ລັດຖະມົນຕີກະຊວງ ຮສສ ພ້ອມຄະນະ ເຄື່ອນໄຫວຢຽ້ມຢາມ, ມອບເຄື່ອງ ແລະ ເຮັດວຽກ ຢູ່ ແຂວງຫຼວງນຳ້ທາ ແລະ ແຂວງອຸດົມໄຊ.

ລັດຖະມົນຕີກະຊວງ ຮສສ ພ້ອມຄະນະ ເຄື່ອນໄຫວຢຽ້ມຢາມ, ມອບເຄື່ອງ ແລະ ເຮັດວຽກ ຢູ່ ແຂວງຫຼວງນຳ້ທາ ແລະ ແຂວງອຸດົມໄຊ.

July 19, 2020 0 By admin

ໃນລະຫວ່າງວັນທີ 14 – 16 ກໍລະກົດ 2020ນີ້, ທ່ານ ປອ. ຄຳແພງ ໄຊສົມແພງ ກໍາມະການສູນກາງພັກ,ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ( ຮສສ) ພ້ອມຄະນະ, ໄດ້ເຄື່ອນໄຫວຢຽ້ມຢາມຖາມຂ່າວ ແລະ ເຮັດວຽກ ຢູ່ ພະແນກ ຮສສ ແຂວງ ຫຼວງນໍ້າທາ ແລະ ອຸດົມໄຊ .


ຜ່ານການຮັບຟັງການລາຍງານ ຂອງ ພະແນກ ທ່ານ ຍັງໄດ້ສະແດງຄວາມຍ້ອງຍໍຊົມເຊີຍ ໄດ້ຈັດຕັ້ງປະຕິບັດວຽກງານຕາມພາລະບົດບາດ ໄດ້ມີຜົນສຳເລັດເປັນຢ່າງດີ, ພ້ອມນີ້ ທ່ານລັດຖະມົນຕີ ຮສສ ຍັງໄດ້ຍົກໃຫ້ຕໍ່ກັບສະພາບການທີ່ຜົ້ນເດັ່ນຂອງ ພາຍໃນປະເທດ ແລະ ສະພາບການສາກົນ ແລະ ພາກພື້ນ, ເປັນຕົ້ນ ບັນຫາການແຜ່ລະບາດ ຂອງເຊື້ອພະຍາດລະບາດ ໂຄວິດ-19 ທີ່ສືບຕໍ່ ຂະຫຍາຍວົງກວ້າງໃນທົ່ວໂລກ ແລະ ບັນຫາໄພພິບັດທາງທຳມະຊາດທີ່ນັບມື້ນັບໜັກໜ່ວງ ສົ່ງຜົນໃຫ້ເກີດຄວາມເສຍຫາຍ ແລະ ຜູ້ຄົນລົ້ມຕາຍເປັນຈຳນວນຫຼວງຫຼາຍ. ຕໍ່ກັບບັນຫາ ແລະ ສະພາບການດັ່ງກ່າວ ທ່ານໄດ້ເນັ້ນໜັກ ໃຫ້ ຄະນະນຳພະແນກ, ກໍຄືພະນັກງານລັດຖະກອນ ໃນຂະແໜງ ຮສສ ຈົ່ງສືບຕໍ່ຍົກສູງ ວຽກງານການເມືອງ-ແນວຄິດ ລັດຖະກອນ-ສະມາຊິກພັກ ພາຍໃນພະແນກ ໂດຍສຸມໃສ່ການຈັດຕັ້ງເຊື່ອມຊືມ ບັນດາເອກະສານສຳຄັນຂອງພັກ, ຂອງຊາດ, ສ້າງສະຕິ ຄວາມຮັບຜິດຊອບຕໍ່ການຈັດຕັ້ງ, ມີຄວາມສະຫງົບ ແລະ ຄວາມສາມັກຄີພາຍໃນ ໜັກແໜ້ນພໍສົມຄວນ ສະແດງອອກ ກອງປະຊຸມໃຫຍ່ ຄະນະພັກຮາກຖານ ພະແນກແຮງງານ ແລະ ສະຫວັດດີການສັງຄົມແຂວງ ໄດ້ດຳເນີນຂື້ນ ແລະ ມີຜົນສຳເລັດ.


ວຽກງານ ພັດທະນາສີມືແຮງງານ ແລະ ຈັດຫາງານ ໃຫ້ບັນລຸ ຕົວເລກຄາດໝາຍ ໂດຍສະເພາະໃນສະພາບການ ພະຍາດແຜ່ລະບາດ ໂຄວິດ-19 ເຊິ່ງສາມາດສຸມໃສ່ເກັບກຳ ຂໍ້ມູນແຮງງານທີ່ກັບມາຈາກຕ່າງປະເທດ, ການເກັບກຳສະຖິຕິຄວາມຕ້ອງການກຳລັງແຮງງານ, ຜູ້ວ່າງງານ ແລະ ຄວາມຕ້ອງການຝຶກສືມີແຮງງານ ໄດ້ເປັນຢ່າງດີ.


