ກອງປະຊຸມສະພາປະຊາຊົນນະຄອນຫຼວງວຽງຈັນ ຮັບຮອງເອົາການແຕ່ງຕັ້ງການນໍາ 4 ພະແນກການ

ກອງປະຊຸມສະພາປະຊາຊົນນະຄອນຫຼວງວຽງຈັນ ຮັບຮອງເອົາການແຕ່ງຕັ້ງການນໍາ 4 ພະແນກການ

July 20, 2020 0 By admin

ກອງປະຊຸມ ສະໄຫມສາມັນ ເທື່ອທີ 9 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ I ໄດ້ດໍາເນີນ ມາແຕ່ວັນທີ 15-17 ກໍລະກົດ 2020 ໄດ້ອັດລົງໂດຍຜົນສຳເລັດ ອັນຈົບງາມ ພ້ອມຮັບຮອງ ເອົາການນໍາ 4ພະແນກການ ເພື່ອຂັບເຄື່ອນການພັດທະນາເສດຖະກິດ – ສັງຄົມໃຫ້ບັນລຸຕາມເປົ້າໝາຍ.


ກອງປະຊຸມດັ່ງກ່າວ ໄດ້ປິດລົງໃນວັນທີ 17 ກໍລະກົດ 2020 ເປັນປະທານຂອງທ່ານ ອານຸພາບ ຕຸນາລົມ ປະທານສະພາປະຊາຊົນ ນະຄອນຫຼວງວຽງຈັນ ແລະ ໃຫ້ກຽດເຂົ້າຮ່ວມຂອງທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ ມີບັນດາສະມາຊິກສະພາແຫ່ງຊາດເຂດເລືອກຕັ້ງທີ1 ແລະ ສະມາຊິກສະພາປະຊາຊົນນະຄອນຫຼວງວຽງຈັນ ພ້ອມແຂກທີ່ຖືກເຊີນເຂົ້າຮ່ວມ.


ທ່ານ ອານຸພາບ ຕຸນາລົມ ກ່າວວ່າ: ຕະຫຼອດໄລຍະເວລາ 03 ວັນທີ່ຜ່ານມາ, ບັນດາທ່ານຜູ້ແທນໄດ້ສຸມທຸກສະຕິປັນຍາໃນການຄົ້ນຄວ້າ, ປະກອບຄວາມຄິດເຫັນຢ່າງມີເຫດຜົນ, ມີເນື້ອໃນທີ່ເລິກເຊິ່ງ, ມີຄວາມເປັນເອກະພາບສູງໃນການຄົ້ນຄວ້າ, ພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆ ຂອງນະຄອນຫຼວງ ດັ່ງນີ້:


1. ໄດ້ຮັບຮອງເອົາບົດລາຍງານຂອງທ່ານເຈົ້າຄອງ ນະຄອນຫຼວງວຽງຈັນ ກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2020 ຂອງນະຄອນຫຼວງ ແລະ ການສະເຫນີດັດແກ້ແຜນງົບປະມານ, ຕົວເລກຄາດການເຕີບໂຕທາງດ້ານເສດຖະກິດ ຂອງນະຄອນຫຼວງ;
2. ໄດ້ຮັບຮອງເອົາທ່ານນາງ ບົວວອນ ສຸກສາແສງ ວ່າການແທນຫົວໜ້າຫ້ອງວ່າການນະຄອນຫຼວງວຽງຈັນ ເປັນຫົວໜ້າຫ້ອງວ່າການນະຄອນຫຼວງວຽງຈັນ;


3. ໄດ້ຮັບຮອງເອົາທ່ານ ພູທອນ ແກ້ວດວງມະນີ ຫົວໜ້າກົມໂຄສະນາເຜີຍແຜ່ກົດໝາຍ ກະຊວງຍຸຕິທຳ ເປັນຫົວໜ້າພະແນກ ຍຸຕິທຳ ນະຄອນຫຼວງວຽງຈັນ;


4. ໄດ້ຮັບຮອງເອົາທ່ານ ພັອ ສຸພະຈັນ ບຸດດາຄຳ ຮັກສາການ ຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ເປັນຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ;


5. ໄດ້ຮັບຮອງເອົາທ່ານ ສົມພອນ ສອນດາລາ ວ່າການແທນຫົວໜ້າ ພະແນກສຶກສາທິການ ແລະ ກີລາ ນະຄອນຫຼວງວຽງຈັນ ເປັນ ຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ.


6. ໄດ້ຮັບຮອງເອົາຮ່າງຂໍ້ຕົກລົງຂອງເຈົ້າຄອງ ນະຄອນຫຼວງວຽງຈັນ ວ່າດ້ວຍການກໍານົດຂອບເຂດ ແລະ ປະເມີນຫົວຫນ່ວຍລາຄາທົດແທນຄ່າເສຍຫາຍ ຕໍ່ຜູ້ຖືກຜົນກະທົບຈາກໂຄງການກໍ່ສ້າງສາຍສົ່ງໄຟຟ້າ 230 ກິໂລໂວນ ຂອງລັດວິສາຫະກິດໄຟຟ້າລາວ ແຕ່ສະຖານີນາບົງ, ເມືອງປາກງື່ມ ຫາ ສະຖານີດົງໂພສີ, ເມືອງຫາດຊາຍຟອງ, ນະຄອນຫຼວງວຽງຈັນ;


7. ໄດ້ຮັບຮອງເອົາບົດລາຍງານການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2020 ຂອງສະພາປະຊາຊົນ ນະຄອນຫຼວງວຽງຈັນ; 8. ໄດ້ຮັບຟັງການຊີ້ແຈ້ງບາງບັນຫາທີ່ພົ້ນເດັ່ນໃນໄລຍະຜ່ານມາ.

ທີ່ມາ:ຂ່າວເສດຖະກິດ ການຄ້າ