ແຂວງຈໍາປາສັກ ເປີດຕະຫລາດນັດ ສົ່ງເສີມຜະລິດຕະພັນພາຍໃນ ຕ້ອນຮັບກອງປະຊຸມໃຫຍ່ອົງຄະນະພັກແຂວງ

ແຂວງຈໍາປາສັກ ເປີດຕະຫລາດນັດ ສົ່ງເສີມຜະລິດຕະພັນພາຍໃນ ຕ້ອນຮັບກອງປະຊຸມໃຫຍ່ອົງຄະນະພັກແຂວງ

July 16, 2020 0 By admin

ຂປລ.  ໃນວັນທີ 15-19 ກໍລະກົດ 2020 ນີ້, ພະແນກອຸດສາຫະກໍາ ແລະ ການຄ້າແຂວງ ຮ່ວມກັບ ສະພາການຄ້າ-ອຸດສາຫະກໍາ ແລະ ສະມາຄົມນັກທຸລະກິດໜຸ່ມ ແຂວງຈໍາປາສັກ ເປີດຕະຫລາດນັດວາງສະແດງ ແລະ ຈໍາໜ່າຍສິນຄ້າ ປະເພດອຸດສະຫະກໍາ, ຫັດຖະກໍາ ແລະ ກະສິກໍາ ເພື່ອສົ່ງເສີມຜະລິດຕະພັນພາຍໃນ, ທັງເປັນການສ້າງຂະບວນການຕ້ອນຮັບກອງປະຊຸມໃຫຍ່ ຄັ້ງທີ VIII.

ໂດຍມີ ທ່ານ ມະໄລທອງ ກົມມະສິດ ຮອງເຈົ້າແຂວງຈໍາປາສັກ, ມີການນໍານະຄອນປາກເຊ, ເມືອງ, ພະແນກການ ກົມກອງອ້ອມຂ້າງແຂວງ, ຫົວໜ່ວຍທຸລະກິດ ຜູ້ປະກອບການຊາວຄ້າຂາຍ ເຂົ້າຮ່ວມ.


ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າ ແຂວງຈໍາປາສັກ ໄດ້ກ່າວວ່າ: ຈຸດປະສົງຂອງການຈັດຕະຫລາດນັດຄັ້ງນີ້ ກໍເພື່ອເປັນການສົ່ງເສີມຜະລິດຕະພັນພາຍໃນ ເປັນຕົ້ນ ສິນຄ້າອຸດສະຫະກໍາ, ຫັດຖະກໍາ ແລະ ກະສິກໍາ ຂອງຫົວໜ່ວຍການຜະລິດ, ຜູ້ປະກອບການທີ່ມີຢູ່ແລ້ວ ໃຫ້ມີການຂະຫຍາຍຕົວຢ່າງກ້ວາງຂວາງຫລາຍຂຶ້ນ ລວມທັງສິນຄ້າທີ່ໄດ້ກາໝາຍໜຶ່ງເມືອງໜື່ງຜະລິດຕະພັນ (ODOP) ຂອງແຂວງ ໃຫ້ຈໍລະຈອນຊື້ຂາຍແກ່ຜູ້ຊົມໃຊ້ ແລະ ຕອບສະໜອງຄວາມຮຽກຮ້ອງຕ້ອງການຂອງສັງຄົມ.

ຖ້າສິນຄ້າທີ່ຜະລິດໄດ້ຮັບການຈໍາໜ່າຍ ຫລື ມີຕະຫລາດຮອງຮັບຢ່າງກ້ວາງຂວາງເທົ່າໃດ ກໍຈະເປັນປັດໄຈສໍາຄັນໃຫ້ແກ່ການລຶບລ້າງຄວາມທຸກຍາກຂອງປະຊາຊົນ ກໍຄື ເຮັດໃຫ້ເສດຖະກິດການຄ້າຂອງແຂວງ ມີການຂະຫຍາຍຕົວກ້າວຂຶ້ນ ຕາມແນວທາງນະໂຍບາຍຂອງພັກທີ່ວາງອອກ.


ງານວາງສະແດງຄັ້ງນີ້, ມີຮ້ານຄ້າວາງສະແດງ-ຈໍາໜ່າຍທີ່ມາຈາກ 9 ເມືອງ, 1 ນະຄອນ, ຫົວໜ່ວຍທຸລະກິດ ຜູ້ປະກອບການທັງໝົດ 50 ຮ້ານ ອັນທີ່ພົ້ນເດັ່ນມີ ສິນຄ້າຜ້າໄໝ ບ້ານສະຜ່າຍ, ບ້ານຄໍາຢາດ ເມືອງຊະນະສົມບູນ, ເຄື່ອງຫັດຖະກໍາແກະສະຫລັກໄມ້ ບ້ານໜອງບຶງ ເມືອງປະທຸມພອນ, ກາເຟ, ຊາ ແລະ ພຶດຜັກ ໝາກໄມ້ປອດສານພິດ ເມືອງປາກຊ່ອງ, ໝາກຖົ່ວລຽນໃຫຍ່-ເຫລົ້າໄຫ ເມືອງບາຈຽງຈະເລີນສຸກ, ເຄື່ອງທີ່ລະນຶກ, ຈັກສານດ້ວຍຫວາຍ, ໄມ້ປ່ອງ ຈາກພາກສ່ວນອື່ນໆອີກ, ຄາດຄະເນຈະມີເງິນໝູນວຽນຊື້ຂາຍແຕ່ລະວັນ ປະມານ 100-150 ລ້ານກີບ.