ເມືອງ ອາດສະພັງທອງ ຈັດພິທີປະກາດປັບປຸງປ່ຽນແປງການຈັດຕັ້ງຫຼາຍຕໍາແໜ່ງ.

ເມືອງ ອາດສະພັງທອງ ຈັດພິທີປະກາດປັບປຸງປ່ຽນແປງການຈັດຕັ້ງຫຼາຍຕໍາແໜ່ງ.

July 17, 2020 0 By admin

ວິທະຍຸກະຈາຍສຽງ ສະຫວັນນະເຂດ , ໃນວັນທີ 15 ກໍລະກົດ 2020 ນີ້; ຢູ່ທີ່ສະໂມສອນຂອງເມືອງ ອາດສະພັງທອງ ໄດ້ຈັດພິທີປະກາດການແຕ່ງຕັ້ງຫົວໜ້າ ແລະ ບັນດາຮອງຫົວໜ້າຫ້ອງການອ້ອມຂ້າງເມືອງ ຫຼາຍຕໍາແໜ່ງ ໃຫ້ກຽດເຂົ້າຮ່ວມໃນພິທີຂອງທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ, ມີຮອງຫົວໜ້າພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ຮອງຫົວໜ້າພະແນກຍຸຕິທໍາແຂວງ , ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ, ຮອງຫົວໜ້າຫ້ອງການອ້ອມຂ້າງເມືອງຕະຫຼອດຮອດບັນດາພະນັກງານລັດຖະກອນກໍ່ໄດ້ເຂົ້າຮ່ວມ.


ໃນພິທີທ່ານ ສົມພິດ ພຸດທະວົງ ຫົວໜ້າຄະນະຈັດຕັ້ງເມືອງ ອາດສະພັງທອງ ກໍ່ໄດ້ຂຶ້ນຜ່ານຂໍ້ຕົກລົງຂອງທ່ານ ເຈົ້າເມືອງ ອາດສະພັງທອງສະບັບເລກທີ 285/ຈມ.ອທ ວ່າດ້ວຍການແຕ່ງຕັ້ງຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ ອາດສະພັງທອງ, ເຈົ້າເມືອງ ອາດສະພັງທອງຕົກລົງອະນຸມັດແຕ່ງຕັ້ງທ່ານ ດາວວີ ວັງນາ ຜູ້ວ່າການແທນຫົວໜ້າຫ້ອງການຂຶ້ນເປັນຫົວໜ້າຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວເມືອງ.

ຈາກນັ້ນ ກໍ່ຍັງໄດ້ຜ່ານຂໍ້ຕົກລົງຂອງທ່ານ ເຈົ້າເມືອງ ອາດສະພັງທອງສະບັບເລກທີ 230 /ຈມ.ອທ ວ່າດ້ວຍການແຕ່ງຕັ້ງຮອງຫົວໜ້າຫ້ອງການຍຸຕິທໍາເມືອງ, ເຈົ້າເມືອງ ອາດສະພັງທອງຕົກລົງອະນຸມັດແຕ່ງຕັ້ງທ່ານ ລໍາມະໂນ ໄຊຍະສອນ ຫົວໜ້າໜ່ວຍງານທະບຽນສານຂຶ້ນເປັນຮອງຫົວໜ້າຫ້ອງການຍຸຕິທໍາເມືອງ, ຜ່ານຂໍ້ຕົກລົງຂອງທ່ານ ເຈົ້າເມືອງ ອາດສະພັງທອງສະບັບເລກທີ 282 /ຈມ.ອທ ວ່າດ້ວຍການແຕ່ງຕັ້ງຮອງຄະນະຈັດຕັ້ງເມືອງ, ເຈົ້າເມືອງ ອາດສະພັງທອງຕົກລົງອະນຸມັດແຕ່ງຕັ້ງທ່ານ ເບິ້ນ ໄຊຍະກຸມມານ ເປັນຮອງຄະນະຈັດຕັ້ງເມືອງ, ຜ່ານຂໍ້ຕົກລົງຂອງທ່ານ ເຈົ້າເມືອງ ອາດສະພັງທອງສະບັບເລກທີ 284 /ຈມ.ອທ ວ່າດ້ວຍການແຕ່ງຕັ້ງຮອງຫົວໜ້າຫ້ອງວ່າການເມືອງ, ເຈົ້າເມືອງ ອາດສະພັງທອງຕົກລົງອະນຸມັດແຕ່ງຕັ້ງທ່ານ ສຸດາຈັນ ວົງດາລາ ວິຊາການ ຂຶ້ນເປັນ ຮອງຫົວໜ້າຫ້ອງວ່າການເມືອງ.

ຜ່ານຂໍ້ຕົກລົງຂອງທ່ານ ເຈົ້າເມືອງ ອາດສະພັງທອງສະບັບເລກທີ 309 /ຈມ.ອທ ວ່າດ້ວຍການແຕ່ງຕັ້ງພະນັກງານ, ເຈົ້າເມືອງ ອາດສະພັງທອງອອກຂໍ້ຕົກລົງອະນຸມັດແຕ່ງຕັ້ງທ່ານ ພູທອນ ວໍລະເດດ ທີ່ຍົກຍ້າຍມາຈາກຫ້ອງການສຶກສາທິການ ແລະ ກິລາເມືອງ ເປັນຮອງຫົວໜ້າຫ້ອງການພາຍໃນເມືອງ ແລະ ໄດ້ຜ່ານຂໍ້ຕົກລົງຂອງກະຊວງແຜນການ ແລະ ການລົງທຶນ ສະບັບເລກທີ 0884 ວ່າດ້ວຍການແຕ່ງຕັ້ງຮອງຫົວໜ້າສູນສະຖິຕິປະຈໍາເມືອງ ອາດສະພັງທອງ ແຂວງ ສະຫວັນນະເຂດ ລັດຖະມົນຕີກະຊວງແຜນການ ແລະ ການລົງທຶນຕົກລົງແຕ່ງຕັ້ງທ່ານນາງ ມະນີຈັນ ບຸດຕະວົງ ເປັນຮອງສູນສະຖິຕິປະຈໍາເມືອງ ອາດສະພັງທອງ, ແຂວງ ສະຫວັນນະເຂດ ( ຕໍາແໜ່ງບໍລິຫານປະເພດ 6 ) ແລະ ເປັນຜູ້ຮັກສາການຫົວໜ້າສູນສະຖິຕິປະຈໍາເມືອງ ອາດສະພັງທອງ ຕື່ມອີກດ້ວຍ.


ເພື່ອໃຫ້ພິທີມີຄວາມໝາຍ ແລະ ຄວາມສໍາຄັນຂຶ້ນຕື່ມທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ກໍ່ໃຫ້ກຽດໂອ່ລົມຕໍ່ພິທີໂດຍທ່ານໄດ້ຮຽກຮ້ອງໃຫ້ບັນດາທ່ານທີ່ຮັບໜ້າທີ່ໃໝ່ຈົ່ງພ້ອມກັນປະຕິບັດໜ້າທີ່ຂອງຕົນຢ່າງເຕັມສ່ວນເພື່ອພັດທະນາວຽກງານພາຍໃນເມືອງໃຫ້ມີຄວາມສະດວກສະບາຍຫຼາຍຂຶ້ນກວ່າເກົ່າ ແລະ ຮ່ວມໃຈກັນພັດທະນາແຜນເສດຖະກິດ – ສັງຄົມຂອງເມືອງໄປເທື່ອລະກ້າວ.