ພັນໂທ ທອງລາ ໄຊຍະວົງສັກ  ຂຶ້ນເປັນຫົວໜ້າຫ້ອງພະລາທິການທະຫານແຂວງຫຼວງພະບາງ

ພັນໂທ ທອງລາ ໄຊຍະວົງສັກ ຂຶ້ນເປັນຫົວໜ້າຫ້ອງພະລາທິການທະຫານແຂວງຫຼວງພະບາງ

July 23, 2020 0 By admin

ຂ່າວສານຫລວງພະບາງ Luangprabang News, ພິທີມອບ – ຮັບໜ້າທີ່ຫົວໜ້າຫ້ອງພະລາທິການທະຫານແຂວງຫຼວງພະບາງ ລະຫວ່າງຜູ້ເກົ່າ ແລະ ຜູ້ໃໝ່ ໄດ້ຈັດຂຶ້ນໃນວັນທີ 21 ກໍລະກົດ 2020 ນີ້ ຢູ່ທີ່ສະໂມສອນຂອງຫ້ອງພະລາທິການທະຫານແຂວງ, ໂດຍການເຂົ້າຮ່ວມຂອງສະຫາຍ ພັນເອກ ສີວິໄຊ ເພັງສັນຕິສຸກ ຄະນະປະຈໍາພັກກອງບັນຊາການ ຫົວໜ້າຫ້ອງການເມືອງທະຫານແຂວງ,ມີສະຫາຍ ພັນໂທ ທອງລາ ໄຊຍະວົງສັກ ຄະນະພັກກອງບັນຊາການ ຫົວໜ້າຫ້ອງພະລາທິການທະຫານແຂວງ, ມີຄະນະພັກ – ຄະນະບັນຊາ ແລະ ພະນັກງານ – ນັກຮົບພາຍໃນຫ້ອງເຂົ້າຮ່ວມ.


ອີງຕາມຂໍ້ຕົກລົງຂອງກະຊວງປ້ອງກັນປະເທດສະບັບເລກທີ 2538/ກປທ, ລົງວັນທີ 29 ພຶດສະພາ 2020 ວ່າດ້ວຍການແຕ່ງຕັ້ງ ບັນດາຮອງຫົວໜ້າກອງບັນຊາການທະຫານແຂວງຫຼວງພະບາງ,ໂອກາດນີ້ ສະຫາຍ ພັນເອກ ສີວິໄຊ ເພັງສັນຕິສຸກ ຄະນະປະຈໍາພັກກອງບັນຊາການ, ຫົວໜ້າຫ້ອງພະລາທິການທະຫານແຂວງຜູ້ເກົ່າ ໄດ້ໃຫ້ກຽດຂຶ້ນຜ່ານບົດສະຫຼຸບການມອບ – ຮັບວຽກລະຫວ່າງ ສະຫາຍ ພັນໂທ ທອງລາ ໄຊຍະວົງສັກ ຄະນະພັກກອງບັນຊາການ ຫົວໜ້າຫ້ອງພະລາທິການທະຫານແຂວງຜູ້ໃໝ່ ເຊິ່ງໄດ້ໃຫ້ຮູ້ວ່າ: ຫ້ອງພະລາທິການປະກອບມີຄະນະພັກຮາກຖານ 5 ສະຫາຍ, ມີ 4 ໜ່ວຍພັກ, ມີສະມາຊິກພັກ 79 ສະຫາຍ,ຍິງ 18 ສະຫາຍ. ມີສະຫະພັນແມ່ຍິງ 19 ສະຫາຍ, ຊາວໜຸ່ມ 34 ສະຫາຍ, ການຈັດຕັ້ງບັນຊາປະກອບມີ 9 ພະແນກ, ມີ 2 ກອງຮ້ອຍ ແລະ 1 ຂະແໜ່ງຂື້ນກັບ, ການຈັດຕັ້ງປະກອບວັດຖຸ – ພາຫະນະ ມີລົດເຊອາ 7 ຄັນ, ລົດບໍລິຫານ 4 ຄັນ, ລົດໄດຮັນ 1 ຄັນ, ລົດໄຖ 2 ຄັນ.

ນອກຈາກນີ້ຍັງໄດ້ໃຫ້ຮູ້ພື້ນຖານເສດຖະກິດຄົງທີ ແລະ ພື້ນຖານເສດຖະກິດຫ້ອງ ເປັນຕົ້ນແມ່ນສໍານັກງານຫ້ອງການ,ເຮືອນກິນ – ເຮືອນນອນ, ເນື້ອທີ່ທໍາການຜະລິດ, ໂຮງງານນໍ້າດື່ມ, ສັດລ້ຽງປະເພດງົວ 39 ໂຕ, ເງິນຄັງສະສົມມີ 48.733.349 ກີບ, ຝາກປະຢັດ 62.377.349 ກີບ, ເງິນອົບຮົມ 64 ລ້ານກວ່າກີບ, ເງິນກອງທຶນຊ່ວຍເຫຼືອເຊິ່ງກັນ ແລະ ກັນ 7.315.000 ກີບ ແລະ ວຽກງານອື່ນໆຕື່ມອີກຈໍານວນໜຶ່ງ. ພິທີໄດ້ເຊັນບົດບັນທຶກມອບ – ຮັບວຽກລະຫວ່າງຫົວໜ້າຫ້ອງພະລາທິການຜູ້ເກົ່າ ກັບ ຜູ້ໃໝ່ ໂດຍມີຄະນະພັກຮາກຖານ, ບັນດາໜ່ວຍພັກ ແລະ ພະນັກງານສະມາຊິກພັກ – ນັກຮົບພາຍໃນອົງການດັ່ງກ່າວເຂົ້າຮ່ວມເປັນສັກຂີພິຍານ.

ໂດຍ: ສົມພອນ ສຸວັນທອນ.