ພຣີເມ່ຍລີກ restart ແມນຊິຕີ້ ຊະນະ ອາຣເຊນໍລ! ວິນລ້າ ສະເໝີ ເຊຟຟິວ!!

ພຣີເມ່ຍລີກ restart ແມນຊິຕີ້ ຊະນະ ອາຣເຊນໍລ! ວິນລ້າ ສະເໝີ ເຊຟຟິວ!!

June 18, 2020 0 By admin

ການແຂ່ງຂັນເຕະບານ ພຣີເມ່ຍລີກ ອັງກິດ ລະດູການ 2019-20 ກັບມາແຂ່ງຂັນອີກຄັ້ງໃນມື້ວານນີ້ ຫລັງພັກຍາວ 100 ກວ່າວັນ ຍ້ອນການລະບາດຂອງພະຍາດ ໂຄວິດ-19 ວານນີ້ ເປັນສອງຄູ່ຕົກຄ້າງ ນັດທີ 29 ຂອງທັງ 4 ທີມ ແມນຊິຕີ້ ເປີດບ້ານ ໄລ່ຕ້ອນ ອາຣເຊນໍລ 3-0 ໄດ້ປະຕູຈາກ: ຣາຮີມ ສະເຕີລິ້ງ ໄລຍະຕໍ່ເວລາບາດເຈັບຂອງເຄິ່ງເວລາທີໜຶ່ງ ນາທີ 45+2′ ປະຕູທີສອງໄດ້ຈາກການສັງຫານຈຸດໂທດຂອງ ເຄວິນ ເດີບຣອຍ ນາທີ 51′ ໄດ້ຈຸດໂທດຈາກຈັງຫວະ ດາວິດ ລຸຍ ກອງຫລັງ ອາຣເຊນໍລ ດຶງ ຣິຢາດ ມາເຣຊ ໃນເຂດໂທດ ຜູ້ຕັດສິນໃຫ້ໃບແດງ, ທ້າຍເກມ ຊິຕີ້ ໄດ້ປະຕູປິດທ້າຍຈາກ ຟິວ ໂຟເດັ້ນ ນາທີ 90+1′ ຈົບເກມ ແມນຊິຕີ້ ຊະນະ ອາຣເຊນໍລ 7 ນັດລວດ ລວມທຸກລາຍການ ດີສຸດໃນປະຫວັດສາດການພົບກັນ.

ຊິຕີ້ ເກັບ 3 ຄະແນນ ເພີ່ມເປັນ 60 ຄະແນນ ຈາກ 29 ນັດ, ຮັກສາອັນດັບສອງຢ່າງໜຽວແໜ້ນ ຕາມຫລັງ ລີເວີພູລ ທີມນຳ 22 ຄະແນນ, ເຫລືອອີກ 9 ນັດ, ໂອກາດປ້ອງກັນແຊ້ມລຳບາກ. ຂະນະທີ່ ອາຣເຊນໍລ ຢູ່ອັນດັບ ຕໍ່ໄປ ມີ 40 ຄະແນນ ຈາກ 29 ນັດ ຫ່າງຈາກພື້ນທີ່ແຊ້ມປ້ຽນລີກ 8 ຄະແນນ.

ສະຖິຕິທີ່ໜ້າສົນໃຈ:

+ ອາຣເຊນໍລ ບໍ່ຊະນະທີມ Big 6 ດ້ວຍກັນໃນຖານະທີມຢາມ 26 ນັດຕິດຕໍ່ກັນ ໃນນີ້ ສະເໝີ 10 ເສຍ 16 ຫລ້າສຸດແມ່ນຊະນະ ແມນຊິຕີ້ ໃນເດືອນມັງກອນ ປີ 2015: 2-0.

+ ລະດູການນີ້ ເຄວິນ ເດີບຣອຍ ມີສ່ວນໃນການຍິງປະຕູຫລາຍກວ່ານັກເຕະທຸກຄົນໃນ ພຣີເມ່ຍລີກ ຍິງ 9 ສົ່ງໃຫ້ເພື່ອນຍິງ 16 ປະຕູ.

+ ຣາຮີມ ສະເຕີລິ້ງ ລົງຫລິ້ນໃຫ້ສັງກັດໃນບ້ານເປັນນັດທີ 50 ລວມທຸກລາຍການ ແລະ ເມື່ອຍິງປະຕູໄດ້ທີມບໍ່ເສຍ ໃນນີ້ ຊະນະ 47 ສະເໝີ 3.

ສ່ວນຜົນອີກໜຶ່ງຄູ່ໃນມື້ວານນີ້ ແອັສຕັນ ວິນລ້າ ສະເໝີກັບ ເຊຟຟິວ ຢູໄນເຕັດ 0-0 ວິນລ້າ ຢູ່ອັນດັບທີ 19 ພື້ນທີ່ຕົກຊັ້ນຕໍ່ໄປ ມີ 26 ຄະແນນ ຫ່າງຈາກພື້ນທີ່ປອດໄພ 1 ຄະແນນ, ຂະນະທີ່ ເຊຟຟິວ ຢູໄນເຕັດ ມີ 44 ຄະແນນ ຢູ່ອັນດັບ 6 ລຸ້ນໂຄຕ້າບານເອີຣົບຕໍ່ໄປໃນ 9 ນັດທີ່ເຫລືອ. ໃນທ້າຍອາທິດນີ້ ສືບຕໍ່ແຂ່ງຂັນນັດທີ 30.

Photo: Manchester City, Arsenal, Aston Villa FC