈຳລາວ 80.000 ໂດລາສະຫະລັດ, ເຊິ່ງມູນຄ່າດັ່ງກ່າວຖືວ່າເປັນມູນຄ່າຕາຍຕົວໂດຍບໍ່ມີການປ່ຽນແປງ ຕະຫຼອດໄລຍະຂອງໂຄງການ, ເວັ້ນເສຍແຕ່ຈະມີການເພີ່ມຫຼືຫຼຸດບໍລິມາດຈາກລາຍການເດີມ ແຕ່ຕ້ອງໄດ້ຮັບການຢັ້ງຢືນເປັນລາຍລັກອັກ ສອນຈາກຄະນະກຳມະການກວດກາ ຄວາມຖືກຕ້ອງອະນຸຍາດເສຍກ່ອນຈຶ່ງຖືວ່າຖືກຕ້ອງ ຕາມລະບຽບການ.


ພາບ-ຂ່າວໂດຍ: ດາວອນ ມະນີວັນ