ວຽກຄຸມຄອງແຮງງານ ກໍເຊັ່ນດຽວກັນ ສາມາດລົງຈັດຕັ້ງເຜີຍແຜ່ບັນດານິຕິກຳຕ່າງໆ ທີ່ກ່ຽວກັບແຮງງານ ແລະ ລົງກວດກາແຮງງານຢ່າງເປັນປົກກະຕິ ພ້ອມທັງເກັບກຳໄດ້ຫົວໜ່ວຍແຮງງານ ທີ່ຖືກຜົນກະທົບ ຫຼື ຖືກຍຸດເຊົາກິດຈະການຊົ່ວຄາວໃນໄລຍະພະຍາດລະບາດ ເພື່ອສັງລວມຂໍ້ມູນໃຫ້ແກ່ທາງກະຊວງ ພ້ອມນີ້ ໄດ້ປະກອບສ່ວນຢ່າງຕັ້ງໜ້າວຽກງານ ກັກກັນແຮງງານທີ່ກັບຄືນ ຈາກຕ່າງປະເທດຮ່ວມກັບຄະນະສະເພາະກິດ.


ວຽກງານສະຫວັດດີການສັງຄົມ ໄດ້ສູ້ຊົນປະຕິບັດຕົວເລກອັດຕາປົກຫຸ້ມ ໃນລະບົບປະກັນສັງຄົມເພີ້ມຂື້ນ, ໄດ້ອຳນວຍຄວາມສະດວກ ໃນການປະຕິບັດຈ່າຍເງິນອຸດໜູນຕ່າງໆ ແລະ ຈັດຕັ້ງການມອບຮັບ ເງິນນະໂຍບາຍຕໍ່ຜູ້ມີຜົນງານ ໄດ້ຕາມແຜນການ.
ວຽກງານຊ່ວຍເຫຼືອໄພພິບັດ, ວຽກງານກາແດງ ແລະ ວຽກງານແກ້ໄຂບັນຫາລະເບີດ ບໍ່ທັນແຕກ ກໍໄດ້ຮັບການຈັດຕັ້ງປະຕິບັດ ມີໝາກຜົນ.


ໂອກາດທີ່ ທ່ານ ປອ. ຄຳແພງ ໄຊສົມແພງລັດຖະມົນຕີກະຊວງ ຮສສ ພ້ອມຄະນະ ເຄື່ອນໄຫວຢຽ້ມຢາມ ແລະ ເຮັດວຽກ ຢູ່ ແຂວງຫຼວງນຳ້ທາ ແລະ ແຂວງອຸດົມໄຊ ໃນຄັ້ງນີ້, ຍັງໄດ້ນຳເອົາ ເຄື່ອງໄປມອບເພື່ອຊວ່ຍເຫຼືອປະຊາຊົນທີປະສົບໄພພິບັດ ກ່າວຮັບໂດຍການນຳຂອງແຂວງ, ເຄື່ອທີ່ນຳມາມອບໃນຄັ້ງນີ້ລວມມີ: ແຂວງຫຼວງນຳ້ທາ ລວມມີດັ່ງນີ້: ເຂົ້າສານໜຽວ ຈາກກອງທຶນເພື່ອນຮວ່ມງານ KR1 ຈຳນວນ 167 ໂຕນ , ມູນຄ່າ: 1,57 ຕື້ກວ່າກີບ , ເຄື່ອງໃຊ້ຄົວເຮືອນ, ເຄື່ອງນຸ່ງຫົມ ແລະ ເຕັ້ນນອນ ລວມມູນຄ່າ: 344 ລ້ານກວ່າກີບ, ລວມມູນຄ່າທັງໝົດ: 1,92 ຕື້ກວ່າກີບ.


ແຂວງອຸດົມໄຊ ມີດັ່ງນີ້: ເຂົ້າສານໜຽວ ຈາກກອງທຶນເພື່ອນຮວ່ມງານ KR1 ຈຳນວນ 1,030 ໂຕນ , ມູນຄ່າ: 9,72 ຕື້ກວ່າກີບ , ເຄື່ອງໃຊ້ຄົວເຮືອນ, ເຄື່ອງນຸ່ງຫົມ ແລະ ເຕັ້ນນອນ ລວມມູນຄ່າ: 344 ລ້ານກວ່າກີບ, ລວມມູນຄ່າທັງໝົດ: 10,06 ຕື້ກວ່າກີບ.
ໂອກາດດັ່ງກ່າວ ທ່ານ ປອ. ຄຳແພງ ໄຊສົມແພງ ລັດຖະມົນຕີກະຊວງ ຮສສ ພ້ອມຄະນະ, ຍັງໄດ້ຖືໂອກາດ ລົງຢ້ຽມຢາມບັນດາຫົວໜວ່ຍແຮງງານຕົວແບບ ແລະ ຢຽ້ມຢາມໂຄງການທີ່ມີຄວາມຕ້ອງການນຳໃຊ້ແຮງງານລາວໃຫ້ມີວຽກເຮັດງານທຳ ຢູ່ເຂດເສດຖະກິດພິເສດບໍ່ເຕັນ ນຳອີກ.

( ຂ່າວສານຮສສ: ເພັດສະໄໝ)