ທົ່ວເມືອງໄຊບູລີ ຈັດພິທີສອບເສັງຈົບຊັ້ນປະຖົມສຶກສາ ປໍ 5 ປະຈໍາປີ 2020

ທົ່ວເມືອງໄຊບູລີ ຈັດພິທີສອບເສັງຈົບຊັ້ນປະຖົມສຶກສາ ປໍ 5 ປະຈໍາປີ 2020

July 17, 2020 0 By admin

ໃນວັນທີ 16 ກໍລະກົດ 2020 ນີ້, ໄດ້ຈັດພິທີສອບເສັງຈົບຊັ້ນປະຖົມສຶກ ປໍ 5 ປະຈໍາປີ 2020ໃນທົ່ວເມືອງໄຊບູລີ. ໂດຍພິທີໄດ້ຈັດຂຶ້ນ ຢ່າງເປັນທາງການ ຢູ່ທີ່ ໂຮງຮຽນ ປະຖົມສົມບູນສາລະພູມ ເມືອງໄຊບູລີ ແຂວງສະຫວັນນະເຂດ, ໂດຍພາຍໃຕ້ການໃຫ້ກຽດເຂົ້າຮ່ວມເປັນປະທານ ຂອງ ທ່ານ ດຣ ສຸລິວົງ ສີວໍລະວົງ ຄະນະປະຈໍາພັກເມືອງ ຮອງເຈົ້າເມືອງໄຊບູລີ.


ທ່ານ ພູມສະຫວັນ ຈັນທະວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະກິລາເມືອງ, ມີຄະນະກໍາມະການປະຈໍາສູນສອບເສັງ, ຄູອາຈານ-ຜູ້ອານວຍການໂຮງຮຽນ ພ້ອມອໍານາດການປົກຄອງບ້ານ ແລະນ້ອງນັກຮຽນ- ນັກສອບເສັງ ເຂົ້າຮ່ວມ.

ໃນພິທີ ທ່ານ ຄໍາຮຸ່ງ ໄຊຍະລຸນ ຫົວໜ້າໜ່ວຍງານ ກ່ອນໄວຮຽນ, ກໍ່ໄດ້ລາຍງານໃຫ້ຮູ້ວ່າ: ໃນທົ່ວເມືອງໄຊບູລີ ມີສູນສອບເສັງທັງໝົດ 12 ສູນ, ໃນນັ້ນມີ ສູນສອບເສັງ ແກ້ງກະເບົາ, ສູນສອບເສັງທ່າຂາມ, ດົງພຸງ, ຜັກເຜື້ອ, ສົມສະອາດ, ຕົ້ນແຫນ, ດົງໄພວັນ, ນາວໃຕ້, ເຄື່ອເຂົາກາດ, ມະນີລາດ, ສາລະພູມ ແລະສູນສອບເສັງຊຽງໄຄ, ໃນນີ້ລວມມີ 48 ຫ້ອງເສັງ, ຈໍານວນນັກສອບເສັງທັງໝົດມີ 972 ຄົນ, ຍິງ 499 ຄົນ, ຫົວບົດ ແລະວິຊາທີ່ນໍາສອບເສັງໃນຄັ້ງນີ້ມີຄື: ວິຊາພາສາລາວໄວຍາກອນ+ຫັດແຕ່ງ, ວິຊາຂຽນທວາຍ, ໂລກອ້ອມຕົວ ແລະວິຊາຄະນິດສາດ ຈາກນັ້ນໃນພິທີ ກໍ່ໄດ້ເປີດຫົວຂໍ້ສອບເສັງ.

ເປັນກຽດຕັດຫົວບົດສອບເສັງຊົບຊັ້ນປະຖົມສຶກສາ ປໍ 5 ໃນຄັ້ງນີ້ ໂດຍ ທ່ານ ດຣ ສຸລິວົງ ສີວໍລະວົງ ຮອງເຈົ້າເມືອງໄຊບູລີ, ໂດຍການຊ່ອງໜ້າຂອງຄະນະກໍາມະການຈັດການສອບເສັງ, ຄູອາຈານ, ໜ່ວຍງານກ່ຽວຂ້ອງຕະຫຼອດຮອດນ້ອງນັກຮຽນນັກສອບເສັງເຂົ້າຮ່ວມ ເປັນສັກຂີພິຍານນໍາ ແລະການສອບເສັງໃນຄັ້ງນີ້ແມ່ນໄດ້ກໍານົດ 2 ວັນ ເຊິ່ງເລີ່ມແຕ່ວັນທີ 16 ຫາ 17 ກໍລະກົດ 2020 ຈຶ່ງສໍາເລັດ.

ພ້ອມດຽວກັນນີ້, ໃນສູນສອບເສັງທົ່ວເມືອງ ກໍ່ຍັງໄດ້ປະຕິບັດຕາມມາດຕະການປ້ອງກັນ, ຄວບຄຸມ ແລະສະກັດກັ້ນການແຜ່ລະບາດຂອງພະຍາດ Covid -19 ອີກດ້ວຍ, ໂດຍໃຫ້ນັກຮຽນນັກສອບເສັງ ແລະຄູ-ອາຈານ ຄະນະກໍາມະການທຸກຄົນ ຕ້ອງໄດ້ຮັກສາໄລຍະຫ່າງ, ໃສ່ຜ້າອັດປາກ-ດັງ, ລ້າງມືດ້ວຍເຈວ – ສະບູ່ ແລະວັດແທກອຸນຫະພູມຮ່າງກາຍ ຂອງແຕ່ລະຄົນ ກ່ອນເຂົ້າຫ້ອງສອບເສັງ.
ພາບ ແລະຂ່າວ: ຄໍາກອນ ພອນມາລາ