ແຕ່ງຕັ້ງທ່ານ ພັອ ບົວພັນ ອິນທະປັນຍາ ຂຶ້ນເປັນຫົວໜ້າກອງບັນຊາການ ປກສ ແຂວງໄຊສົມບູນ ຄົນໃໝ່

ແຕ່ງຕັ້ງທ່ານ ພັອ ບົວພັນ ອິນທະປັນຍາ ຂຶ້ນເປັນຫົວໜ້າກອງບັນຊາການ ປກສ ແຂວງໄຊສົມບູນ ຄົນໃໝ່

July 23, 2020 0 By admin

ໃນຕອນແລງຂອງວັນທີ 21 ກໍລະກົດ 2020 ທີ່ສະໂມສອນກອງບັນຊາການ ປກສ ແຂວງໄຊສົມບູນ ໄດ້ຈັດພິທີປະກາດການແຕ່ງຕັ້ງຫົວໜ້າກອງບັນຊາການ ປກສ ແຂວງໄຊສົມບູນ ພາຍໃຕ້ການເປັນປະທານ ຂອງທ່ານ ພົຕ ວັນທອງ ກອງມະນີ ຄະນະປະຈຳພັກກະຊວງ, ຫົວໜ້າກົມໃຫຍ່ການເມືອງກະຊວງປ້ອງກັນຄວາມສະຫງົບ ພ້ອມດ້ວຍຄະນະພັກ-ຄະນະບັນຊາຂອງກະຊວງ, ແຂກຖືກເຊີນ . ກອງບັນຊາການ ປກສ ແຂວງ ພ້ອມຄະນະ, ປກສ ເມືອງ ຕະຫຼອດພະນັກງານຫຼັກແຫຼ່ງພາຍໃນກອງ ບັນຊາການເຂົ້າຮ່ວມຢ່າງພ້ອມພຽງ.


ໃນພິທີ ທ່ານ ພັທ ສົມພອນ ແກ້ວພູທອນ ຮອງກົມຈັດຕັ້ງພະນັກງານ ກະຊວງປ້ອກັນຄວາມສະຫງົບໄດ້ຂື້ນຜ່ານດຳລັດຂອງນາຍົກລັດຖະມົນຕີ ສະບັບເລກທີ 401/ນຍ ລົງວັນທີ 10 ກໍລະກົດ 2020 ວ່າດ້ວຍ: ແຕ່ງຕັ້ງຫົວໜ້າກອງບັນຊາການ ປ້ອງກັນຄວາມສະຫງົບແຂວງໄຊສົມບູນ ໂດຍແຕ່ງຕັ້ງ ທ່ານ ພັອ ບົວພັນ ອິນທະປັນຍາ ເປັນຫົວໜ້າກອງບັນຊາການ ປກສ ແຂວງໄຊສົມບູນ.

ໃນຕອນທ້າຍຂອງພິທີ ທ່ານ ພົຕ ວັນທອງ ກອງມະນີ ຄະນະປະຈຳພັກກະຊວງ, ຫົວໜ້າກົມໃຫ່ຍການເມືອງກະຊວງປ້ອງກັນຄວາມສະຫງົບ ຍັງໄດ້ເປັນກຽດໂອລົມຕໍ່ພິທີດັ່ງກ່າວ ພ້ອມທັງເນັ້ນໜັກໃຫ້ ຄະນະພັກ-ຄະນະບັນຊາກອງບັນຊາການ ປກສ ແຂວງໄຊສົມບູນ ສືບຕໍ່ປະຕິບັດໜ້າທີ່ວຽກງານຢ່າງຖືກຕ້ອງຕາມຫຼັກການນຳພາຂອງພັກ, ເປັນເອກະພາບໃນການຄົ້ນຄ້ວາຕັດສີນບັນຫາຕ່າງໆ, ເພີ່ມທະວີແບບແຜນວິທີເຮັດວຽກຢ່າງວິທະຍາສາດ, ແບ່ງຄວາມຮັບຜິດຊອບໃຫ້ຢ່າງລະອຽດ, ມີການສະຫຼູບຖອດຖອນບົດຮຽນຕຳນິສົ່ງຂ່າວເຊິ່ງກັນ ແລະ ກັນ, ເອົາໃຈໃສ່ສືກສາອົບຮົມການເມືອງ-ແນວຄິດໃຫ້ພະນັກງານຢ່າງເປັນປະຈຳ, ເຄົາລົບ ແລະ ປະຕິບັດລະບຽບຂອງກຳລັງປ້ອງກັນຄວາມສະຫງົບ ກໍ່ຄືລະບຽບກົດໝາຍຂອງລັດ. ສືບຕໍ່ຮັບປະກັນຫັນເອົາພະນັກງານລົງກໍ່ສ້າງຮາກຖານ-ການເມືອງ ຕາມທິດ 03 ສ້າງຂອງຂັ້ນເທິງວາງອອກຢ່າງຮອບດ້ານ.

ສືບຕໍ່ຍູ້ແຮງຂະບວນການດ້ານຕ່າງໆພ້ອມກັນຕ້ານ ແລະ ສະກັດກັ້ນພະຍາດໂຄວິດ 19 ບໍ່ໃຫ້ເກີດຂື້ນ. ເອົາໃຈໃສ່ຕັ້ງໜ້າແກ້ໄຂຫາງສຽງຂອງປະຊາຊົນທີ່ເປັນໜໍ່ແໜງສົ່ງຜົນກະທົບຕໍ່ກຳລັງປ້ອງກັນຄວາມສະຫງົບໃຫ້ໝົດໄປ, ຕ້ານ ແລະ ສະກັດກັ້ນສຸດຂີດ ຕໍ່ກັບບັນຫາປະກົດການຫຍໍ້ທໍ້ຕໍ່ກຳລັງປ້ອງກັນຄວາມສະຫງົບບໍ່ໃຫ້ເກີດຂື້ນ ແລະ ບັນຫາຢາເສບຕິດ, ກູ່ມຄົນບໍ່ດີໃຫ້ໝົດໄປ. ເສີມຂະຫຍາຍວຽກງານພາລາທິການກັບທີ່, ການຄຸ້ມຄອງລາຍຮັບລາຍຈ່າຍໃຫ້ໂປ່ງໃສ, ສືບຕໍ່ຮັກສາມູນເຊື້ອຂອງກຳລັງປ້ອງກັນຄວາມສະຫງົບຄຽງຄູ່ກັນນຳພາກົມກອງຂອງຕົນໃຫ້ເຕີບໃຫ່ຍເຂັ້ມແຂງຂື້ນເປັນກ້າວໆ.
ໂອກາດດຽວກັນ, ທ່ານ ພັອ ບົວພັນ ອິນທະປັນຍາ ຫົວໜ້າກອງບັນຊາການ ປກສ ແຂວງໄຊສົມ ກໍ່ໄດ້ຂື້ນຮັບຄຳໂອວາດຂອງທ່ານປະທານທີ່ໄດ້ໂອລົມມາຂ້າງເທິງນັ້ນ, ພ້ອມທັງໃຫ້ຄຳໝັ້ນສັນຍາພ້ອມທັງສະແດງຄວາມບຸນຄຸນ ແລະ ຂໍຈົດຈຳພ້ອມນຳເອົາຄຳໂອລົມດັ່ງກ່າວໄປຈັດຕັ້ງຜັນຂະຫຍາຍໃຫ້ປະກົດຜົນເປັນຈີງໃນຕໍ່ໜ້າ.