ແຫ່ຮູບຫຼໍ່ພະເຈົ້າໄຊຍະເຊດຖາທິຣາດ  ສູ່ຫໍທຳມະສະພາ ເພື່ອຄົບງັນກ່ອນແຫ່ລົງໄປປະດິດສະຖານທີ່ແຂວງອັດຕະປື

ແຫ່ຮູບຫຼໍ່ພະເຈົ້າໄຊຍະເຊດຖາທິຣາດ ສູ່ຫໍທຳມະສະພາ ເພື່ອຄົບງັນກ່ອນແຫ່ລົງໄປປະດິດສະຖານທີ່ແຂວງອັດຕະປື

July 21, 2020 0 By admin

ໃນວັນທີ 21 ກໍລະກົດ 2020 ຄະນະຮັບຜິດຊອບໂຄງການກໍ່ສ້າງອານຸສາວະລີ ພະເຈົ້າໄຊຍະ ເຊດຖາທິຣາດ ໄດ້ແຫ່ຮູບຫຼໍ່ພະເຈົ້າໄຊຍະ ເຊດຖາທິຣາດ ພ້ອມຊົງຊ້າງ ຈາກບ້ານຈອມມະນີ ມາທີ່ຫໍທຳມະສະພາ (ວັດທາດເຫຼືອເໜືອ) ເມືອງໄຊເສດຖາ ນະຄອນຫຼວງວຽງຈັນໂດຍການເຂົ້າຮ່ວມຂອງ ທ່ານ ຈູມມາລີ ໄຊຍະສອນ ອະດີດປະທານປະເທດ ສປປ ລາວ, ມີ ທ່ານ ພົງໄຊ ໄຊຍະເສນາ ປະທານບໍລິສັດວັງຕັດຂຸດຄົ້ນບໍ່ແຮ່ ໃນນາມເຈົ້າພາບ ພ້ອມດ້ວຍການນຳແຂວງອັດຕະປື ແລະ ພໍ່ແມ່ປະຊາຊົນເຂົ້າຮ່ວມ.

ພິທີສະເຫຼີມສະຫຼອງຮູບຫຼໍ່ພະເຈົ້າໄຊຍະ ເຊດຖາທິຣາດ ຈະຈັດຂຶ້ນທີ່ ຫໍທຳມະສະພາ ວັດພຣະທາດຫຼວງເຫນືອ ເມືອງໄຊເຊດຖາ ນະຄອນຫຼວງວຽງຈັນ ຕັ້ງແຕ່ ວັນທີ 21 ເຖິງ ຈົນວັນທີ 26 ກໍລະກົດ 2020 ເຊິ່ງລໍາດັບພິທີບຸນ ມີດັ່ງນີ້:ວັນທີ21 ເຖິງ ວັນທີ 25 ກໍລະກົດ 2020 ໃນທຸກໆ ວັນ ຕັ້ງແຕ່ ເວລາ 08:00 ໂມງ ຍາດໂຍມຮ່ວມບຸນໂມທະນາທານ ທີ່ຫໍທຳມະສະພາ ວັດພຣະທາດຫຼວງເຫນືອ ເມືອງໄຊເຊດຖາ ເສີມບຸນປາຣະມີ ທີ່ຮູບເຫມືອນພຣະເຈົ້າໄຊເຊດຖາຊົງຊ້າງ ;

ເວລາ 11:00 ໂມງ ພຣະສົງ ສັນເພນ ອອກຕົນຍາດໂຍມຮັບປະທານອາຫານທ່ຽງ ; ເວລາ 17:00 ໂມງ ຟັງສູດປະຣິດຕະມຸງຄຸນ ຟັງທັມມະເທສະຫນາປາຣະມີ 30 ທັດ ເພື່ອເສີມບຸນປາຣະມີຈາກພຣະສົງ 16 ອົງ; ເວລາ 19:30 ໂມງ ນັ່ງຂາວຫົ່ມຂາວ ໄຫວ້ພຣະສູດມົນ ຈະເຣີນສະມາທິພາວະນາ ຟັງທັມມະເທສະຫນາ ຈົນສົມຄວນແກ່ເວລາ ແລ້ວພັກຜ່ອນ.

ວັນເສົາ ວັນທີ 26 ກໍລະກົດ 2020 ເວລາ 07:00 ໂມງ ພິທີຕັກບາດ ຖວາຍທານ ແດ່ພຣະສົງ  ເປັນອັນຈົບພິທີບໍາເພັນບຸນ ສະເຫຼີມສະຫຼອງ ພຣະບໍຣົມມະຮູບເຫມືອນ ສົມເດັດພຣະເຈົ້າໄຊຍະເຊດຖາ ທີ່ ນະຄອນຫຼວງວຽງຈັນ ແລະ ກຽມທີ່ຈະອັນເຊີນ ເຄື່ອນຍ້າຍໄປປະດິດສະຖານໄວ້ ທີ່ ອະນຸສາວະລີ ບ້ານຫາດຊາຍຂາວ ເມືອງໄຊເຊດຖາ ແຂວງອັດຕະປື ເຊິ່ງຜ່ານແຂວງຕ່າງໆ ແລະມີການຮ່ວມບໍາເພັນບຸນສະເຫຼີມສະຫຼອງ ໃນແຂວງຕ່າງໆ ທີ່ຜ່ານໄປນັ້ນ.

ໃນບັນດາແຂວງ ທີ່ຜ່ານໄປນັ້ນ ຈະມີການປະກອບພິທີບໍາເພັນບຸນກຸສົນ 1 ຄືນ ຄື:ສະເຫຼີມສະຫຼອງທີ່ ແຂວງບໍລິຄໍາໄຊ ໃນວັນທີ 27 ກໍລະກົດ 2020 , ສະເຫຼີມສະຫຼອງ ທີ່ ແຂວງຄໍາມ່ວນ ໃນວັນທີ 28 ກໍລະກົດ2020;  ສະເຫຼີມສະຫຼອງ ທີ່ ແຂວງສະຫວັນນະເຂດ ໃນວັນທີ 29 ກໍລະກົດ 2020 ; ສະເຫຼີມສະຫຼອງ ທີ່ ແຂວງຈໍາປາສັກ ໃນວັນທີ 30 ກໍລະກົດ 2020.

ສະເຫຼີມສະຫຼອງ ທີ່ ແຂວງອັດຕະປື ໃນວັນທີ 31 ກໍລະກົດ 2020 ແລະ ຈະຍົກຂຶ້ນພຣະແທ່ນປະດິດສະຖານ ໄວ້ ພ້ອມທັງບໍາເພັນບຸນກຸສົນຖວາຍທານ ໃນວັນທີ 01 ສິງຫາ 2020 ເປັນອັນຈົບພິທີການອັນເຊີນ ພຣະບໍຣົມມະຮູບເຫມືອນ ພຣະເຈົ້າໄຊຍະເຊດຖາທິຣາດ ໄປປະດິດສະຖານ ໄວ້ທີ່ພຣະແທນ ອະນຸສາວະລີ ແຂວງ ອັດຕະປື.