ກະຊວງແຜນການ ແລະ ການລົງທຶນ ປັບປຸງການຈັດຕັ້ງພາຍໃນ

ກະຊວງແຜນການ ແລະ ການລົງທຶນ ປັບປຸງການຈັດຕັ້ງພາຍໃນ

July 21, 2020 0 By admin

ຂປລ. ໃນວັນທີ 21 ກໍລະກົດ 2020 ທີ່ກະຊວງແຜນການ ແລະ ການລົງທຶນ (ຜທ), ໄດ້ຈັດພິທີປະ ກາດການຈັດຕັ້ງຂັ້ນກົມ ພາຍໃນກະຊວງດັ່ງກ່າວ, ໂດຍການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີ ກະຊວງແຜນການ ແລະ ການລົງທຶນ, ມີບັນດາຮອງລັດຖະມົນຕີ, ທຽບເທົ່າຮອງລັດຖະມົນຕີ, ຫົວໜ້າກົມ, ຮອງກົມ, ຫົວໜ້າພະແນກ ອ້ອມຂ້າງກະຊວງດັ່ງກ່າວ ເຂົ້າຮ່ວມ.


ໃນພິທີ, ໄດ້ຜ່ານດໍາລັດຂອງນາຍົກລັດຖະມົນຕີ ວ່າດ້ວຍການສັບຊ້ອນ ແລະ ແຍກສູນຝຶກອົບຮົມພະນັກງານຄຸ້ມຄອງເສດຖະກິດ-ແຜນການ ເປັນຫົວໜ່ວຍວິຊາການ ຂຶ້ນກັບກະຊວງແຜນການ ແລະ ການລົງທຶນ, ໂດຍແຕ່ງຕັ້ງ ທ່ານ ບິດ ບົວລີວັນ ຫົວໜ້າກົມຈັດຕັ້ງພະນັກງານ ເປັນຫົວໜ້າສູນດັ່ງກ່າວ, ພ້ອມທັງໄດ້ ຜ່ານດໍາລັດຂອງນາຍົກລັດຖະມົນຕີ ແຕ່ງຕັ້ງ ທ່ານ ນາງ ທໍາມາ ເພັດວິໄຊ ຫົວໜ້າຫ້ອງການກະຊວງແຜນການ ແລະ ການລົງທຶນ ເປັນຫົວໜ້າກົມຈັດຕັ້ງ ແລະ ພະນັກງານ ກະຊວງແຜນການ ແລະ ການລົງທຶນ ແລະ ຜ່ານຂໍ້ຕົກລົງຂອງລັດຖະມົນຕີ ກະຊວງແຜນການ ແລະ ການລົງທຶນ ແຕ່ງຕັ້ງ ທ່ານ ຟອງສະໝຸດ ຄໍາວານວົງສາ ຮອງຫົວໜ້າຫ້ອງການ ເປັນຜູ້ຮັກສາການຫົວໜ້າຫ້ອງການ ກະຊວງແຜນການ ແລະ ການລົງທຶນ.


ໃນໂອກາດນີ້, ທ່ານ ສອນໄຊ ສີພັນດອນ ໄດ້ໃຫ້ກຽດໂອ້ລົມຊີ້ນໍາຕໍ່ພິທີມີບາງຕອນສຳຄັນວ່າ: ການປັບປຸງການຈັດຕັ້ງພາຍໃນຄັ້ງນີ້, ແມ່ນອີງໃສ່ຄວາມຮຽກຮ້ອງຕ້ອງການຂອງໜ້າທີ່ວຽກງານສໍາຄັນຂອງພັກ-ລັດ ໃນໄລຍະໃໝ່, ທັງເປັນການເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານ ເພື່ອຜັນຂະຫຍາຍແນວທາງນະໂຍບາຍຂອງພັກ ແລະ ລັດຖະບານ ໃຫ້ປະສົບຜົນສໍາເລັດຕາມຄາດໝາຍວາງໄວ້.

ພ້ອມທັງຮຽກຮ້ອງ ໃຫ້ຜູ້ທີ່ໄດ້ຮັບການແຕ່ງຕັ້ງຄັ້ງນີ້ ຈົ່ງສືບຕໍ່ຝຶກຝົນຫລໍ່ຫລອມຕົນເອງໃນດ້ານຄຸນທາດການເມືອງ, ມີຄວາມເປັນແບບຢ່າງທີ່ດີໃຫ້ພະນັກງານ, ຍົກລະດັບຄວາມຮູ້-ຄວາມສາມາດໃນດ້ານຕ່າງໆໃຫ້ນັບມື້ສູງຂຶ້ນ, ເອົາໃຈໃສ່ປັບປຸງແບບແຜນວິທີເຮັດວຽກໃຫ້ດີ, ປະຕິບັດຫລັກການລວມສູນປະຊາທິປະ ໄຕ, ເຮັດວຽກເປັນໝູ່ຄະນະ, ບຸກຄົນຮັບຜິດຊອບ ແລະ ມີຄວາມສາມັກຄີເປັນປຶກແຜ່ນ ເພື່ອພ້ອມກັນຕັ້ງໜ້າປະຕິບັດໜ້າທີ່ວຽກງານຂອງຕົນໃຫ້ມີຜົນສໍາເລັດ.
ຂ່າວ: ສຸພາສະຫວັນ ສີຊະນະມຸງຄຸນ.ຮູບພາບ: ຂັນໄຊ.